Read Quechua Cuzco Bible 1988 ECLESIASTÉS 6 Bible Online

ECLESIASTÉS 6 - Quechua Cuzco Bible 1988 bible

ECLESIASTÉS 6

¹Huk mana allintan kay pachapi rikurqani, chayqa runakunapaq llasan karqan:

²Diosmi runaman qon qhapaq-kaykunata, allinkaqkunata, yupaychaytawan, paypaqqa tukuy ima munasqanmi kan, ichaqa Diosmi mana munanchu chaykunawan paypa q'ochukunanta, aswanpas wak runan chaykunawan q'ochukun. Chaypas yanqan, khuyay llakikuymi.

³Runaqa pachak wawayoqña kanman chaypas, askha watataña kawsanman chaypas, unay watayoqña kanman chaypas, manataq allinkaqwan q'ochukunmanchu, manataq allintapaschu p'ampakunman chayqa, ñoqan nini: Wañusqa naceq wawan chay runamantaqa aswan kusisamiyoqraq, nispay.

⁴Chay wawaqa yanqapaqmi hamun, tutayaqpitaq ripun, sutinpas laqhayaqpa pakasqanmi kapun.

⁵Manan intitapas rikurqanchu, imatapas yacharqanchu. Chay runaña iskay waranqa watata kawsaspan, kaqninkunawan mana q'ochukunmanchu karqan chayqa, chay wañusqa naceq wawan paymantaqa aswanta samakun. ¿Manachu llapapas kaq cheqasllaman rinku?

⁷Runaq tukuy llank'asqanqa mikhunanpaqmi, chaypas manan yarqayninqa thasnukunchu.

⁸¿Imapitaq yachayniyoqqa mana yuyayniyoqmanta aswan allin? ¿Imatataq wakcha runaqa tarin, runamasinkunaq qayllanpi allintaña purin chaypas?

⁹Aswan allinmi ñawiwan rikuyqa yuyayllapi munapakuymantaqa. Chaypas yanqan, wayra hap'iykuy hinallan.

¹⁰Kunan kaqqa sutiyoqñan karqan, yachakuntaqmi imachus runaqa kasqan. Manan mayqen runapas paymanta aswan atiyniyoqwanqa churanakuyta atinchu.

¹¹Cheqaqtapunin askha rimasqapiqa yanqa askha thawtisqapas kallantaq. Manan chaywanpas imatapas runaqa tarinchu.

¹²Chay hinaqa, manan pipas yachanchu imachus yanqa kawsaynin p'unchaykunapi runaq allinninpaq kasqanta, chaykunapin payqa llanthu hinalla kawsan. Chayri, ¿pitaq runaman willanqa imachus paypa qhepanman kay pachapi kananta?