Read Quechua Cuzco Bible 1988 ECLESIASTÉS 7 Bible Online

ECLESIASTÉS 7 - Quechua Cuzco Bible 1988 bible

ECLESIASTÉS 7

¹Aswan allinmi sumaqpaq hap'isqa kay, q'apaq hawinamantaqa. Aswan allinmi wañukapuy p'unchay nacemuy p'unchaymantaqa.

²Aswan allinmi wañuqpa wasiman riy q'ochukuna wasiman rinamantaqa, wañuyqa llapa runaq p'uchukaynin kasqanrayku. Kawsaqkaqqa chaytan yuyarinan.

³Aswan allinmi waqay asikuymantaqa, llakisqa uyaña kan chaypas sonqonqa kusikunmi.

⁴Yachayniyoqqa wañuypin yuyan, mana yuyayniyoqmi ichaqa kusikuyllapi yuyan.

⁵Aswan allinmi yachayniyoqpa anyakuyninta uyariy, mana yuyayniyoqkunaq takisqanta uyariymantaqa.

⁶Mana yuyayniyoqpa asisqanqa q'onchapi p'arararaspa rawraq khiska hinan. Chaypas yanqallataqmi.

⁷Yachayniyoq sarunchan chayqa, pisi yuyayniyoqmanmi tukun, lluk'iykuypas sonqontan waqllichin.

⁸Aswan allinmi imaqpas tukukuynin qallarisqanmantaqa. Aswan allinmi muchukuq sonqo kay hatunchakuq sonqo kaymantaqa.

⁹Ama sonqoykipi usqhaylla phiñakuychu, phiñakuyqa mana yuyayniyoqkunaqmi.

¹⁰Aman hayk'aqpas ninkichu: ¿Imanaqtintaq ñawpa p'unchaykunaqa kay p'unchaykunamanta aswan allin karqan? nispaykiqa. Manan chayqa yachaywan tapukuychu.

¹¹Herencia hinan yachayqa allin, allintaqmi kay pachapi tiyaqkunapaq.

¹²Yachayqa waqaychanmi, qolqepas waqaychanmi, yachaymi yachayniyoqta kamachin, chaymi qolqemanta aswan allinqa.

¹³Qhawariy Diospa ruwasqanta. ¿Pitaq paypa q'ewisqanta cheqanyachinman?

¹⁴Allinkaq p'unchaypi chay allinkaqwan q'ochukuy, mana allin p'unchaypitaq allinta qhawariy: Diosmi iskaynintapas paqarichin. Chay hinaqa manan pipas yachanchu qhepaman imapas kanantaqa.

¹⁵Yanqa kawsasqay p'unchaykunapin kay iskayta rikurqani: Kanmi chanin runa chaninta ruwaspa wañuq, kallantaqmi mana chanin runa mana chaninta ruwashaspa unayta kawsaq.

¹⁶Ama sinchi chaninchu kay, ama sinchi yachayniyoqpaschu kay. ¿Imanaqtintaq waqlliwaq?

¹⁷Ama sinchi mana allinta ruwaqchu kay, ama mana yuyayniyoqpaschu kay. ¿Imanaqtintaq manaraq wañunaykipi wañuwaq?

¹⁸Allinmi chanin-kayta hap'iyqa, mana allin kaqtapas mana kachariyqa. Diosta manchakuqpaqqa tukuymi allillan kanqa.

¹⁹Yachayqa hamawt'atan aswan atiyniyoqman tukuchin huk llaqtapi chunka kamachikuqkunamantapas astawanraq.

²⁰Kay pachapiqa allinkaqllatapuni ruwaq, manataq hayk'aqpas huchallikuq chanin runaqa manan kanchu.

²¹Ama tukuy imaymana rimasqatapas maki uyariychu, paqtan kamachiykiq mana allin nisqasuykita uyariwaq.

²²Qanpas allintan yachakunki may askha kutita hukkunamanta mana allin rimasqaykita.

²³Lliw kaykunatan yachaywan t'aqwirqani: Yachayniyoqmi kasaq, nispay. Yachaymanmi ichaqa mana aypayta atirqanichu.

²⁴Imachus kawsay kasqanqa mana entiendey atiymi. Sinchi sasan aypanapaq, manan pipas taripayta atinmanchu.

²⁵Chay hinaqa, entiendeyta munaspaymi tukuy sonqo t'aqwispa maskharqani yachaytapas, imaynachus imakunaqa kasqantapas. Hinan yacharqani mana yuyayniyoq-kayqa mana allin kasqanta, millay kawsaypas waq'ayay kasqanta.

²⁶Wañuymantapas aswan millaytaqa warmitan tarini, payqa llika hinan, sonqonqa toqlla hinan, makinpas cadena hinan. Diospa sonqonpaq hina kawsaqqa manan makinman chayanqachu, huchasapan ichaqa llikanpi hap'ichikunqa.

²⁷Yachachiqmi nin: Uyariy, kaytan tarini: Imaynachus imakunapas kasqanta yachanaypaqmi sapankata ch'ulla-ch'ullamanta t'aqwisharqani.

²⁸Mana tarispay maskhashaspaymi waranqa qhari ukhupi huk qharillata tarirqani payta sumaqta rikunaypaq. LLapa warmikuna ukhupin ichaqa manapuni huk warmillatapas tarirqanichu.

²⁹Kayllatan tarirqani: Diosqa runataqa chanintan ruwarqan, runataq ichaqa askha sasachakuykunata paqarichirqan, nispa.