Read Quechua Cuzco Bible 1988 ECLESIASTÉS 8 Bible Online

ECLESIASTÉS 8 - Quechua Cuzco Bible 1988 bible

ECLESIASTÉS 8

¹¿Pitaq yachayniyoq hinari? ¿Pitaq imakunatapas sut'inchayta yachan? Yachayqa runaq uyantan k'anchachin, phiña uyantapas llamp'uyachinmi.

²Diospa qayllanpi kasukunaykipaq jurarqanki, chayrayku reypa kamachikusqan simitaqa kasukuy.

³Ama usqhayllaqa qayllanmanta ripuychu. Ama mana chanin ruwaykunamanpas haykuychu, payqa tukuy ima munasqantan ruwan.

⁴Reypa rimarisqantaqa kasullankupunin, manan pipas paytaqa: ¿Imanashankitaq? ninmanchu.

⁵Pichus kamachikuy siminta hunt'aqqa manan ima mana allinpipas rikukunqachu, yachayniyoqqa reparantaqmi hayk'aqchus imaynatachus chayta ruwananta.

⁶Tukuy imaymanapaqmi tiempo kan hayk'aqchus imaynatachus ruwanapaq. Chaypas runataqa sasa kawsayninmi ñit'in.

⁷Payqa manan yachanchu imachus qhepaman kananta, manan pipas imayna kananta willaykuqninqa kanchu.

⁸Manan pipas kawsay samayninta kamachiyta atinmanchu, manallataqmi wañuynintapas kamachiyta atinmanchu. Manan pi soldadopas awqa-tinkuypiqa: Ripunaypaq kacharipuway, ninmanchu, manallataqmi millay runataqa millay-kayninpas kacharinmanchu.

⁹Lliw chaykunatan rikurqani kay pachapi tukuy imaymana ruwasqata entiendeyta munaspay, rikullarqanitaqmi runaqa runamasinta mana allinta ruwananpaq munaychakusqantapas.

¹⁰Ahinallataqmi millay runakunata rikurqani p'ampakuqta. Paykunan ch'uya cheqasman kuti t'ikra puriqku, mana chaninkaqta ruwasqanku llaqtapin yupaychasqa karqanku. Chaypas yanqallataqmi.

¹¹Mana chanin ruwasqamanta mana usqhaylla huchachay kaqtinmi, runakunaq sonqonqa mana allinkaqllatapuni ruwayta munan.

¹²Pachak kutitapas huchasapaqa huchallikuchun, unaytapas kawsachun, chaypas ñoqaqa yachallanitaqmi Diosta manchakuqkunaqa yupaychaqkunaqa allillanpuni kananta.

¹³Manan millay runaqa allillanpunichu kanqa, manataqmi unaytapaschu kawsanqa, kawsasqanqa llanthu hinallan, Diosta mana manchakuq kasqanrayku.

¹⁴Huk yanqapas kay pachapi kallantaqmi: chanin runakunan muchun mana chanin runakunapas kankuman hina, mana chanin runakunataqmi kusikunku chanin runakunapas kankuman hina. Ñoqan nini chaypas yanqallataq kasqanta.

¹⁵Chaymi ñoqaqa hukkunata: Tukuy imaymanawan q'ochukuychis nini. Manan runaqqa kay pachapi allinkaqnin kanchu, aswanpas mikhuynillanmi, ukyaynillanmi, kusikuynillanmi. Chay hinaqa, Diospa payman qosqan kay pachapi kawsasqan p'unchaykunapiqa uma nanaywan llank'ayña kanqa chaypas, q'ochukuyninqa kashallanqapunin.

¹⁶Manan runata tutapas p'unchaypas puñuy aysanchu, chaymi yachayta entiendenaypaq kay pachapi runaq tukuy imaymana ruwasqantapas rikunaypaq maskhaspay,

¹⁷Diospa lliw ruwasqanta rikurqani. Manan pipas kay pachapi Diospa ruwasqanta entiendeyta atinchu. Runaqa sinchitaña maskhanqa chaypas, manan chayta tarinqachu. Yachayniyoqña chaytaqa: Yachanin ninqa chaypas, manapunin chaytaqa entiendenchu.