Read Quechua Cuzco Bible 1988 ECLESIASTÉS 9 Bible Online

ECLESIASTÉS 9 - Quechua Cuzco Bible 1988 bible

ECLESIASTÉS 9

¹Tukuy chaykunata allinta yuyaykuspaymi, sut'ita repararqani chaninkunapas yachayniyoqkunapas ruwasqankupas Diospa makinpi kasqanta. Chaypas runaqa manan yachanchu munakuychus cheqnikuychus payta suyashasqanta. Pitapas imapas sucedellanmanmi.

²Chaypas llapatapas kaqtakaman suceden: chanin runatapas mana chanin runatapas, allin runatapas millay runatapas, ch'uya runatapas mana ch'uya runatapas, sacrificiokuna haywaqtapas sacrificiokuna mana haywaqtapas, allin runatapas huchallikuqtapas, juraqtapas jurayta manchakuqtapas.

³Kay pachapi imaymana sucedeq ukhupin kay mana allin kan: kaqkaman llapata suceden. Runakunaq sonqonpas mana allinkaqwan hunt'aykusqan kashan, hinallataq sonqonpas tukuy kawsasqan p'unchay waq'ayaywan hunt'a kashan, chaymantataq aya p'ampanaman ripun.

⁴Kawsaqkunapaqqa kanraqmi suyakuy, aswan allinmi kawsashaq alqo, wañusqa leonmantaqa.

⁵Kawsashaqkunaqa yachankun wañukapunankuta, wañukapuqkunan ichaqa mana imatapas yachankuchu, manañataq imatapas chaskinkuñachu, paykunaqa qonqasqañan kapunku.

⁶Munakuyninkupas cheqnikuyninkupas envidiakuyninkupas tukukapunñan, manañan astawanpas kay pachapi ima ruwanatapas ruwaysikunkuchu.

⁷Phaway, t'antaykita kusisqa mikhuykamuy, kusisqallataq vinoykitapas ukyaykamuy, Diosqa ruwashasqaykikunatan: Allinmi, ninña.

⁸Yuraqllatapuni p'achakuy, umaykitapas aceitewan hawikullaypuni.

⁹Munasqayki warmiwan kusisqa tiyakuy, kay pachapi Diospa qosqasuyki sapa p'unchay yanqa kawsayniykipi. Chayllan kay pachapi uma nanaywan llank'asqaykipi tupaqniykiqa.

¹⁰Imapas ruwanaykipaq kaqtaqa k'uchilla ruway, maymanchus rishanki chay Wañuy-pachapiqa manan ima llank'anapas yuyanapas reqsinapas yachanapas kanchu.

¹¹Kay pachapiqa rikullarqanitaqmi: Manan allin phawaqkunachu phawaspaqa llallin, manan kallpasapakunachu awqa-tinkuypiqa atipan, manan hamawt'akunachu t'antayoqpas, manan allin yuyayniyoqkunachu qhapaqkunapas, manan allin yachayniyoqkunachu sumaq chaskisqaqa, aswanpas sapankan imaynapipas rikukun.

¹²Manan runaqa imayna tiempochus tupamunanta yachakunchu. Imaynan challwakunapas millay llikapi hap'ichikunku, imaynan phalaq animalkunapas toqllapi hap'ichikunku, ahinan runapas qonqaylla payman chayaqtin millay tiempopi hap'isqa rikukun.

¹³Kay pachapiqa kay yachaytapas rikullarqanitaqmi, chaymi hatuntaraq qhawarichiwarqan:

¹⁴Huk huch'uy llaqtallan karqan, chaypitaq pisi runalla karqan. Chay contrataq huk hatun rey hamurqan, hinaspan muyuykuspa haykunanpaq hatun seqanakunata sayarichirqan.

¹⁵Chay llaqtapitaq huk wakcha runa tiyarqan, ichaqa yachayniyoqmi karqan, paymi llaqtata yachayninwan qespichirqan, manataqmi pipas chay wakcha runata yuyarirqanchu.

¹⁶Chaymi ñoqa nirqani: Aswan allinmi yachayniyoq kayqa kallpasapa kaymantaqa, nispa. Chaypas wakcha runaq yachayninqa pisicharparisqan karqan, rimasqankunapas mana uyarisqan karqan.

¹⁷Aswan uyarisqan hamawt'akunaq samp'alla rimasqan mana yuyayniyoqkuna ukhupi kamachikuqpa qaparkachasqanmantaqa.

¹⁸Aswan allinmi yachayqa maqanakuna armakunamantaqa, huk runaq pantasqallanmi ichaqa ancha allinkaqta waqllichin.