Read Quechua Cuzco Bible 1988 CANTARES 1 Bible Online

CANTARES 1 - Quechua Cuzco Bible 1988 bible

CANTARES 1

¹Salomonpa aswan munay takin.

²Much'aykuwanaykitan munashani, munaykuwayniykiqa vinomantapas aswan misk'in,

³hawikunaykiq q'apayninmantapas aswan sumaqraqmi. Sutiykita uyariyqa q'apaq hawinata muskhiykuy hinan. ¡Chaychá sipaskunaqa munakusunkiku!

⁴Pusakuway, ¡phawasunchis! Reyniy kapuway, wasiykiman pusaway. Qanraykun q'ochukusaqkupas kusikusaqkupas, munakuyniykitaqa vinomantapas aswantaraqmi hatunchasaqku. ¡Chaychá munakusunkiku!

⁵Jerusalén warmikuna, kullin kakuni, ichaqa munaychallañan, ch'inneqpi tiyaq Kedar runakunaq karpan hina yanan, Salomonpa karpanpi cortinakuna hina munayllañan.

⁶Ama qhawaykuwaychischu kulli kakuqtiy, intiq q'aspasqan kakuqtiy. Turaykunan ñoqapaq phiñakurqanku, hinaspan uvas chakrakuna qhawaqta churaykuwarqanku, ñoqa kikiytataq mana yuyarikurqanichu.

⁷Willaway, sonqo rurulláy, ¿maypin michishanki? ¿Maypin chawpi p'unchayta ovejakunata puñurachinki? Paqtataq uywakunaq qayllanpi puriqtiy michiq-masiykikuna qhelli warmita hina qhawawankuman.

⁸Qanqa llapa warmikunamantapas aswan munayraqmi kanki, maypichus michishasqayta mana yachankichu chayqa, ovejakunaq yupinta qatipay, hinaspa michiqkunaq ch'ukllan qayllapi cabrachaykikunata michikamuy.

⁹Munakusqalláy, imaynan rey Faraonpa caballonkunaqa china caballoman qhawapakun, chay hinan qanqa qanman qhawapachiwanki.

¹⁰¡Ima munaymi uyaykiqa achalasqa simp'akuna ukhupi rikhurin! ¡Ima munaymi kunkaykiqa walqanakunawan sumaqchasqa rikhurin!

¹¹Lliphipinanpaq qolqewan chawpinasqa qori simp'akunatan ruwachipusqaykiku.

¹²K'irakunanpi rey k'irarayashanankamaqa q'apaq nardo hawinaymi q'aparirqan.

¹³Munakusqayqa q'apaq mirra hinan ñoqapaqqa, qhasqollaypin payqa kashan.

¹⁴En-gadi uvas chakrakunamanta apamusqa alheña t'ika mayt'u hinan munakusqayqa kapuwan.

¹⁵Munakusqalláy, ¡ima munaymi kanki! ¡Ima sumaq rikch'ayniyoqmi kanki! ¡Ñawiykipas iskay urpi hinan!

¹⁶Munakusqalláy, ¡ima munaymi kanki! ¡Ima sumaqmi kanki! Puñunanchisqa munay q'omerllañan,

¹⁷cedromantan wasinchispa kurkunkunaqa, cipresmantan wasi pata k'aspikunapas.