Read Quechua Cuzco Bible 1988 CANTARES 2 Bible Online

CANTARES 2 - Quechua Cuzco Bible 1988 bible

CANTARES 2

¹Ñoqaqa Sharón pampa t'ikan kani, qheswapi hamanq'ay t'ikan kani.

²Imaynan hamanq'ay t'ikaqa khiska-khiskapi, chay hinan munakusqay warmiqa sipaskuna ukhupi.

³Imaynan manzana sach'aqa sach'a-sach'api, chay hinan munakusqayqa waynakuna ukhupi. ¡Ancha sumaqmi llanthunpi tiyaykuyniyqa! ¡Ancha misk'in simiypaq rurusqanqa!

⁴Hatun mikhuna wasimanmi pusawarqan, munakushallawaspanmi qhawapayawarqan.

⁵Pasaswan kallpachawaychis, manzanawan kallpachawaychis, anchatapunin munakushani.

⁶Lloq'e makinpin umay samaykun, paña makinwantaq oqllaykuwan.

⁷Jerusalén sipaskuna, salqa tarukakunarayku, china tarukachakunarayku jurapuwaychis: Munakuytaqa ama rikch'arichisunchischu, aswanpas kikillanmanta sayarichun, nispa.

⁸¡Uyariychis! ¡Hamushanñan munakuwaqniyqa! ¡Qhawariychis! ¡Haqayqá! Orqon-orqonta p'itaspan hamushan, moqon-moqonta saltaspan hamushan.

⁹Munakusqayqa taruka hinan, wayllukusqayqa luychu hinan. ¡Qhawariychis! Perqa qhepapiñan sayashan, ventanamantan qhawapakamushan.

¹⁰Munakusqaymi niwarqan: Munakusqalláy, hamullayña, munaychalláy, hakullaña.

¹¹Kayqa, chiri mitan ripunña, manañan paranñachu.

¹²Ñan t'ikapas campopi t'ikarinña, ñan urpikunaq takinan p'unchaykunapas chayamunña, ñan llaqtanchispi kullkuq takisqanpas uyarikunña.

¹³Ñan higos sach'apas higosninta phutuchimunña, ñan sisashaq uvaskunaqa q'aparimunña. Munakusqalláy, hamullayña, munaychalláy, hakullaña.

¹⁴Urpichalláy, qaqa k'aktukunapin pakakushanki, qhatapi kaq pakakunapi uyaykita qhawarichiway, kunkaykita uyarichiway. Kunkaykiqa sonqo suwallañan, uyaykipas munaychallañan, nispa.

¹⁵Uvas chakraykuqa t'ikaykushanñan, chayrayku hap'imuychis atoqkunata, chay huch'uy atoqkunaqa uvas chakraykutan mast'anman.

¹⁶Ñoqaqmi munakusqayqa, ñoqataq paypa kani. Payqa hamanq'ay-hamanq'aypin michishan.

¹⁷P'unchay manaraq illarimushaqtin, laqhayaqpas manaraq chinkaripushaqtin, kutimpullayña, munakusqalláy, orqokunaq k'aktunpi orqo taruka hina kay, luychu hina kay.