Read Quechua Cuzco Bible 1988 CANTARES 4 Bible Online

CANTARES 4 - Quechua Cuzco Bible 1988 bible

CANTARES 4

¹Munakusqalláy, ¡ima munaymi kanki! ¡Ima sumaq rikch'ayniyoqmi kanki! Ñawiykipas uma qatanayki ukhupi iskay urpi hinan. Chukchaykipas Galaad qhatakunanta uraykamushaq cabra t'aqa hinan.

²Kiruykipas rutusqa yuraq oveja t'aqa hinan, bañasqamanta lloqsimushaq oveja t'aqa hinan, mellizo hinan iskaykama kashan, manataq mayqenpas sapallanchu kashan.

³Simiykipas sansaq-puka q'aytu hinan, rimaqtiykiqa munayllañan. Uyaykipas qatakusqayki ukhupi phasmisqa puka granada hinan.

⁴Munay sikllan kunkaykiqa Davidpa sumaq perqasqa torren hina. Waranqa escudon chaypi warkurayashan, sapankan kallpasapakunaq hatun escudon.

⁵Iskaynin ñuñuykiqa iskay uña taruka hinan, hamanq'ay t'ika-t'ikapi mikhushaq mellizo uña hinan.

⁶P'unchay manaraq illarimushaqtinmi laqhayaqpas manaraq chinkaripushaqtinmi mirra q'apaq orqoman seqasaq, incienso q'apaq moqoman wichasaq.

⁷Munakusqalláy, chakiykimanta umaykikaman munaychallaña kanki, manan qanpiqa ima millaypas kanchu.

⁸Yanalláy, Líbano orqomanta ñoqawan uraykamuy, Libanomanta ñoqawan uraykamuy. Amana nisqa orqomantapacha uraykamuy, Senir orqo patamantapacha, Hermón orqo patamantapacha, leonkunaq t'oqonmantapacha, leopardokunaq tiyanan orqomantapacha.

⁹Panalláy, yanalláy, sonqoytan suwawarqanki, hukta qhawariwaspallaykin sonqoyta suwawarqanki, walqaykiq huknin umiñanwanmi sonqoyta suwawarqanki.

¹⁰Panalláy, yanalláy, may sumaqmi munaykukuyniykiqa. Vinomantapas aswan misk'iraqmi munaykukuyniykiqa, q'apaq hawikunaykipas ancha sumaqpunin, manan imapas chay hinaqa q'apanchu.

¹¹Yanalláy, miel misk'in simiykiqa, miel misk'illañan lechellañan simiykiqa, p'achaykipas Líbano orqo-orqo hinan q'aparishan.

¹²Panalláy, yanalláy, wisq'asqa huertan kanki, qenchasqa p'uytun kanki, allin waqaychasqa pukyun kanki.

¹³Chaypin askha granada mallkikuna rurun, alheñapas nardopas t'ikashanmi.

¹⁴Kanmi nardo t'ikapas, azafrán t'ikapas, q'apaq cañapas, canela sach'apas, imaymana niraq incienso mallkikunapas, mirra t'ikapas, áloe sach'apas, llapa sumaq q'apaqkunapas.

¹⁵Huerta pukyun kanki, phullpushaq pukyun kanki, Libanomanta phaqchaykamuq unun kanki.

¹⁶Wichay wayra, wayrarimuy. Uray wayra, phukurimuy. Huertayman wayramuy, anchata q'aparichiy. Munakusqalláy, huertaykiman hamuy, misk'i frutata mikhuykuy.