Read Quechua Cuzco Bible 1988 CANTARES 5 Bible Online

CANTARES 5 - Quechua Cuzco Bible 1988 bible

CANTARES 5

¹Panalláy, yanalláy, ñan huertayman haykuniña, ñan mirraytapas q'apaqniytapas pallamuniña, ñan lachiwanaymanta miel misk'itapas malliniña, ñan vinoytapas lecheytapas ukyaniña. Munanakuqkuna, mikhuychis ukyaychis, amikunaykichiskama munanakuychis.

²Puñushaspayqa mosqokushallarqanin: ¿Iman chay? ¡Munakuwaqniyqa punkutan takamushasqa! Panalláy, munakusqalláy, kicharimuway, urpichalláy, munaychalláy, kicharimuway. Umaytan sullaykushawan, tuta sullan chukchaymanta sut'urimushan, nispa.

³Ñan p'achaqakuniña, ¡wakmantaraqchá p'achakuyman! Ñan chakiyta maqchikuniña, ¡wakmantachá qhellichakuyman!

⁴Munakusqayqa wasi punku p'utintan makinta haywaykamushasqa, chaywanmi sonqoyqa phataqeshasqa.

⁵Chaymi munakusqayta kicharimunaypaq sayarishasqani, punku p'utiman lloqllaykuq mirran makiymanta sut'urishasqa, dedoykunamantapas sut'urishasqa.

⁶Munakusqaypaqmi punkuta kicharishasqani, ichaqa ñan munakusqayqa ripusqaña, ñan chinkaripusqaña, chaymi sonqoyqa chiriyashasqaraq. Maskhashasqanin manataq tarisqanichu, waqyakushasqanin manataq kutichimuwasqachu.

⁷Llaqta muyuq guardiakunan tariwaspanku maqashawasqaku k'irishawasqaku, llaqta perqapi qhawaqkunan llikllayta qechushawasqaku.

⁸Jerusalén sipaskuna, munakusqayta tarispaykichisqa willaykapuwankichispunin wañuytapuni munakushasqayta.

⁹Llapa warmikunamantapas aswan munaycha, ¿imapitaq munakusqayki qhariqa huk qharikunamantapas aswan allin? ¿Imapitaq wayllukusqayki qhariqa hukniraq chay hinatapuni willaykachiwanaykikupaq?

¹⁰Munakusqayqa qhalin munayllañan, chunka waranqa ukhupipas sut'i reqsisqan.

¹¹Umanqa ancha ch'uya qori hinaraqmi, chukchanqa k'upan, suweq'ara hina yanan,

¹²ñawinqa phawaq mayu patapi iskay urpi tiyashaq hinan, lechewan maqchisqapas kashankuman hinan, iskay ch'olqochisqa umiña hinan.

¹³Uyanqa sumaq q'apaq t'ikayoq huerta hinan, siminqa q'apashaq mirra sut'umuq hamanq'ay t'ika hinan,

¹⁴maki wich'unqa q'ellu umiñawan ch'olqochisqa qori champi hinan, wiksanqa q'oyu umiñakaman llusk'achasqa marfil hinan.

¹⁵Phakanqa ch'uya qori teqsipi sayachisqa mármol tusakuna hinan, rikch'ayninqa Líbano orqokuna hinan, Líbano cedro sach'akuna hina sikllan.

¹⁶Much'akuyninqa misk'illañan, payqa sonqoytan suwashallawanpuni. Jerusalén sipaskuna, chay hinan munakusqayqa, chay hinan sonqo ruruyqa.