Read Quechua Cuzco Bible 1988 CANTARES 6 Bible Online

CANTARES 6 - Quechua Cuzco Bible 1988 bible

CANTARES 6

¹Llapa warmikunamantapas aswan munaycha, ¿maytan munakusqaykiqa ripurqan? ¿Maytan wayllukusqaykiqa puriripurqan? Haku payta maskhamusunchis.

²Munakusqayqa huertanmanmi uraykurqan, q'apashaq huertanpi puririkamunanpaq, hamanq'ay t'ikakunata pallarikamunanpaq.

³Ñoqaqa munakusqaypan kani, munakusqaytaqmi ñoqaq, payqa hamanq'ay t'ika-t'ikapin puririkamushan.

⁴Munakusqalláy, ancha munaychan qanqa kanki Tirsa llaqta hina, munaychallañan qanqa kanki Jerusalén llaqta hina, seqella puriq ch'askakuna hina lliphipishaq.

⁵Amaña qhawapayawaychu, ñawiykiqa sonqoytan suwawan. Chukchaykiqa Galaad qhatakunanta uraykamushaq cabra t'aqa hinan.

⁶Kiruykiqa rutusqa yuraq oveja t'aqa hinan, bañasqamanta lloqsimushaq oveja t'aqa hinan, mellizo hinan iskaykama kashan, manataq mayqenpas sapallanchu kashan.

⁷Uyaykiqa qatakusqayki ukhupi phasmisqa puka granada hinan.

⁸Soqta chunkan qoyakunaqa, pusaq chunkataqmi pallakunapas, ancha askhataqmi sipaskunapas,

⁹ichaqa ch'ullallan urpichallayqa, ch'ullallan munaychallayqa, mamanpa sapan ususillanmi, wachakuqninpa aswan munakusqallanmi. Payta rikuspan sipaskunaqa: Kusisamiyoqmi, nirqanku, qoyakunapas pallakunapas paytan yupaycharqanku.

¹⁰¿Pitaq kayri pacha illarimuq hina lloqsimun killa hina munaycha inti hina k'anchashaq seqella puriq ch'askakuna hina lliphipishaq?

¹¹Nogal sach'a-sach'amanmi uraykurqani qheswa wayq'opi q'omer llanllashaqta rikunaypaq, uvas yurakunaqa phutumushasqachus granada mallkikunaqa sisashasqachus chayta rikunaypaq.

¹²Chaymantaqa manañan yachapurqanichu imaynapunichus kapusqanta qhapaq carretanpi umalliywan kuska rikhurinaykama.

¹³¡Kutiriykuy, muyuriykuy, Sulam warmilláy! ¡Kutiriykuy, tusuykuy, rikuykuytan munaykiku! ¿Imanaqtintaq ñoqata rikuyta munawankichis Mahanaim nisqa tusuyta tusushaqta?