Read Quechua Cuzco Bible 1988 CANTARES 8 Bible Online

CANTARES 8 - Quechua Cuzco Bible 1988 bible

CANTARES 8

¹¡Turallaychus qanqa kawaq, mamaypa ñuñunta ñuñuq! Chaypachan hawapi tupaspay much'aykuykiman, manataqmi pipas pisichawanmanchu.

²Mamaypa wasinmanmi pusaykiman yachachiwaqniypa wasinmanmi pusaykuykiman. Ñoqan q'apashaq vinota ukyachiykiman, granadaykuna ch'irwasqatan haywaykiman.

³Lloq'e makinpin umay sawnakun, paña makinwantaq oqllaykuwan.

⁴Jerusalén sipaskuna, jurapuwaychis: Ama munakuytaqa rikch'arichisunchischu, aswanpas kikillanmanta sayarichun, nispa.

⁵¿Pitaq chay munakusqan qhariman k'iraykukuspa ch'inneqmanta wichamuqri? Manzana sach'a k'uchupin rikch'arichirqayki, chaypin mamaykiqa wiksallikurqasunki, chaypin nanaywan hap'ichikuspa wachakurqasunki.

⁶Ñoqallata sonqoykipi hap'ikuway, ñoqallata makiykipi apakuway. Wañuy hinan munakuyqa kallpasapa, Wañuy-pacha hinan sinchi loqhellaña, sansariyninpas nina rawray hinan, qallushaq nina rawray hinan.

⁷Askha unupas munakuytaqa manan thasnuyta atinmanchu, manan mayukunapas millp'uyta atinmanchu. Pipas kay munakuypaq llapa wasi kawsayninta qonman chayqa, pisichasqapunin rikukunman.

⁸Kanmi panachanchis, mana ñuñuyoqraqmi. ¿Imanasunmi panachanchista, pay rimaykukuq hamuqtinku?

⁹Paychus perqa kanman chayqa, perqa patapin qolqe torrekunata sayarichisunman, paychus punku kanman chayqa, cedro tablakunawanmi muyuchisunman.

¹⁰Ñoqaqa perqa hinan kani, ñuñuykunataq torrekuna hina, chaymi paypaqqa sumaq kusichiqnin kani.

¹¹Baal-hamonpin Salomonpa uvas chakran karqan, chaytan qhawaqkunaman qorqan, sapankankutaq rurusqanmanta waranqa qolqeta payman apamunanku.

¹²Salomonlláy, waranqa qolqeqa qanpaqmi, iskay pachaktaqmi chakra qhawaqkunapaq, ñoqaqa kikiymi uvas chakrayta qhawakuni.

¹³Urpilláy, qanqa huertakunapin tiyashanki, qharimasiykunaqa makin uyarishanku, ñoqaman kunkaykita uyariykachiway.

¹⁴Phawamuy, munakusqalláy, q'apashaq orqo-orqo patapi orqo taruka hina kay, luychu hina kay.