Read Quechua Cuzco Bible 1988 ISAÍAS 1 Bible Online

ISAÍAS 1 - Quechua Cuzco Bible 1988 bible

ISAÍAS 1

¹Judá suyupi rey Uzías, rey Jotam, rey Ahaz, rey Ezekías ima kamachikusqanku watakunapin Señor Diosqa Amozpa churin Isaiasman Judá suyumanta Jerusalenmantawan kaykunata rikuchirqan.

²Hanaq pachapas kay pachapas, uyariychis, ñoqa Señor Diosmi nini: Wawakunatan uywakurqani hatun kanankama, paykunataq ichaqa ñoqa contra sayarirqanku.

³Toroqa reqsinmi uywaqninta, asnopas rikunmi uywaqninpa qarananta, llaqtay Israelmi ichaqa mana reqsiwanchu, manataq entiendenpaschu, nispa.

⁴¡Ikiraqmi! ¡Imaraqmi! Huchasapa runakunan kankichis, hucha q'epi llaqta, mana chanin miraykuna, waqllisqa runakuna. Señor Diosmantan karunchakapunkichis, Israelpa Ch'uya Diosnintan pisichankichis, paytan saqerparipunkichis.

⁵¿Imanaqtinmi sinchita k'ulluchakunkichis? ¿Aswan muchuchinatachu munankichis? Umaykichispas lliwmi k'irisqa, cuerpoykichispas lliwmi nanasqa.

⁶Umamanta chakikaman mana qhalichu kashan, aswanpas lliwmi k'irisqa, punkillisqa, lliq-nisqa kashan. Manan pipas hampisunkichischu, manan wataykusunkichispaschu, manan nanayniykichistapas aceitewan llamp'uyaykachisunkichispaschu.

⁷Suyuykichisqa purunyachisqan kapushan, llaqtaykichiskunapas ninawan kanaykusqan kapushan. Wak llaqta runakunan qhawashaqtiykichis chakraykichista hoqaripushan, paykunan lliwta purunyachipushan.

⁸Sapan Jerusalenllan qhepapun, uvas chakrapi kashaq ch'uklla hina, pepino chakrapi ch'uklla hina, awqakunaq muyuykusqan llaqta hina.

⁹Tukuy-atiyniyoq Señor Dioschus mana pisillatapas puchuchiwasunman karqan chayqa, Sodoma llaqta Gomorra llaqta hinan kashasunman karqan.

¹⁰Jerusalén umallikuna, qankunaqa Sodoma umallikuna hinan kankichis, Señor Diospa siminta uyariychis, Jerusalenpi tiyaq runakuna, qankunaqa Gomorra runakuna hinan kankichis, Diosninchispa yachachikuyninta makilla uyariychis.

¹¹Señor Diosmi nin: Qankunaqa askha sacrificiokunatan haywawankichis, ¿Chayta munanaypaqchu yuyankichis? Manan, anejo ruphachisqa sacrificioykichiswanqa amisqañan kani, wirayachisqa animalkunaq wiranwanpas amisqañan kani, cabrakunaq, borregokunaq, torillokunaq yawarnintapas millakunin.

¹²Ñoqaman asuykuq hamuwaspaykichismi yupaychana wasi patioykunata animalkunawan saruchinkichis, ichaqa, ¿pitaq chaykunata mañakurqasunkichis?

¹³Amaña apamuwaychischu mana serviq ofrendakunata. Incienso q'osñitapas manan munanichu. Mosoq killa fiestaykichispas, samana p'unchay huñukuyniykichispas, wak fiestaykichiskunapas millaymi, manan muchuyta atiniñachu.

¹⁴Mosoq killa fiestaykichistapas hatun fiestaykichistapas cheqnikunin, chaykunaqa qaqa hinan ñit'iykuwan, muchuspaypas sayk'upuniñan.

¹⁵Makiykichista mast'arispa mañakuwaqtiykichispas manan qhawarimusqaykichischu, anchataña mañakuwaqtiykichispas, manan uyarisqaykichischu. Qankunaqa runa wañuchiqkunan kankichis,

¹⁶chayrayku mayllikuychis, ch'uyanchakuychis. Mana chanin ruwayniykichiskunata ñawpaqeymanta wikch'uychis. ¡Amaña mana allinkunata ruwaychischu!

¹⁷Allinkaq ruwayta yachaqaychis, chaninchay ruwayta munaychis, sarunchasqa runakunata yanapaykuychis, mana tayta-mamayoqpaq chaninchayta ruwaychis, viudata juzganapi yanapaychis, nispa.

¹⁸Señor Diosqa nillantaqmi: Hamuychis, parlasunchis. Sansaq-puka hinaña huchaykichis kashan chaypas, rit'ita hinan yuraqyachisaq, sani-puka hinaña huchaykichis kashan chaypas, yuraq millmata hinan yuraqyachisaq.

¹⁹Uyariwaspa kasukunkichis chayqa, hallp'aq allinnin poqochisqan rurukunatan mikhunkichis,

²⁰mana kasukuq k'ullullapuni kashankichis chaymi ichaqa, awqa-tinkuypi hukpaqkama wañuchisqa kankichis. Ñoqa Señor Diosmi chayta nini, nispa.

²¹¿Imaynataq hunt'aq llaqta kashaspayki, rabona warmiman hina tukupunki? Ñawpaqqa llapa runaykikunan chanin-kayman hinapuni kawsarqanku, cheqaqkaqtataq ruwarqankupas, kunantaq ichaqa runa wañuchiqkunallaña kapushan.

²²Qolqeykipas titi aka hinan kapun, vinoykipas unuwan chhaqrusqan kapun.

²³Kamachikuqniykikunapas mana kasukuqmi kanku, suwakunaq wakiqmasinmi kanku, llapallankun lluk'iykusqa chaskiymanta wañukunkuraq, sumaq sonqo qoykunatataqmi munankupas. Mana tayta-mamayoqkunapaqpas manan chaninchayta ruwankuchu, viudaq uyarichikusqantapas manallataqmi kasurparinkuchu.

²⁴Chaymi Tukuy-atiyniyoq Señor Diosqa, Israelpa Munayniyoq Diosninqa nin: Chaykamalla, ñoqa contra sayariqkunataqa muchuchisaqmi, awqaykunamanqa aynita kutichisaqmi.

²⁵Qan contran sayarisaq, hinaspa metalta akanmanta ch'uyanchanku chay hinatan ch'uyanchasqayki, tukuy qhelli kayniykimantan pichasqayki.

²⁶Ñawpaqkaq juezkuna hina juezkunatan qankunapaq churasaq, yuyaychaqniykikunapas qallariypi hinan kanqa. Chaykuna qhepatataq sutichasunkiku: Chanin Llaqta, Hunt'aq Llaqta, nispanku.

²⁷Ñoqan chaninchay ruwaq kani, chaymi Jerusalén llaqtata qespichisaq, ñoqan kuskachaqqa kani, chaymi Jerusalenpi tiyaqkunata ñoqaman kutirikamuwaqtinku qespichisaq.

²⁸Huchasapakunata, mana kasukuq k'ullukunatan ichaqa ñut'uta ruwasaq, saqerpariwaqniykunapas wañunqakun.

²⁹Encina sach'akunata yupaychasqaykichismantan p'enqakunkichis, ídolo yupaychanapaq akllakusqaykichis huerta hawan p'enqachisqa kankichis.

³⁰Encina sach'aq urmaq raphin hinan kankichis, mana unuyoq huerta hinan kankichis.

³¹Allin kallpasapa qharipas mullpha ichhu hinan kapunqa, ruwasqankunapas phinchikillamanmi tukunqa, hinaspa kuska ruphapunqa, manataq pipas thasnunqachu, nispa.