Read Quechua Cuzco Bible 1988 ISAÍAS 13 Bible Online

ISAÍAS 13 - Quechua Cuzco Bible 1988 bible

ISAÍAS 13

¹Señor Diosqa Amozpa churin Isaiasmanmi Babilonia suyumanta kaykunata rikuchirqan:

²Señor Diosmi nin: ¡Huk q'ara orqopi awqa-tinkuy señalta hoqariychis! ¡Soldadokunata kamachiychis phawaykunankupaq! ¡Makita altoman haywariychis qhapaq llaqtaq punkunkunanta haykurparinankupaq!

³Ñoqapaq t'aqasqa soldadoykunatan waqyaniña, awqa-tinkuqniykunatan kamachiniña phiñachiwaqniykunata muchuchinankupaq, paykunaqa atipanaymanta wañunkuraqmi, nispa.

⁴¡Uyariychis! ¡Orqokunapin uyarikun askha runaq ch'aqwasqan hina! ¡Uyariychis! ¡Llaqta puran qaparkachashanku suyukunapas huñuykukushanman hina! Tukuy-atiyniyoq Señor Diosmi maqanakuypaq wakichisqa soldadonkunata sapankata qhawaran.

⁵Paykunan karu suyumanta hamunku, kay pachaq cantonmanta chayamunku, Señor Diosqa k'arak phiñasqan kashan, chaymi soldadonkunawan suyuntinta purunyachinqa.

⁶Señor Diospa muchuchinan p'unchaymi qayllamunña, Tukuy-atiyniyoqpa kachamusqan hatun llakiqa chayamunñan, chayrayku waqaychis.

⁷Llapa runakunaq makinmi liwi kanqa, llapallankutaq kallpa wañuy kanqaku,

⁸llaksasqan kanqaku. Sinchi nanasqan anchinqaku, wachakuq warmi hinan nanaywan k'uyukunqaku. Sapankan q'aqchasqa qhawarinakunqaku, uyankupas p'enqakuymantan sansarinqaraq.

⁹Chayamushanñan Señor Diospa muchuchinan p'unchayqa, sinchi llaksakuy p'unchaymi kanqa, rawrarishaq k'arak phiñakuy p'unchaymi kanqa, kay pachatan purunyachinqa, chaypi kashaq huchasapakunatapas ch'usaqyachinqa.

¹⁰Ch'askakunapas qoyllurkunapas manan k'anchamunqañachu, intipas lloqsirqamuspa hinan tutayapunqa, killapas manan k'anchamunqañachu.

¹¹Señor Diosmi nin: Kay pachatan mana chanin kayninmanta muchuchisaq, millay runakunatan huchankumanta wanachisaq. Hatunchakuqkunaq uma hoqariynintan p'uchukachisaq, usqhaylla phiñakuqkunatan, mana khuyapayakuqkunatan k'umuchisaq.

¹²Ofirmanta apamusqa ch'uya qoriqa sinchi pisin, chaymantapas aswan pisiraqmi runakunaqa kanqa.

¹³Hinaqtinmi hanaq pachapas chhaphchikunqa, kay pachapas tiyananmanta kuyurinqa rawrashaq k'arak phiñakuyniy hawa.

¹⁴Runakunaqa taruka qatiykachasqamanmi rikch'akunqa, mana michiqniyoq oveja t'aqamanmi rikch'akunqa, sapankan kutipunqaku kikin ayllunkumankama, sapankan ayqekunqaku kikin hallp'ankumankama.

¹⁵Pipas tarichikuqqa lanzawan sat'irqosqan wañunqa, ayqeshaq hap'isqapas espadawan k'irisqan wañunqa.

¹⁶Wawakunapas taytankuq ñawpaqenpin pampaman ch'aqesqa kanqa, wasinkupas llat'anasqan kanqa, warminkupas violasqan kanqa.

¹⁷Media suyu runakunatan paykuna contra tanqarisaq, chay runakunaqa manan qolqe sonqochu, manan qoriman k'askasqapaschu kanku.

¹⁸Wach'inankuwanmi waynakunata wañuchinqaku, chayllaraq naceqkunatapas manan khuyapayanqakuchu, erqekunatapas manan llakipayanqakuchu.

¹⁹Babiloniaqa lliw suyukunamantapas ancha sumaqmi, chay hawan runakunaqa hatunchakunku, ichaqa Sodoma llaqtata Gomorra llaqtata hinan thunisaq.

²⁰Chaypiqa manan pipas hayk'aqpas tiyanqañachu, Arabe runakunapas manan chaypiqa karpakunqañachu, michiqkunapas manan uywankuta michinqañachu.

²¹Chay llaqtapiqa usqhollokunallan tiyanqa, wasikunatapas pikpirikunallañan hunt'aykunqa, chaypiqa surikunallañan tiyanqa, orqo cabrakunallañan phawaykachanqa.

²²Pukara llaqtankunapipas chacal nisqa animalkunan aullakunqa, ancha sumaq wasikunapipas atoqkunan tiyanqa. Babiloniamanqa thunikunan p'unchaymi qayllaykamunña, Babiloniaqa pisi p'unchayllañan kanqa, nispa.