Read Quechua Cuzco Bible 1988 ISAÍAS 15 Bible Online

ISAÍAS 15 - Quechua Cuzco Bible 1988 bible

ISAÍAS 15

¹Moab suyupaq willakuy. Moabpi kashaq Ar llaqtan raqay-raqay kashan, huk tutallapi thunisqa. Moabpi kashaq Kir llaqtan raqay-raqay kashan, huk tutallapi thunisqa.

²Dibón llaqta runakunan orqopi kashaq yupaychana wasiman waqaq seqaykunku. Moab runakunan sinchita waqan Nebo llaqtaq Medeba llaqtaq thunikusqanmanta. Llapankun uma rutusqa, sunkha k'isusqa kanku.

³Luto p'achayoqmi runakuna callekunapi purinku, wasi patakunapin sonqo nanayta waqanku, plazakunapin llapallanku yupakunku, aminatan waqanku.

⁴Hesbón llaqta Eleale llaqta runakunan awqanku hawa qaparinku, qaparisqankutaq karupi kashaq Jahaza llaqtakamaraq uyarikun. Chaymi Moab suyupi allin qhari soldadokunaqa khatatatanku, sinchitataq pisi kallpayanku.

⁵¡Imaraqmi Moab suyu! Sonqoymi Moabmanta yawarta waqashan. Runankunan ayqekuspanku Zoar llaqtakama Eglat-selisiya llaqtakama phawanku. Wakinmi Luhit llaqtaman waqakuspa seqaykunku, wakintaq Horonaimman riq ñanta rinku: ¡Imaraqmi! ¡Ikiraqmi! nispa waqaspanku.

⁶Nimrim wayq'o unupas ch'akipunmi, q'achukunapas ñaq'epunmi, llapa q'omerkunapas ch'akipunmi, manapunin ima ch'ikchillapas kanchu.

⁷Chaymi runakunaqa waqaychasqa qhapaq-kayninkuta q'epiykukuspa Sauce Wayq'onta ayqekunku.

⁸Chay runakunaq qapariynintan Moab suyu qorpa ranra yachapayan, khuyayta waqasqankuqa Eglaim llaqtakaman, Beer-elim llaqtakaman uyarikun.

⁹Dimón llaqta mayu yawar hunt'aña kashan chaypas, aswantaraqmi mana allinta chayachisaq, Moab suyu runakunataqa ayqekuqtapas chaypi qhepaqtapas huk leonmi saq'arparinqa.