Read Quechua Cuzco Bible 1988 ISAÍAS 16 Bible Online

ISAÍAS 16 - Quechua Cuzco Bible 1988 bible

ISAÍAS 16

¹Ch'inneqpi kashaq Sela llaqtamanta Moab runakunaqa Jerusalenpi kamachikuqman sumaq sonqota hina borregokunata apachinku.

²Chaykamataq Moab warmikunaqa q'esanmanta mancharichisqa ayqeq pichitanka hina Arnón mayu pasanapi mana maymanpas puririyta atinkuchu.

³Judá runakunatan ninku: Ama hinachu kay, yuyaychawayku, hark'aykuwanaykikupaq yuyaykuychis. Kuskan p'unchaypi qaqa llanthu hina llanthuykichiswan samarichiwayku. Ayqekuqkunatapas pakaykuychis, paykunataqa amapuni hukman hap'iykachiychischu.

⁴Hinalla pakakuchunku ayqekuq Moab runakuna, muchuchiqmanta paykunata pakaykuychis, nispanku. Ñaq'arichiqqa tukukapunqan, payqa manañan thuninqañachu, sarunchakuqqa suyumantan chinkaripunqa,

⁵hinamantan Davidpa mirayninmanta huk kamachikuq paqarinqa, paymi khuyapayaspa hunt'aq kaspa kamachishallanqa. Juzgaspanqa chaninchaytapunin ruwanqa, usqhayllataqmi cheqaq-kaytapas ruwanqa.

⁶Judá runakunan ninku: Moabpa sinchi anchaykachaynintaqa yachanchismi, paykunaqa kanku pay-payman tukuq, uma hoqariq, hatunchakuq ima alabakusqankupas yanqa thawtiyllan.

⁷Chayrayku llapan Moab runakunaqa suyunkumanta waqachunku, Kir-hareset llaqtapi sumaq mikhuna mikhusqankuta yuyarispa khuyayta waqachunku, nispa.

⁸Hesbonpi chakrakunan ch'akipun, Sibnapi uvas chakrakunan naq'epun. K'allmankunaqa Jazerkaman chayarqan, ch'inneqmanmi mast'arikurqan, mama qochakamataq ayparqanpas, ichaqa suyukunaq kamachikuqninkunan aswan sumaq chakratapas lliwta chaqorqan.

⁹Chaymi Jazer runakunawan kuska Sibnapi uvas chakrakunamanta waqani, Hesbonmantawan Elealemantawanmi unuy parata waqani, cosechamantapas poqosqa ruru hoqariymantapas manañan kusikapunkuñachu, aswanpas awqankuq chaqosqan hawan ch'inyapunku.

¹⁰Chakrakunapi kusikuypas q'ochukuypas tukukapunmi, uvas chakrakunapipas manan pipas kusikuymanta qaparinchu, manan pipas takinchu, manan uvastapas vinota ruwanankupaq sarunkuchu, Señor Diosmi chay qapariyninkuta p'uchukachipun.

¹¹Chaymi Moabmanta Kir-haresetmantawan llakiy-llaki tocaq arpa hinaraq sonqoy waqashan.

¹²Moab runakunaqa orqopi yupaychana cheqasta rispapas sayk'uyllatan tarinku, yupaychana wasita mañakuq haykunku chaypas, yanqapaqmi.

¹³Unayñan Señor Diosqa Moab contra chhaynata rimasqa,

¹⁴kunantaqmi payqa nin: Moabpa hatun-kayninqa kinsa wata hunt'apin p'uchukapunqa, sinchi askha runayoqña kashan chaypas, iskay kinsa pisi kallpa runakunallan qhepanqaku, nispa.