Read Quechua Cuzco Bible 1988 ISAÍAS 17 Bible Online

ISAÍAS 17 - Quechua Cuzco Bible 1988 bible

ISAÍAS 17

¹Damasco llaqta contra willakuy. Tukuy atiyniyoq Señor Diosmi nin: Damascoqa manañan llaqtachu kanqa, k'urpa monton hinan kapunqa.

²Siria suyu llaqtakunaqa wiñaypaq purunyachisqan kapunqa, uywa michinamanmi tukupunqa, mana piqpa mancharichisqanmi uywakunaqa mikhunqa.

³Israel suyuq pukara llaqtankunaqa thunisqan kanqa, Damasco llaqtaq atiyninqa p'uchukapunqan, Siria suyupi qhapaq runakunaqa Israel runakuna hinallataqmi p'enqaypi rikukunqaku, nispa.

⁴Israelpa Diosnin Señormi nin: Chay p'unchaymi Israelpa mentasqa-kayninqa pisiyarqapunqa, qhapaq-kayninpas tukurqakapunqa.

⁵Imaynan ichhuqqa trigota ichhun, makinwan trigota hap'ispataq ch'usaqta chakrata saqen, chay hina saqesqan Israelqa kanqa,

⁶mana chaytaq Refaim wayq'opi qhellapasqa chakra hina kanqa. Mana chaytaq olivo sach'a chhaphchisqa hina kanqa, aswan alto k'allmapin iskay kinsa rurukunallaña qhepanqa, rurusapa k'allmapitaq tawa phisqa rurukunallaña qhepanqa, chay hinallañan Israel runakunaqa qhepanqa, nispa.

⁷Chay p'unchaymi runaqa yanapayta maskhaspa Kamaqenman kutirinqa, Israelpa Ch'uya Diosninman asuykunqa.

⁸Runakunaq ruwasqan altarkunamanpas manan rinqakuñachu, Asera nisqa diosaq rikch'aynintapas manan yupaychanqakuñachu, altar ruwasqankupipas manan inciensota q'osñichinqakuñachu.

⁹Chay p'unchaymi perqawan allin hark'achisqa llaqtankuna wikch'usqa kanqa, imaynan Hiv runakunaq Amor runakunaq llaqtankupas Israelta manchakuspa wikch'usqa karqan chay hina, lliwmi purun-purun kanqa.

¹⁰Israel llaqta, Qespichiqniyki Diostan qonqapurqanki, manan yuyarirqankichu payqa pakakunayki Qaqa kasqanta. Wak'a dioskunata yupaychanaykipaqmi sumaq huertakunata llank'anki, wak llaqta diospa sutinpin ruruykikunata tarpunki.

¹¹Hinaña tarpusqayki p'unchay allinta llank'anki, hinaspa chay muhuta phutuchichinki chaypas, mana hampiy atina millay onqoy hamuqtinmi lliw chakrayki chiriyapunqa.

¹²¡Achachaw! ¡Askha llaqtakunan kunununumun! ¡Mama qocha phoqchiqeq hinan qaparimun! ¡Achachaw! ¡Suyukunan qaparin sinchi askha unuq t'oqyasqanta hina!

¹³Chaywanpas Dios anyaqtinmi, usqhaylla karuman ayqenku, imaynan orqokunapi ichhuta wayra apan ahinata, tutuka wayra ñut'u hallp'ata apan ahinata.

¹⁴Paykunaqa ch'isinmi manchanata q'aqchanku, manaraq illarimuytataq ichaqa ch'usaqyarqapunku. Llat'anaqninchiskunaqa chay hinallapunin kashanku, suwaqninchiskunaqa chay hinapin rikukunku.