Read Quechua Cuzco Bible 1988 ISAÍAS 19 Bible Online

ISAÍAS 19 - Quechua Cuzco Bible 1988 bible

ISAÍAS 19

¹Egipto suyu contra willakuy. ¡Qhawariychis! Señor Diosmi Egiptoman hamushan, phawaq phuyu patapin usqhaylla phawamushan. Paypa qayllanpin Egipto idolokunaqa khatatatan, Egipto runakunapas pisi kallpayanqakun.

²Tukuy-atiyniyoq Señor Diosmi nin: Egipto runakunatan awqanachisaq, hinan paykunapura maqanakunqaku, amigopas amigo contra, llaqtapas llaqta contra, suyupas suyu contra.

³Umankutan muyurichisaq, yuyaykusqankutan waqllichisaq. Chaymi idolokunata layqakunata ima tapukunqaku, ayakunaq espiritun rimachiqmanpas watuqkunamanpas rillanqakutaqmi.

⁴Paykunataqa yana alma kamachikuqmanmi hap'iykachisaq, paykunataqa sinchi millay reymi kamachinqa, nispa.

⁵Chay hinaqa Nilo mayu unupas tukukapunqan, mayu unupas pasaqtan ch'akipunqa,

⁶yarqhankunapas millaytan asnarinqa. Palqankunapas ch'akinankaman pisiyapunqa, soqoskunapas t'otorakunapas lliwmi ch'akipunqa.

⁷Nilo mayu cantopi kashaq llach'ukunapas naq'epunqa, mayu patapi tarpusqakunapas lliwmi ch'akipunqa, chaykunatan wayra apapunqa.

⁸Nilo mayupi challwaqkunan khuyayta waqanqaku, anzuelowan challwaqkunan llakikunqaku, llikankuta unuman wikch'uykuqkunan umphuyanqaku.

⁹linopi llank'aqkunapas pisi kallpayanqakun, sumaq lino awaqkunapas sinchitan umphuyanqaku,

¹⁰llapa awqakunapas sinchi musphasqan kanqaku, llapan llank'apakuqkunapas hawapi ukhupi sonqoyoqmi kanqaku.

¹¹Zoán llaqta umallikuna, sinchi mana yuyayniyoqmi kankichis, qankunaqa rey Faraonpa yachaysapa yuyaychaqninmi kankichis, ichaqa loqhe hinan yuyaychankichis. ¿Imaynataq rey Faraontaqa ninkichis: Ñoqaykuqa yachaysapakunan kayku, ñawpa reykunaq mirayninmi kayku, nispa?

¹²Yaw Faraón, ¿maytaq yachaysapa runaykikunari? Paykuna willasunkimanqá Tukuy-atiyniyoq Señor Diospa Egipto contra yuyaykusqanta.

¹³Zoán llaqta umallikunaqa sinchi mana yuyayniyoqmi kanku, Memfis llaqta umallikunapas q'otuchikurqankun, ayllukunaq umallinkunapas runankunatan pantachirqan.

¹⁴Señor Diosmi paykunaq yuyayninta tutayachirqan, chaymi paykunaqa tukuy imaymanapi Egipto runakunata pantachinku, hinan Egipto runakunaqa thampiykachanku imaynan machasqa runa lanzasqanpi thampiykachan hinata.

¹⁵Egiptopiqa manan pipas ima ruwaytapas atinchu, hatunkaqpas huch'uykaqpas, wakchapas qhapaqpas.

¹⁶Chay p'unchaymi Egipto runakunaqa manchali warmi hina kanqaku. Sinchitan mancharikunqaku llaksakunqaku paykunata muchuchinanpaq Tukuy-atiyniyoq Señor Dios makinta haywarisqanrayku.

¹⁷Judá suyu runakunapas sinchitan paykunatapas manchachinqa. Egipto runakunan sapankanku Judá suyuq sutinta uyarirqospallaraq pasaqta llaksakunqaku, Tukuy-atiyniyoq Señor Diospa paykuna contra yuyaykusqanta reparaspa.

¹⁸Chay tiempopin Egipto suyupi phisqa llaqta Hebreo simi rimaqkuna kanqa, paykunan Tukuy-atiyniyoq Señor Diosman hunt'aq kanankupaq juranqaku. Chay llaqtakunaq hukkaqninpa sutinmi Inti Llaqta nisqa kanqa.

¹⁹Chay p'unchaymi Egipto suyu chawpipi Señor Dios yupaychanapaq huk altar kanqa, suyu qorpa qayllapitaq Señor Diospa sutinpi huk rumi saywa kanqa.

²⁰Chaymi kanqa huk señal, Egipto suyupi Tukuy-atiyniyoq Señor Diosta yuyarinapaq. Hinamantan sarunchasqa kaspa Señor Diosman waqyakuqtinku payqa uyarinqa, hinaspa huk qespichiqta kachanqa paykunata amachananpaq qespichinanpaqwan.

²¹Ahinapin Señor Diosqa Egipto runakunaman reqsichikunqa, paykunataq Señor Diosta reqsispa yupaychanqaku, hinaspa sacrificiokunata ruru ofrendakunata ima haywanqaku. Señor Diosta kasunankupaqmi prometekunqaku, hinaspa hunt'anqaku.

²²Señor Diosmi Egipto runakunata muchuchispa k'irinqa, chaymantataq ichaqa qhaliyachinqa. Señor Diosmanmi kutirikunqaku, hinan paykunata khuyapayaspa qhaliyachinqa.

²³Chay tiempopin huk hatun ñan kanqa Egiptomanta Asiriakama, chaymi Asiria runakunaqa Egiptoman rinqaku, Egipto runakunapas Asiriaman rinqaku. Egipto runakunawan Asiria runakunawanqa kuskan Señor Diosta yupaychanqaku.

²⁴Israel suyuqa Egiptowanpas Asiriawanpas kuska wakin kanqaku, kay pachapipas huk saminchan kanqaku.

²⁵Tukuy-atiyniyoq Señor Diosmi paykunata saminchanqa: Saminchanin Egipto llaqtayta, kamasqay Asiriata, hinallataq akllakusqa llaqtay Israeltapas, nispa.