Read Quechua Cuzco Bible 1988 ISAÍAS 20 Bible Online

ISAÍAS 20 - Quechua Cuzco Bible 1988 bible

ISAÍAS 20

¹Asiria suyu rey Sargonmi Asdod llaqtaman qollana kamachikuqninta kachamurqan, paytaq llaqtaman phawaykuspa hap'ikapurqan.

²Chaypachan Señor Diosqa Amozpa churin Isaiasta nirqan: Ch'utikuy kutinshu p'achaykita usut'aykitawan, nispa. Hinan p'achanta usut'antapas ch'utikuspa q'alalla purirqan.

³Chaymantataq Señor Diosqa nirqan: Kamachiy Isaiasmi kinsa watantin mana p'achayoq q'ala chaki purirqan, chaymi willakun Egipto runakunaqpas Etiopía runakunaqpas imaynachus qhepaman kananta.

⁴Chay hinatan Asiria suyu reyqa Egipto suyu runata Etiopía suyu runatawan apapunqa, machutapas waynatapas q'alallata p'enqaypas-p'enqayta, chay hinapin Egipto suyu runakuna p'enqakunqaku.

⁵Etiopía suyuman hap'ipakuq runakunan, Egipto suyuq yanapasqan kaspa alabakuq runakunan, p'enqakunqaku llaksakunqaku.

⁶Chaypachan mama qocha patapi llapa tiyaqkuna ninqaku: Ñoqanchisqa ayqekurqanchis Egipto suyuman Etiopía suyumanwan Asiria reymanta qespichispa yanapawananchispaqmi, kunantaq ichaqa qhawariychis imapin rikukushanku. Ñoqanchisri, ¿imaynatañataq qespikusunchis? nispa.