Read Quechua Cuzco Bible 1988 ISAÍAS 21 Bible Online

ISAÍAS 21 - Quechua Cuzco Bible 1988 bible

ISAÍAS 21

¹Qocha pataq ch'inneqninmanta willakuy: Uraymanta t'uyurmi wayra phawamuq hinan chayamushan, manchay-manchay suyumantan awqakuna hamushan.

²Diosmi rikuchiwarqan sinchi llaksakuy rikhuriyta: Q'otukuqpa runamasinta hap'iykachipushasqanta, llat'anaqpa qechusqanta apamushasqanta. Nirqantaq: ¡Elam suyu runakuna, chay runakuna contra phawaykuychis! ¡Media suyu runakuna, llaqtankuta muyuykuychis! Babilonia suyu runakunan hukkunata llakichirqan, chay llakikuytan p'uchukachisaq, nispa.

³Chayta rikuspan cuerpoyraq nanaymanta khatatatashan, wachakuq warmi hinaraqmi q'ewiykukushani. Chaykuna uyarisqaywanmi llaksasqapuni kashani, chaykuna rikusqaywanmi umayraq muyurishawan.

⁴Yuyayniyraqmi chinkarishawan, manchakuymanta khatatatashallaniñan, samaykunaypaq suyarayasqay ch'isin aswan llaksakuyman tukurqapun.

⁵Mesaqa churasqañan, chusipas tiyanapaq mast'asqañan, mikhushankuñan, ukyashankuñan. Soldado kamachiqkunatan nishankuña: ¡Sayariychis! ¡Escudoykichista wakichikuychis! nispa.

⁶Señor Diosmi niwan: Phaway, qhawaqta churamuy, ima rikusqantapas willakamunanpaq.

⁷Iskay caballoq chutasqan carretata rikuspapas runakunata asnopiña camellopiña sillaykusqata rikuspapas, makillapuni qhawachun, nispa.

⁸Chaymi qhawaq churasqaqa waqyakamurqan: Wiraqocháy, kasqallanpin kashani, ch'isiyaqmi sayashani, tutapas parin-parinta qhawaspallan kashani.

⁹¡Qhawariy! Kaytan hamushan huk runa iskay caballoq chutasqan carretapi. Paymi waqyamushawan: ¡Urmaykapunmi! ¡Urmaykapunmi Babilonia llaqtaqa! Llapanmi diosninkunapas pampapi p'aki-p'aki wikch'urayashan, nispan, nispa.

¹⁰Ñoqataq nirqani: Llaqtalláy, trigo hina erasqan kanki, ñoqan ichaqa willashaykichis Israelpa Tukuy-atiyniyoq Diosninpa niwasqanta, nispa.

¹¹Edom suyu contra willakuy. Seirmantan waqyamuwan: Llaqta qhawaq runa, ¿ñachu paqarimunqaña? llaqta qhawaq runa, ¿ñachu illarimunqaña? nispa.

¹²Ñoqataq nirqani: Paqarimushanñan, ichaqa tutayarqollanqataqmi. Tapukuyta munaspaqa tapukamullay, huktawanpas kutimullay, nispa.

¹³Arabia suyumanta willakuy: Dedán llaqta runakuna, camellokunapi astakuspaykichismi Arabia ch'inneq cheqaskunapi puñunkichis,

¹⁴unuta apamuychis ch'akichikuqkunaman qonaykichispaq. Tema llaqtapi tiyaqkuna, ayqekuqkunaman mikhunata haywariychis.

¹⁵Paykunaqa ayqekushanku espadaq ñawch'inmantan, p'eqtaq wach'inanmantan, llaksakuy awqa-tinkuymantawan, nispa.

¹⁶Señor Diosmi niwan: Huk wata ukhullapin Kidar runaq uma hoqariq kayninqa tukurqakapunqa.

¹⁷Kidar runakunaq aswan allinnin qharikunaqa wach'iqkunan, chaykunamantapas pisillañan qhepaykapunqa. Ñoqa Israelpa Señor Diosninmi chayta nini, nispa.