Read Quechua Cuzco Bible 1988 ISAÍAS 27 Bible Online

ISAÍAS 27 - Quechua Cuzco Bible 1988 bible

ISAÍAS 27

¹Chay p'unchaypin Señor Diosqa manchana atiyniyoq hatun espadanwan muchuchinqa Leviatán nisqa suchuspa ayqekuq mach'aqwayta, Leviatán nisqa wank'irayaq mach'aqwayta, mama qochapi manchana hatuchaq animaltapas wañuchinqan.

²Chay p'unchaymi Señor Diosqa ninqa: Sumaq munay uvas chakramanta takiychis.

³Ñoqa Señor Diosmi qhawaqninqa kani, sapa rato hinan qarpapayani, tuta p'unchaymi qhawani, mana imanasqapas kananpaq.

⁴Uvas chakrawanqa manan phiñasqachu kani, khiskanña qoranña kaqtinpas, chaqoqmi lloqsiyman, hukpaqkaman ruphaykuyman.

⁵Ñoqaq qhawanayta munaspaqa llaqtaypa awqankuna ñoqawan allipunachun, arí, ñoqawanpuni allinpi kawsachun, nispa.

⁶Qhepamanmi Jacobpa miraynin saphirinqa, qhepamanmi Israel runakunaqa ch'ikchimuspa t'ikarinqa, pachantinmanmi rururispa hunt'aykunqa.

⁷Diosqa Israeltaqa manan muchuchirqan k'iriqninkunata muchuchirqan hinatachu, Israeltaqa manan wañuchirqan sipiqninkunata wañuchirqan hinatachu.

⁸Diosqa llaqtanta muchuchirqan wak karu suyuman apachispan, llaksakuy samayninwanmi phukurparirqan inti lloqsiy lado rupha wayra hinaraq.

⁹Wak'a altarninkunatan ñut'unqa kutasqa isku rumita hina. Asera nisqa diosaq rikch'aynin yupaychana k'ullutan ch'usaqyachinqa, incienso q'osñichina altarkunatapas lliwtan thuninqa, chaykunawanmi Jacobpa mirayninpa huchan pampachasqa kanqa, llapan huchankunapas pichasqan kapunqa.

¹⁰Allin perqayoq llaqtan raqay-raqay qhepapun wikch'usqa wasi hina, mana runayoq purun hina. Uywa michinan chayqa kapun, chaypin uywakuna puñuran, mallki raphikunatan mikhun.

¹¹Mallkiq k'allmanqa ch'akispan p'akikun, warmikunataq chayta huñuspa kanaykunku. Kay llaqtaqa mana k'atay yuyayniyoqmi, chayraykun Kamaqninpas paytaqa mana llakipayanchu, manallataq sumaqtapaschu qhawarin.

¹²Yaw Israel runakuna, chay p'unchaymi Señor Diosqa Eufrates mayumanta Egipto qorpapi mayukama cebada saruchiq hinaraq saruchinqa, qankunataqmi ruru hina ch'ulla-ch'ullamanta akllasqa kankichis.

¹³Chay p'unchaymi hatun putututa tocanqaku, hinan Asiria suyupi chinkasqakunapas Egipto suyuman apasqakunapas Señor Dios yupaychaq kutimpunqaku Jerusalenpi Ch'uya Orqoman.