Read Quechua Cuzco Bible 1988 ISAÍAS 28 Bible Online

ISAÍAS 28 - Quechua Cuzco Bible 1988 bible

ISAÍAS 28

¹¡Ay Samaria llaqtamanta! Chay llaqtaqa Israel suyupi machaqkunaq uma hoqarinan llaqtan, imaynan chay machaqkunaq umanpi t'ika guirnalda t'awipushan, chay hinan Samariaq sumaq-kayninpas naq'epushan. ¡Ay, sumaq ruruchiq wayq'o patapi kaq llaqtamanta! ¡Ay, machasqa tanqarayaqkunaq uma hoqarinan llaqtamanta!

²Señor Diosqa huk kallpasapa atiyniyoq runatan wakichishan, paymi chikchi t'oqyay hina, manchay tutuka wayra hina, manchay unu para hina, manchay lloqlla hina kallpanwan Samariata pampaman wikch'unqa,

³chakinwantaq t'ustunqa Israel suyupi machaqkunaq uma hoqarinan llaqtata.

⁴Hinan chay sumaq ruruchiq wayq'o patapi kaq llaqtaqa chay t'awipushaq t'ika guirnalda hina llaqtaqa miska rikhuriq higos hina kanqa, pillapas rikurqospaqa makinwanmi p'itispa mikhunqa.

⁵Chay p'unchaypin Tukuy-atiyniyoq Señor Diosqa llaqtanmanta qhepaqkunapaq umapi k'anchariq corona hina kanqa, sumaqllaña t'ika guirnalda hina kanqa.

⁶Juzganapi juezkunamanqa Señor Diospunin chanin-kayta yachachinqa, llaqta punkupi hark'apakuq soldadomanpas kallpatan qonqa.

⁷Sacerdotekunapas profetakunapas vinowan machasqan thampiykachashanku, tragowan machaspa yuyay chinkasqan kashanku, vinowanmi t'ili ukyasqa kashanku, rikhuriypi Dios rimapayaqtinpas machasqan thampiykachashanku, runakuna chaninchanankutaqa pantapunkun.

⁸Llapa mesan millay qhelli kashan aqtuspa qhellichasqankuwan, lliwpunin qhellichasqanku kashan.

⁹Ñoqamantan paykuna ninku: ¿Pitataq payri yachachinman? ¿Pimantaq uyarisqan simita entiendechinman? ¿Chayllaraq hanuk'asqa wawamanchu? ¿Chayllaraq p'itisqa wawamanchu?

¹⁰Payqa chayllaraq rimay yachaq wawa hinan riman, wichayta uraytawan, chaninta mana chanintawan, nispanku.

¹¹Chayraykun Diosqa kay llaqtaman rimanqa wak llaqtayoq runakunawan mana yachasqanku rimaypi.

¹²Ñawpaqtañan payqa kay llaqtaman nirqan: Kunanqa samaykuychis, sayk'usqatapas samarachiychis, samarakuychis kunanqa, nispa. Manataq paykunaqa uyariyta munarqankuchu.

¹³Chayraykun Señor Diospa rimapayasqanqa chayllaraq rimay yachaq wawaq hina paykunapaq kanqa, wichayta uraytawan, chaninta mana chanintawan rimasqa hinan kanqa. Chay hinapin purishaspa wasanpamanta urmanqa, k'irisqa urmaykuspan toqllaq hap'isqan kanqa.

¹⁴Yaw k'amikuq runakuna, Jerusalén llaqta kamachiqkuna, uyariychispuni Señor Diospa siminta.

¹⁵Qankunan alabakunkichis: Wañuywanmi allinta rimanakuyku, Ukhu-pachawanmi allinta rimanakuyku, manchakuy wañuy chayamuspa mana taripawanankupaq. Llullakuspakama q'otuspakama allillanmi kasaqku, nispa.

¹⁶Chayraykun Qollana Señor Diosqa nin: Sionpin allin takyasqa teqsita churashani, chay patamantaqmi esquina hap'iq allin ch'ila rumita churashani, chay rumipin qelqasqa kashan: Pipas iñiqqa mana kuyuriqmi sayanqa, niq.

¹⁷Chay perqaypin chanin-kayqa plomada hina kanqa, cheqaq-kaytaq nivel hina kanqa. Llullakuspakama allillanmi kasun, nisqaykichisqa chikchiq thunisqanmi kanqa, pakakunaykichis cheqastapas llimp'aq unun apanqa.

¹⁸Wañuywan rimanakusqaykichispas p'akisqan kanqa, Ukhu-pachawan rimanakusqaykichispas yanqan kapunqa, manchakuy wañuy chayamuspaqa pasaqtan ñit'isunkichis qankunataqa.

¹⁹Sapa kuti hamuspanmi apasunkichispuni, paqarmanta paqarmi sapa p'unchay, sapa tuta phawamuspa pichasunkichis, uyarispallaraqmi khatatatankichis.

²⁰Imaynan rimaypi ninku hina mana hayt'arikunayoq huch'uy puñuna pata, mana p'istuykukunayoq huch'uy qatana, nispa.

²¹Perazim orqopi ruwasqanta hinan Señor Diosqa ruwanqa, Gabaón wayq'opi phiñakusqanta hinan Señor Diosqa phiñakunqa, huk hina mana reqsisqa ruwaytan ruwanqa, musphana mana reqsisqa ruwaytan ruwanqa.

²²Kunanqa ama asikuychischu, cadenaykichis ama mat'ikunanpaq Tukuy-atiyniyoq Señor Diosmi niwan: Yuyaykuniñan suyuntinta thuninaypaq, nispa.

²³Makilla ruwasqaykunata uyariychis, allintapuni simiykunata uyariychis.

²⁴Chakra llank'aq t'akananpaqqa manan sapa p'unchaychu yapuspalla kan, manan sapa p'unchaychu chakmasqallapas k'upasqallapas kan.

²⁵Aswanmi pampata kuskachaspaqa t'akan yana cominotapas, oqe cominotapas, chaymantapas t'akallantaq trigota wachu-wachuta, cebadatapas huk cheqaspi t'akan centenowan muyuchisqata.

²⁶Diosmi chakra llank'aqman yachachin, imaynachus allin llank'ana kasqanta.

²⁷Yana cominoqa manan fierro kiruyoq saruchinawanchu saruchikun, oqe cominopas manataq saruchina carretawanchu saruchikun, aswanpas yana cominoqa ñañu k'aspillawanmi waqtakun, oqe cominopas k'aspillawanmi p'anakun.

²⁸Trigollatan saruchikun ichaqa manan ñut'utachu, carreta saruqtinpas caballoq chakinqa manan ch'eqtanchu.

²⁹Kay yachaykunataqa Tukuy-atiyniyoq Señor Diosmi qon, payqa yuyaychan mana pantanallatañan, yuyaykusqankunaqa allinkamapunin lloqsin.