Read Quechua Cuzco Bible 1988 ISAÍAS 3 Bible Online

ISAÍAS 3 - Quechua Cuzco Bible 1988 bible

ISAÍAS 3

¹Tukuy-atiyniyoq Señor Diosmi Judá suyuqpas Jerusalén llaqtaqpas tukuy imaymana necesitasqanta pisiyachinqa, hinallataq lliw t'antatapas unutapas qechupunqa.

²Ch'usaqyachillanqataqmi allin qharitapas, awqa-tinkuqtapas, jueztapas, profetatapas, watuqtapas, kurak runatapas,

³capitantapas, respetana qharitapas, yuyaychaqtapas, tukuy layqatapas.

⁴Hinaspa waynachakunallata umallinkupaq churanqa, loqhe waynakunan kamachinqa.

⁵Runapurapas wasimasintinpas sarunchanakunqaku, waynakunapas kurak runakuna contran sayarinqaku, millay runakunapas allin runakuna contran sayarinqaku.

⁶Huk runan wawqenta taytankuq wasinpi hap'ispa ninqa: Qanpaqa llaqollaykipas kashanmá, umalliyku kapuy, kay thunisqa llaqtapi kamachikuy, nispa.

⁷Hinan chay runaqa wawqenman kutichinqa: Manan ñoqaqa chayta ruwaymanchu, wasiypiqa manan kanchu mikhunaypas p'achaypas, ama llaqta kamachiqtaqa churawaychu, nispa.

⁸Jerusalenqa misk'akunmi, Judá suyuqa urmapunmi, rimasqankupas ruwasqankupas Señor Dios contran, Atiyniyoq Diostan uyanpi k'aminku.

⁹Sayapakuyninkun paykunataqa ch'atan, manan huchankutaqa pakankuchu, Sodoma llaqta hinan llapa runaman sut'inchanku. ¡Ay, paykunamanta! Paykuna kikinkuq muchunankutan wakichikunku.

¹⁰Chanin runakunata niychis: Qankunaqa allillanpunin kankichis, nispa, paykunaqa ruwasqankuq ruruntan kusisqa chaskinqaku.

¹¹¡Ay, mana chanin runamanta! Paypaqqa manan allinchu kanqa, payqa imaynatachus runamasinta muchuchirqan chay hinallatataqmi muchunqa.

¹²Qolqe mañaqkunan llaqtayta sarunchanku, qolqeq uñan sik'iqkunan llaqtayta k'umuchinku. Llaqtalláy, kamachikuqniykikunaqa q'otusunkin, q'ewisqa ñantan pusasunkipas.

¹³Señor Diosqa juzganapiñan kashan, llaqtanta t'aqtananpaqmi sayarinña.

¹⁴Señor Diosmi juzgayta qallarispa llaqta umallikunata, kurak runakunatawan nin: Qankunan uvas chakrayta chaqonkichis, wakchakunamanta suwakuspan wasiykichispi waqaychankichis.

¹⁵¿Pitaq qankunari kankichis llaqtayta sarunchanaykichispaq, wakchakunatapas alqochanaykichispaq? Ñoqa Tukuy-atiyniyoq Señor Diosmi chayta nini, nispa.

¹⁶Señor Diosqa nillantaqmi: Jerusalén llaqta warmikunan sinchita hatunchakunku, umankuta hoqarispan purinku, q'ewiykachakuspan purinku, k'iskillapi thaskispan purinku, chakinku sumaqchakusqankutan chhaqllaqechinku.

¹⁷Chaymi paykunata uma qarachiwan muchuchisaq, p'aqla umatataq purichisaq, nispa.

¹⁸Chay p'unchaymi Señor Diosqa tukuy k'achanchakuyninkuta qechunqa: chakinku sumaqchanankuta, sumaqchasqa uma watanankuta, kunka walqanankuta,

¹⁹aretenkuta, maki walqanankuta, uma watanankuta,

²⁰monterankuta, chakipaq cadenachankuta, chumpinkuta, q'apaq hawina pomochankuta, lloq'ekunanku q'aytunkuta,

²¹sortijankuta, senqa siwinkuta,

²²sumaq p'achankuta, phullunkuta, llikllankuta, ch'uspankuta,

²³espejonkuta, sumaq lino p'achankuta, uma k'uyunankuta, chalinankuta ima.

²⁴Sumaq q'apaypa rantinpiqa asnaymi kanqa, chumpiq rantinpitaq waskha kanqa, sumaq ñaqch'akuypa rantinpitaq p'aqla uma, sumaq p'achakunaq rantinpitaq kutinshu p'acha, sumaq rikch'ayniyoq-kaypa rantinpitaq fierro pariwan marcay.

²⁵Allin qharikunapas awqa-tinkuypin wañunqaku, awqa-tinkuqkunapas maqanakuypin wañunqaku.

²⁶Jerusalén llaqtaqa waqaykunqan, yana p'achawanmi churakunqa, wikch'usqa kaspanmi pampapi tiyaykunqa.