Read Quechua Cuzco Bible 1988 ISAÍAS 36 Bible Online

ISAÍAS 36 - Quechua Cuzco Bible 1988 bible

ISAÍAS 36

¹Chunka kinsayoq wata kurakña Ezekías rey kashaqtinmi, Asiria suyu rey Senakeribqa Judá suyupi llapan allin perqasqa llaqtakunata phawaykuspa kaqnichakurqan.

²Lakismantapachan Senakeribqa Jerusalenpi kashaq rey Ezekiasman kachamurqan huk qollana oficialninta askha soldadokunatawan. Hinan Jerusalenpi huñukurqanku Hanaq P'uytu nisqamanta lloqsiq yarqha qayllapi, T'aqsaqkunaq Hallp'an nisqaman rina ñan patapi.

³Chaymanmi reypa mayordomon Hilkiaspa churin Eliakim, qelqaqnin Sebna, qelqa waqaychaq Asafpa churin Joapiwan tariparqanku.

⁴Hinan Asiria suyu oficialqa paykunata nirqan: —Rey Ezekiasman willamuychis: Asiria suyu ancha hatun reymi nin: ¿Imamantaq qanqa hap'ipakushanki?

⁵Qanqa ninkin: Maqanakuypaq allin wakichisqan kashani, kanmi askha soldadoypas tupapakunaypaq, nispayki. Chayqa yanqa rimayllan, ¿pimantaq qanri hap'ipakushanki, ñoqa contra sayarispayki?

⁶Egipto suyumanmi hap'ipakushanki, riki. Qhawariy, chay hap'ipakusqayki suyuqa ch'eqtasqa soqos hinan, pipas chayman tawnaykukuqtaqa makintan t'urpuspa patamanraq lloqsin. Chay hinan Egipto rey Faraonqa llapan payman hap'ipakuqkunapaq.

⁷Icha niwankichispaschá: Ñoqaykuqa Apu Señor Diosniykumanmi hap'ipakuyku, nispaykichis. Qhawariychis, ¿manachu Ezekiasqa Diosniykichis yupaychana cheqaskunatapas altarkunatapas thunipurqan? ¿Manachu Judá runakunata Jerusalén runakunatapas kamachirqan: Jerusalén llaqta altarllapin yupaychankichis, nispa? nispan.

⁸Chay hinaqa Asiria suyu rey wiraqochaymi Ezekiasta nin: Iskay waranqa caballokunata qoykiman chaypas, ¿akis mana iskay waranqa sillakuqkunata churawaqchu?

⁹Chayri, ¿imaynataq qanqa atipawaq huk oficialniyta mana kasuyllaña kashaqtinpas? ¡Qanqa Egiptomanta carretakunata caballería soldadokunallatan qhawarayashanki!

¹⁰Señor Dios kachamuwaqtinmi kay suyu thuniqqa hamuni, mana chayqa manachá hamuymanchu. Paymi kamachiwarqan phawaykamunaypaqpas thuninaypaqpas, nispan, nispa.

¹¹Hinan Eliakimqa, Sebnapiwan Joapiwan Asiria suyu oficialta nirqanku: —Valekuykikun Arameo rimaypi niwanaykikupaq, yachaykun chay rimaytaqa. Ama Hebreo rimaypichu niwayku, perqa patapi kashaq runakunan uyarimushanku, nispa.

¹²Chaymi Asiria suyu oficialqa nirqan: —Wiraqochayqa manan kachamuwarqan reyniykichisman qankunamanwan willanallaypaqchu, aswanpas llaqta muyuriq perqa patapi runakunamanwanmi. Qankunapas paykunapas llapaykichismi hatun hisp'ayniykichista mikhunaykichispaq, unu hisp'ayniykichista ukyanaykichispaqwan nisqaña kashankichis, nispa.

¹³Hinaspan sayaykuspa oficialqa kunkayoqta Hebreo rimaypi qaparirqan: —Uyariychis Asiria suyuq hatu-hatun reyninpa nisqanta:

¹⁴Ama Ezekiaswanqa q'otuchikuychischu, payqa manan qespichisunkichismanchu.

¹⁵Ezekiaschus Señor Diosman hap'ipakunaykichista munaspa nisunkichisman: Señor Diosmi qespichiwasunchis. Payqa manan munanqachu kay llaqtaq Asiria suyu reypa makinman urmaykunanta, nispa chayqa, ama q'otuchikuychischu, nispa.

¹⁶Chay hinaqa aman kasunkichischu. Asiria suyu reymi nin: Ñoqawan sumaqta rimanakuychis, hinaspa llaqtamanta lloqsimuychis. Sapankaykichistaq uvasniykichista higosniykichista mikhunkichis, p'uytuykichis unutapas ukyankichis.

¹⁷Chaymantataq kay hallp'aykichisman rikch'akuq wak suyuman apasqaykichis, chaypiqa kanmi trigopas, uvaspas, vinopas, t'antapas.

¹⁸Ezekiaschus: Señor Diosmi qespichiwasun, nisunkichis chayqa, ama paywan q'otuchikuychischu. ¿Mayqen suyuq diosnintaq Asiria suyu reymanta llaqtanta qespichiyta atirqan?

¹⁹¿Maytaqyá Hamatpa diosninkuna, Arfadpa diosninkunapas? ¿Maytaqyá Sefarvaimpa diosninkunapas? Samariatapas manan qespichiyta atirqanchu atiyniymantaqa.

²⁰¿Mayqen dioskunataq suyunta makiymanta qespichiyta atirqanku? ¿Imaraykun qankunaqa yuyankichis Jerusalenta Señor Diospa qespichinanta? nispan, nispa.

²¹Chaymi paykunaqa ch'inlla kakurqanku, mana imata rimarispa, reypa: Aman imaninkichispaschu, nispa kamachisqanrayku.

²²Chaymantataq reypa mayordomon Eliakimpas, qelqaq Sebnapas, qelqa waqaychaq Joapas llakikuymanta p'achankuta llik'ikuspa Ezekiasman rirqanku, hinaspan Asiria suyu oficialpa nisqanta payman willarqanku.