Read Quechua Cuzco Bible 1988 ISAÍAS 37 Bible Online

ISAÍAS 37 - Quechua Cuzco Bible 1988 bible

ISAÍAS 37

¹Chayta uyarispataq rey Ezekiasqa llakikuymanta p'achanta llik'ikurqan, hinaspan luto p'achawan churakuspan Dios yupaychana wasita rirqan.

²Chaymantataq mayordomon Eliakimta, qelqaqnin Sebnata, kurak sacerdotekunatawan luto p'achayoqtakama Amozpa churin profeta Isaiasman kacharqan.

³Hinan paykunaqa nirqanku: —Rey Ezekiasmi nin: Kunanmi kashanchis phutikuypi, muchuchisqa, k'umuchisqa, wachakunan patapi mana k'atay kallpayoq warmi hina. Asiria suyu reymi qollana oficialninta kachamusqa kawsaq Diosta k'aminanpaq.

⁴May allinchá kanman Apu Señor Diosniyki chay rimasqanta uyarispa payta muchuchinman chayqa. Chay hinaqa, puchuq runakunapaq mañapuy, nispan, nispa.

⁵Ezekiaspa kachamusqankuna Isaiasman riqtinmi,

⁶Isaiasqa kutichirqan: —Rey Ezekiasman willamuychis: Señor Diosmi nin: Ama manchakuychu Asiria reypa oficialninkunaq k'amiwasqanmantaqa.

⁷Uyariy, ñoqan paypa sonqonta q'ewirichisaq, hinan huk willakuyta uyarispa suyunman kutipunqa, chaypitaqmi runaq sipisqan wañunqa, nispan, nispaykichis.

⁸Chaykamataq Asiria suyu qollana oficialqa rey Senakeribpa Lakis llaqtamanta ripusqanta yacharqospan, paypas Jerusalenmanta ripurqan, hinaspan reynintaqa Libna llaqtaman phawaykushaqta tarirqan.

⁹Chaypitaqmi Asiria suyu reyqa uyarirqan: Etiopía suyu rey Tirhakan contraykipi maqanakuq hamushan, nisqata. Hinan payqa huktawan Judá rey Ezekiasman willaqkunata kachamurqan:

¹⁰Qanpa hap'ipakusqayki Diosniykin qanta nisunki: Jerusalenqa manan Senakeribpa makinman urmaykunqachu, nispa, ichaqa ama paywanpas q'otuchikuychu.

¹¹Qanqa uyarirqankin imaynatachus Asiria reykunaq llapan suyukunata ch'usaqyachisqanta. ¿Chaychu qanpas qespikuwaq?

¹²Gozán llaqtata, Harán llaqtata, Resef llaqtata, Telasar hap'iypi tiyaq Bet-edén runakunatapas machulaykuna atipashaqtinqa, chay llaqtakunaq diosninkunaqa manan paykunata qespichirqanchu.

¹³¿Maytaqyá Hamat llaqtaq Arfad llaqtaq, Sefarvaim llaqtaq, Hena llaqtaq, Iva llaqtaqpas reyninkuna? nispa.

¹⁴Hinan Ezekiasqa willaqkunamanta cartata chaskispa leerqan. Chaymantataq Dios yupaychana wasiman rispa, Señor Diospa ñawpaqenpi cartata mast'aykuspa

¹⁵mañakurqan:

¹⁶Israelpa Diosnin Tukuy-atiyniyoq Señor, raphrayoqkuna patapi tiyaq, qan sapallaykin kanki teqsimuyuntinpa Diosnin, qanmi hanaq pachata kay pachatawan kamarqanki.

¹⁷Señor Diosníy, uyarimuway, qhawarimuway. Uyariy Senakeribpa llapan rimasqankunata, paymi kachamusqa qollana oficialninta qan kawsaq Diosta k'aminasuykipaq.

¹⁸Señor Diosníy, cheqaqtapunin Asiria suyu reyqa llapa suyukunata hallp'akunatawan purunyachirqan,

¹⁹diosninkunatapas ninaman kanaykurqan. Chaykunaqa manan cheqaq Dioschu karqan, aswanpas rumimanta kurkumanta runaq ruwasqallanmi, chayraykun thunisqa karqan.

²⁰Kunanqa, Apu Señor Diosnillayku, paypa atiyninmanta qespichiwayku, llapan teqsimuyuntin suyukuna qanllapuni Diosqa kasqaykita yachanankupaq, nispa.

²¹Chaymantataq Isaiasqa Ezekiasman willaqta kacharqan: Israelpa Diosnin Señormi nisunki: Ñoqan uyarini Asiria suyu rey Senakeribpa k'amiwasqan hawa mañakamuwasqaykita, nispa.

²²Chayraykun Asiria suyu reymanta Señor Diosqa nin: Sión llaqtan sipas hina asikuspa pisichasunki, Jerusalén llaqtaq ususinmi qan ayqeshaqtiyki senqanta wist'urichin.

²³¿Pitataq pisicharqankipas k'amirqankipas? ¿Pi contran hatunta rimarirqanki? ¿Pi contran hatunchakurqanki? ¡Ñoqa Israelpa Ch'uya Diosnin contran!

²⁴Willaqniykikunawanmi ñoqa Señor Diosta k'amichiwarqanki, nirqankitaq: Askhallaña maqanakuypaq carretaykunapin orqo patakunaman wicharqani, Libanoq aswan hatun orqonkunamanmi seqarqani, sinchi hatun cedro mallkinkunatan wit'umurqani, ancha sumaq pino sach'ankunatan kumpamurqani, aswan ukhu sach'a-sach'amanmi haykurqani, aswan allinnin sach'ankunamanmi haykurqani.

²⁵Wak suyukunapin p'uytuta hasp'irqani, chaymantan unuta ukyarqani. Chakiywan saruspan Egiptoq llapan mayunkunata ch'akichirqani, nispayki.

²⁶¿Manachu uyarirqanki? Ñawpaqtaraqmi ñoqaqa chay hina kananta unancharqani, unay watakunamantañan kaykunataqa yuyaykurqani, kunantaqmi hunt'ashani, chaymi qanqa allin perqasqa llaqtakunata thunirqanki, raqay-raqaymanpas tukuchirqanki.

²⁷Runankunan pisi kallpa kapunku, manchasqa p'enqachisqan kapunku, campopi q'achu hinan kapunku, qholla pasto hinan kapunku, wasi patapi wiñaq q'achu hinan kapunku, inti lloqsiy wayraq ruphasqantaqmi kapunku.

²⁸Yachanin tukuy purisqaykikunatapas tukuy ruwasqaykikunatapas, yachanin ñoqa contra sinchita phiñakusqaykitapas.

²⁹Phiña hatarisqayki hawan, lerq'opayawasqayki hawan senqaykiman argollata churasqayki, simiykiman frenota churasqayki, hinan maynintachus hamurqanki chay ñanninta kutichisqayki, nispa.

³⁰Qanmantaq, Ezekías, imachus kananta yachanaykipaq kayta niyki: K'ipa rurutan mikhunkichis kay watapas q'aya watapas, kinsakaq watapin ichaqa t'akankichis, ichhunkichispas, uvas chakratapas plantankichis, uvasnintataq mikhunkichis.

³¹Judá suyupi puchuq runakunan mallki hina kanqa, allinta saphichakuspan ruruyta qallarinqa.

³²Jerusalén llaqtapiqa kanqapunin puchuqkuna, Sión orqopipas qhepanqapunin kawsashaqkuna. Chaytaqa ruwanqa Tukuy-atiyniyoq Señor Diosmi, wañuy atiq munakuq kaspa, nispa.

³³Chayrakun Señor Diosqa Asiria suyu reymanta nin: Manan Jerusalenman haykunqachu, manan p'eqtanwanpas wach'inqachu, manan escudoyoqpaschu phawaykunqa, manan muyuriq perqa qhepapipas seqanata tawqakunqachu.

³⁴May ñannintachus hamurqan chaynintan kutipunqa, manan kay llaqtaman haykunqachu.

³⁵Ñoqan kay llaqtata waqaychaspa qespichisaq David kamachiyrayku ñoqaq sutiyraykupiwan, nispan Señor Diosqa nin.

³⁶Hinan Señor Diospa angelninqa Asiria suyu soldadokunaq karpankunapi wañurachirqan, pachak pusaq chunka phisqayoq waranqa runakunata. Chaymi qhepantin paqar sayariqtinku, soldadokunaqa wañusqa illarisqaku.

³⁷Chaymi Asiria suyu rey Senakeribqa karpankunata hoqarichispa Nínive llaqtaman kutiripurqan.

³⁸Huk p'unchaymi diosnin Nisrok yupaychana wasipi qonqorikusharqan, hinan churinkuna Adramelekwan Sarezerpiwan hamuspa espadawan wañurqachirqanku, chaymantataq ayqekurqanku Ararat suyuman. Rantinpitaq churin Esarhadón kamachikurqan.