Read Quechua Cuzco Bible 1988 ISAÍAS 42 Bible Online

ISAÍAS 42 - Quechua Cuzco Bible 1988 bible

ISAÍAS 42

¹Señor Diosmi nin: Kayqa kamachiyqa, ñoqan payta kallpachani, paymi akllakusqay, paymi kusichiwan. Paytan Espirituywan hunt'aykuni, hatun suyukunamanmi chanin-kayta willanqa.

²Manan qaparkachanqachu, manan waqyakunqachu, manan callekunapipas kunkanqa uyarikunqachu.

³Manan q'echusqa soqostaqa p'akinqachu, manan q'osñishaq mechatapas wañuchinqachu, cheqaqtapunin chanin-kayta churanqa.

⁴Manan pisipanqachu manan sayk'unqapaschu, imachus chanin-kayta kay pachapi churanankama. Mama qocha pata hatun suyukunataqmi yachachikuy siminkunata maki suyashanqaku, nispa.

⁵Señor Diosmi hanaq pachata kamaspa mast'arirqan, kay pachatapas chaypi kaqkunatapas ruwarqan, chaypi tiyaq runakunatapas kawsachin, chay patanta puriqkunamanpas samayta qoykun. Paymi kamachinta nin:

⁶Ñoqa Señor Diosmi ruwarqayki waqyarqayki, pusashaykin chanin yuyaykusqayta hunt'anaykipaq, qanmi runakunawan sutiypi rimanakunki, hatun suyukunapaqmi k'anchay kanki.

⁷Ñawsakunaq ñawintan kicharimunki, presokunatan carcelmanta horqomunki, tutayaqpi tiyaqkunatan watay wasimanta kacharichimunki, nispa.

⁸Ñoqallan Señor Diosqa kani, manan pipas ñoqa hina qhapaqchasqaqa kanqachu, ñoqallan yupaychasqaqa kanay, manan idolokunachu.

⁹Kayqa, ñawpaq willasqaykunan hunt'akunña, kunantaqmi mosoqkunata willakusaq, manaraq rikhurimushaqtinmi chaykunata willaykichis.

¹⁰Señor Diosman mosoq takita takiychis, teqsimuyuntin payta yupaychaychis, mama qochanta barcopi puriqkuna, payta yupaychaychis, chaypi tiyaq animalkunapas, payta yupaychaychis, mama qocha pata hatun suyu runakunapas, payta yupaychaychis.

¹¹Ch'inneqpas chaypi kaq llaqtakunapas kusikuchunku, karpakunapi tiyaq Kidar ayllu runakunapas kusikuchunku, Petra llaqtapi tiyaqkuna kusisqa takichunku, orqo patakunamantapacha kusisqa qaparichunku.

¹²Señor Diosta qhapaqchachunku, payta yupaychachunku. mama qocha islakunapi payta yupaychachunku.

¹³Señor Diosmi kallpasapa runa hina lloqsin, awqa-tinkuq runa hinapunin phiñakun, kunkayoqta waqyakuspan: ¡Maqanakusunchis! nispa qaparin, awqakunatataqmi atipan.

¹⁴Señor Diosmi nin: Unayñan ch'inlla kasharqani, upallakurqanin mukikurqanin, kunanmi ichaqa wachakushaq warmi hina qaparkachasaq, anchisaq, khuyayta samaqesaq.

¹⁵Orqokunatan moqokunatan thunisaq, llapa q'omertan ch'akichisaq, mayukunatan ch'aki pampaman tukuchisaq, qochakunatan ch'akichisaq.

¹⁶Ñawsakunatan mana rikusqanku ñankunanta purichisaq, mana rikusqanku ñankunantan paykunata pusasaq, laqhayaqtan ñawpaqenkupi k'ancharichisaq, ranratapas pampayachisaqmi. Chaykunataqa ruwasaqpunin, llaqtaytaqa manan saqerparisaqchu.

¹⁷Idolokunaman hap'ipakuqkunaqa, rikch'aykunata: Qankunaqa diosniykun kankichis, nispa niqkunaqa qhepaman kutichisqan sinchi p'enqachisqan kanqaku.

¹⁸Roqt'ukuna, uyariychis, ñawsakuna, rikunaykichispaq qhawariychis.

¹⁹¿Pin kamachiymantapas aswan ñawsaraq? ¿Pin kachasqay kachapuriymantapas aswan roqt'uraq? ¿Pin waqyakusqay llaqtamantapas aswan ñawsaraq? ¿Pin ñoqa Señor Diospa kamachiymantapas aswan roqt'uraq?

²⁰Imaynatan rikurqanki, ichaqa manan chaykunata repararqankichu, uyariytaqa atirqankin, ichaqa manan imatapas uyarirqankichu, nispa.

²¹Señor Diosmi chanin yuyaykusqanta hunt'ananpaq yachachikuy simita hatuncharqan, may hina chaniyoqchus kamachikuy siminqa kasqanta llaqtanman yachachirqan.

²²Chaypas, kay llaqtatan suwarqanku llat'anarqanku, llapallankutan qaqa wasikunaman wisq'arqanku, carcelkunamanmi apaykurqanku. Paykunatan llat'anarqanku, manataq pipas paykunata kacharichiq karqanchu, paykunatan suwaspa aparqanku, manataq pipas: Kutichipuychis, nispa niqqa karqanchu.

²³Chayri, ¿mayqenniykichistaq kayta uyarinqa? Ima ninantachus kaykunaq nisqantari, ¿pitaq yuyaymananqa?

²⁴¿Pin Jacobpa mirayninta qechunapaq qoykurqan? ¿Pin Israelta llat'anaqkunaman hap'iykachirqan? ¿Manachu Señor Dios chayta ruwarqan? Pay contran huchallikurqanchis. manan ñanninkunapi puriyta munarqanchischu, manan yachachikuy simintapas kasurqanchischu,

²⁵Chaymi Señor Diosqa k'arak phiñakuyninta chayachiwarqanchis, hatun maqanakuywanpas muchuchiwarqanchis. Muyuriqmantan kanaykuwarqanchis, chaypas manan repararqanchischu, ruphaykuwarqanchismi ichaqa manan kasukurqanchischu.