Read Quechua Cuzco Bible 1988 ISAÍAS 43 Bible Online

ISAÍAS 43 - Quechua Cuzco Bible 1988 bible

ISAÍAS 43

¹Jacobpa miraynin Israel llaqta, kamaqniyki Señor Diosmi nisunki: Ama manchakuychu, ñoqan kacharichimurqayki, sutiykimantan waqyamurqayki, ñoqapaqmi qanqa kanki.

²Unuta chimpaqtiykipas, ñoqaqa qanwanmi kasaq, mayunta chimpaqtiykipas, manan mayuqa millp'usunkichu. Nina ukhunta puriqtiykipas, manan ruphasunkichu, manan ninaqa imanasunkipaschu.

³Ñoqan Apu Señor Diosniyki kani, Israelpa Ch'uya Diosninmi kani, Qespichiqniykin kani. Qanta kacharichinaypaqqa Egipto suyutan pagani, rantiykipiqa Etiopía suyutan Seba suyutawan qoni.

⁴Ñoqapaqqa ancha chaniyoqmi kanki, ñoqan munakuyki hatunchaykuyki, chaymi kacharisqa kanaykipaq runakunata pagani, qespichisqa kanaykipaq hatun suyukunata pagani.

⁵Ama manchakuychu, ñoqaqa qanwanmi kashani, inti lloqsimuymantan mirayniykita pusamusaq, inti haykuymantataq hoqarimusqayki.

⁶Wichaytan nisaq: Paykunata kutichimuy, nispa, uraytataq nisaq: Ama hark'amuychu, nispa. Churiykuna karumanta hampuchun, ususiykunapas kay pachaq karunmanta kutimpuchun.

⁷Paykunaqa ñoqaq llaqtaymi, paykunataqa hatunchawanankupaqmi kamarqani, nispa.

⁸Señor Diosmi nin: Juzganaman llaqtayta waqyamuychis, paykunaqa qhawaq ñawsan, uyariq roqt'un kanku.

⁹Llapa hatun suyukuna juzganaman huñukamuchunku, llapa llaqtakuna hamuchunku. ¿Mayqen diosninkutaq chay kananta willawarqanchis? ¿Mayqen diosninkutaq chay sucedesqantaña willawarqanchis? Testigonkuta pusamuchunku: Hinapunin kasqa, nispa rimarinankupaq, uyariqkuna: Cheqaqpunin kasqa, nispa ninankunaq.

¹⁰Israel llaqtalláy, testigoykunan qankunaqa kankichis, akllakusqay kamachiykunan kankichis, reqsiwanaykichispaq iñiwanaykichispaq, Diospuni kasqaytapas yachanaykichispaq. Ñoqallapunin Diosqa kani, manan hayk'aqpas wak diosqa karqanchu.

¹¹Ñoqallapunin Señorqa kani, ñoqallapunin qespichiqpas kani,

¹²ñoqan chay kananta willarqani uyarichirqani, qankunatan qespichirqaykichis, manan wak dioschu chayta ruwarqan. Chhaynaqa, qankunan testigoykuna kankichis, maypachamantapas Diospuni kasqaymanta.

¹³Manataqmi pipas makiymanta qechuqqa kanchu, manan pipas ñoqaq imapas ruwasqaytaqa qolluchiyta atinmanchu, nispa.

¹⁴Israelpa Ch'uya Diosnin, qespichiqniykichis Señor Diosmi nin: Qankunata qespichinallapaqmi runakunata Babilonia contra kachani, hinan Babilonia runakunaqa barconkupi kusikunankutaqa ayqekuytapuni munanqaku.

¹⁵Ñoqan Señorqa kani, Ch'uya Diosniykichis, ñoqan Israelpa Kamaqen kani, Reyniykichis, nispa.

¹⁶Señor Diosmi llaqtanta nin: Unayñan mama qochapi ñanta kicharqani, manchana unupi purinata kicharqani,

¹⁷kallpasapa ejercitontan qatimurqani carretakunantinta caballokunantinta, kuskallan manaña sayarinankupaq urmaykurqanku, wañupuq mecha hinan tukukurqanku.

¹⁸Chaywanpas amaña unay p'unchayta yuyariychischu, amaña ñawpata rimashaychischu.

¹⁹Ñoqan mosoqkaqta ruwashani, rikhurishanñan, ¿manachu reparankichis? Ñantan ch'inneqpi kichashani, mayukunatapas purun pampapi purichishani

²⁰akllakusqay llaqtaman ukyachinaypaq. Ch'inneqpin unuta phullpuchishani, purun pampapin mayukunata purichishani, chaymi campo salqa uywakunapas chacal nisqa animalkunapas surikunapas yupaychamuwanqaku.

²¹Kay llaqtataqa ñoqapaqmi kamakurqani, yupaychaykunatan takipuwanqa.

²²Chaywanpas, Jacoblláy, manan waqyakamuwarqankichu, Israel-lláy, ñoqawanmi amikurqanki.

²³Manan ovejakunata ruphachina sacrificiopi haywawarqankichu, manan sacrificioykikunawanpas yupaychawarqankichu. Chaypas manan ruru ofrendakunata mañakuspay sayk'uchirqaykichu, manan inciensota mañapayaspaypas mat'irqaykichu.

²⁴Manan q'apaq cañakunatapas rantipuwarqankichu, manan sacrificanayki wiratapas haywawarqankichu, aswanmi huchaykikunata q'epichiwarqanki, mana chanin ruwasqaykikunawanmi sayk'uchiwarqanki.

²⁵Ichaqa, Ñoqan kashani, ñoqaraykun huchallikusqaykikunata pichani, manañataqmi huchaykikunata yuyarisaqchu.

²⁶Imapas huchachawanaykipaq kaqtinqa, ¡juzganaman risunchis! Lliwta willakuy, hinan rimasqayki cheqaqchus manachus kasqanta yachasun.

²⁷Ñawpa machulaykin huchallikurqan, umalliykikunapas ñoqa contra sayarirqan.

²⁸Chaymi ñoqaqa yupaychana wasiy uma runakunata saruncharqani, Jacobpa mirayninta ñakanapaqmi churarqani, Israelpa llaqtanta k'aminapaqmi churarqani.