Read Quechua Cuzco Bible 1988 ISAÍAS 44 Bible Online

ISAÍAS 44 - Quechua Cuzco Bible 1988 bible

ISAÍAS 44

¹Kunanqa kamachiy Jacob, uyariway, akllakusqay Israel, uyariway.

²Ñoqan kamaqniyki Señor Diosqa kani, mamaykiq wiksallanpiraqmi ruwarqayki, kunanmi yanapaykushayki, ahinaqa ama manchakuychu, qanqa kamachiymi kanki, akllakusqay Jesurunmi kanki.

³Ñoqan ch'aki pampaman unuta parachimusaq, ch'aki hallp'api yarqhakunata purichisaq. Mirayniykimanmi Espirituyta kachaykamusaq, wawaykikunatan saminchasaq.

⁴Hinan allin qarpasqa q'achu hina wiñanqaku, mayu patapi saucekuna hina wiñanqaku.

⁵Hukninmi ninqa: Ñoqaqa Señor Diospan kani, nispa, huknintaq ninqa: Jacobpa mirayninmi kani, nispa, hukninkaqtaq makinpi qelqakunqa: Señor Diospa kaqninmi kani, nispa, hinaspan sutinman Israel sutiwan sutichakunqa, nispa.

⁶Israel runakunaq reynin Señor Diosmi, Israelta kacharichiq Tukuy-atiyniyoq Señor Diosmi nin: Ñoqan ñawpaqkaqpas qhepakaqpas kani, ñoqamanta wak diosqa manan kanchu.

⁷¿Pitaq ñoqa hinari? ¡Sayarimuspa rimarichun! ¡Llaqtayta akllakusqaymantapacha sucedesqankunata willakuchun! ¡Imachus qhepaman kananta willakuchun!

⁸Llaqtalláy, ama khatatataychu, ama manchapakuychu, chaytaqa willarqaykiñan, ñawpaqmantañan willarqayki. Qankunan testigoykunaqa kankichis. ¿Ñoqamanta wak diosqa kanchu? Manan wak Pakakuna Qaqaqa kanchu, manan pitapas reqsinichu, nispa.

⁹Idolokunata ruwaqkunaqa yanqakaman, chaninpaq qhawasqanku idolokunaqa mana imapaq valeqmi. Idolokunata yupaychaqkunaqa ñawsan, manan imatapas yachankuchu, chaymi p'enqapi rikukunqaku.

¹⁰Idolota ruwaqqa mana imapaq valeq diostan ruwan.

¹¹Pipas idolota yupaychaqqa p'enqapin rikukunqa, idolokunata ruwaqkunaqa runallan kanku. Llapallanku huk nisqalla Diosman qayllaykuchunku, chaypin manchakunqakupas p'enqakunqakupas.

¹²Herreron cincelta hap'in, sansa ukhupin fierrota parichin, chaytan martillowan takashaspalla formata horqon, chaytan kallpasapa makinwan ruwan, yarqachikunmi, hinan laqhoyapun, unumantan ch'akichikun, hinan pisipapun.

¹³Carpinteron reglata churan, lapizwanmi seq'eykun, azuelawanmi llaqllan, compaswan tupuspan ch'ikurqarin, hinaspa runa rikch'ayta ruwan, munay rikch'ayniyoq runata, chayta wasinpi churananpaq.

¹⁴Cedro sach'atan kumpan, otaq sach'a-sach'a ukhupi kurkuyasqa ciprestapas robletapas akllan, otaq laurel mallkisqan sach'ata parawan wiñachin.

¹⁵Chay kurkuwanmi runaqa wayk'ukun, wakinwanmi q'osñichikun, wakinwanmi hornota kanan t'antata ruwananpaq, wakinmantataqmi diosta llaqllaspa chayta yupaychan, idolota ruwaspan chaypa ñawpaqenpi qonqorikun.

¹⁶Wakintan ninaman kanan, chay sansa patapin aychata kankan, aychata mikhuspan saksaykun. Chay ninapi q'oñikuspan nin: ¡May allinmi nina qayllapi kay, q'oñirishaniñan! nispa.

¹⁷Wakinmantataq idolota ruwakun, chaytan yupaychan, chaypa ñawpaqenpin qonqoriykukuspa mañakun: ¡Qespichiway, qanqa diosniymi kanki! nispa.

¹⁸Chay runakunaqa manan yachankuchu manan entiendenkuchu, ñawinkupas ñawsayaykunmi mana rikunankupaq, sonqonkupas rumiyaykunmi mana entiendenankupaq.

¹⁹Manan mayqenninkupas reparankuchu, manan yuyayninku kanchu, manan yuyaykuspa ninkuchu: Wakin kurkutan kanaykurqani, chay sansapin t'antata chayachirqani, aychatan kankarqani hinaspan chayta mikhurqani. ¡Wakinmantataq kay millay idolota ruwasqani! ¡Kay yupaychashasqayqa huk k'ullullan kasqa! nispaqa.

²⁰Chayqa usphata mikhuy hinapunin, sonqonmi q'otuspa pantachin. Manan qespikuyta atinqakuchu, manan entiendenqakuchu makinkupi hap'ishasqankuqa llullapuni kasqantaqa.

²¹Señor Diosmi nin: Jacoblláy, kayta yuyariy, Israel-lláy, kamachiymi kanki. Ñoqan ruwarqayki, kamachiymi qanqa kanki. Israel-lláy, manan qonqakusqaykichu.

²²Ñoqan phuyuta hina huchallikusqaykikunata chinkachini, pacha phuyuta hinan huchaykikunata ch'usaqyachini. Ñoqan qespichimurqayki, chayrayku kutirikamuway, nispa.

²³Señor Diosmi Jacobpa mirayninta qespichirqan, Israelpaq ruwasqanwanmi qhapaqchasqa karqan, chayrayku, hanaq pacha, kusisqa qapariy, hallp'a pacha ukhukuna, kusisqa qapariychis, orqokunapas llapa sach'akunapas, takiykuychis.

²⁴Señor Diosmi nin: Ñoqan mamaykiq wiksallanpiraq ruwarqayki, qantan qespichirqayki. Ñoqan Señor Diosqa kani, tukuy imaymanata kamaqqa, ñoqallan hanaq pachata mast'arirqani, mana yanapasqallan hallp'a pachata takyachirqani.

²⁵Ñoqan llulla profetakunaq watusqanta qolluchini, watuqkunaq yuyayninwanpas pukllakuni. Ñoqan hamawt'akunata pantachini, yachayniyoqkunatapas yanqa thawtiqman tukuchini.

²⁶Ñoqan kamachiykunaq siminta hunt'ani, kachasqaykunaq willakusqantapas hunt'achini. Ñoqan Jerusalenmanta nini: Chaypi runa wakmanta tiyachun, nispa. Judá suyu llaqtakunamantan nini: Wakmanta perqasqa kachun, nispa, raqayninkumantan nini: Ñoqan wakmanta perqasaq, nispa.

²⁷Mama qochatan nini: ¡Ch'akipuy! Ñoqan mayuykikunata ch'akichipusaq, nispa.

²⁸Ñoqan Cirota nini: Qanmi michipuqniy kanki, qanmi tukuy ima munasqayta hunt'anki, nispa. Paymi Jerusalenmanta ninqa: Wakmanta perqasqa kachun, nispa, yupaychana wasimantapas ninqa: Teqsinkuna teqsichasqa kachun, nispa.