Read Quechua Cuzco Bible 1988 ISAÍAS 46 Bible Online

ISAÍAS 46 - Quechua Cuzco Bible 1988 bible

ISAÍAS 46

¹Babilonia suyuq diosnin Belmi k'umuykun, diosnin Nebon huch'uyyaykun, idolonkutan uywakunaman carganku, sayk'usqa uywakunapaqmi llasa carga.

²Dioskunan k'umuykun, llapallankun huch'uyyaykun, manan kikinkuqa qespikuyta atinkuchu, paykuna kikinkun preso apasqa kanku.

³Uyariwaychis, Jacobpa miraynin, uyariwaychis, Israel runakunamanta llapa puchuqkuna, manaraq naceshaqtiykichismi q'epimurqaykichis, nacesqaykichismantapachan marq'amurqaykichis.

⁴Yuyaqña kanaykichiskamapas kaqllapunin kashasaq, soqoyoq kanaykichiskamapas apallasqaykichispunin. Ñoqan qankunata ruwarqaykichis apashallasqaykichispunin, ñoqan hap'ishasqaykichis, ñoqan qespichisqaykichis.

⁵¿Piwantaq rikch'anachiwankichisman tupanachiwankichisman? ¿Pimantaq rikch'anachiwankikuman kasqanpura kanaykupaq?

⁶Runakunan wayaqankumanta qorita tallinku, qolqetapas balanzapin aysanku, hinaspan platerowan rimanakunku diosta paykunapaq ruwananpaq, chaypa ñawpaqenpin qonqoriykukunku yupaychanankupaq.

⁷Chaytan rikrankupi wantuspa apanku, maypichus kananmanmi churanku, chaypin mana kuyurispa kashan, manan maypichus kashasqanmantaqa kuyuriyta atinchu. Yanapaykunanpaq qaparispa mañakuqtinkuqa, manan ima nispapas ninchu, manataqmi llaki-phutiyninkumanta qespichinchu.

⁸Mana kasukuqkuna kayta yuyariychis, allinta yuyaykuychis, yuyayta hap'iychis.

⁹Ñawpa sucedesqakunata yuyariychis, ñoqan Diosqa kani, manan wakqa kanchu, Diosmi kani, manataqmi pipas ñoqa hinaqa kanchu.

¹⁰Qallariymantapachan willani qhepaman imaynachus tukukunanta, qhepaman imachus kanantan ñawpaqmantaña willani. Ñoqan nini: Yuyaykusqaykunan hunt'akunqa, tukuy ima munasqaytan ruwasaq.

¹¹Inti lloqsimuymantan huk runata waqyani, paymi karumanta phawaykamunqa suwa anka hina, hinaspan yuyaykusqaykunata hunt'anqa. Rimasqayta hinan ruwasaq, yuyaykusqayta hinan hunt'asaq.

¹²Uyariwaychis rumi sonqokuna, qankunan nishankichis: Manan qespikusunraqchu, nispa.

¹³Qankunataqa ñan kacharichisqaykichisña, chay p'unchayqa asuykamushanñan, manan yanapaykuyniyqa tardamunqachu, ñoqan Sionta qespichisaq, ñoqan Israelta qhapaqchasaq, nispa.