Read Quechua Cuzco Bible 1988 ISAÍAS 51 Bible Online

ISAÍAS 51 - Quechua Cuzco Bible 1988 bible

ISAÍAS 51

¹Uyariwaychis chanin kawsayta munaqkuna, munayniyman hina kawsayta munaqkuna. Qhawariychis may qaqamantachus horqosqa kasqaykichista, may rumi qolqamantachus horqosqa kasqaykichista.

²Yuyariychis taytaykichis Abrahamta, yuyariychis wachakuqniykichis Saratapas. Abrahamtaqa sapallanraq kashaqtinmi waqyarqani, hinaspan samincharqani askhayachirqani.

³Cheqaqtapunin ñoqa Señor Diosqa Sión llaqtata sonqochasaq, llapa raqay-raqay kasqankunatan llakipayasaq. Ch'inneqkunatan Edén huertaman hina tukuchisaq, ch'aki pampakunatapas plantasqay huertaman hinan tukuchisaq. Hinan runaqa Sionpi kusikunqa q'ochukunqa, takiykunqakun, “gracias” niwanqakun.

⁴Llaqtalláy maki uyariway. Suyulláy, maki uyariway. Ñoqan yachachiyniyta willasaq, ñoqan chaninchaspa llaqtakunata k'anchasaq.

⁵Usqhayllan asuykamushani kacharichinaypaqqa, qayllaykamushaniñan qespichinaypaqqa, atiyniywanmi llaqtakunata kamachisaq. Mama qocha pata suyukunapas suyawanqakun, yanapaykunaytan suyakunqaku.

⁶Hanaq pachata qhawariychis, kay pachatapas qhawarillaychistaq. Hanaq pachaqa q'osñi hinan chinkaripunqa, hallp'a pachapas p'acha hinan mawk'ayapunqa, chaypi tiyaqkunapas ch'uspi hinan wañunqaku. Ñoqan ichaqa wiñaypaq qespichisaq, ñoqaqa atipashallasaqpunin.

⁷Uyariwaychis, chaninkaqta reqsiqkuna, uyariwaychis, yachachikuy simiyta sonqoykichispi hap'iqkuna. Ama manchakuychischu runakunaq pisichasqasuykichista, ama manchakuychischu k'amisqasuykichista,

⁸p'achata hinan thuta paykunata k'utunqa, millmata hinan paykunata thutanqa. Ñoqan ichaqa atipashallasaqpuni, ñoqaqa wiñaypaqmi qespichisaq.

⁹Rikch'ariy, Señor Diosniyku, rikch'ariy, kallpachakuy. Ñawpa p'unchaykunapi ruwasqaykita hina kunanpas ruway. Qanmi Rahab nisqa hatunkaray animalta ñut'urqarirqanki, mama qochapi tiyaq manchana animaltapas sat'irqarirqanki.

¹⁰Qanmi mama qochata manchana unu ukhuta ch'akichirqanki, mama qocha ukhuta ñanman tukuchirqanki Egiptomanta horqomusqaykikunaq chimpananpaq.

¹¹Señor Diospa qespichimusqankunaqa kutimunqakupunin, Sionmanmi takispa haykunqaku, wiñaypaqmi kusisqa tiyakunqaku. Q'ochukunqakun kusikunqakun, manañan hayk'aqpas nanachikunqakuchu anchinqakupaschu.

¹²Señor Diosmi nin: Ñoqapunin sonqochaqniykiqa kani. ¿Imanaqtintaq wañuq runata manchakunki? ¿Imanaqtintaq q'achu hinalla kaq runata manchakunki?

¹³¿Kamaqniyki Señor Diostachu qonqapuwarqanki? Ñoqan hanaq pachata mast'arqani, kay pachatapas teqsicharqani. ¿Imanaqtintaq muchuchiqpa k'arak phiñakusqanta sapa p'unchay manchakushallankipuni? ¿Imanaqtintaq manchakunki wañuchinasuykipaq wakichikushaqta? Chayri, ¿maytaq chay muchuchiqpa k'arak phiñakusqan?

¹⁴K'umuykachisqa presokunaqa usqhayllan kacharichisqa kanqa, manan watay wasipi wañunqakuchu, t'antankupas kashallanqapunin.

¹⁵Ñoqan Apu Señor Diosniyki kani, sutiyqa Tukuy-atiyniyoq Señor Diosmi. Ñoqan mama qochata aytichini, phoqchiqesqankunatapas qaparichini.

¹⁶Ñoqan hanaq pachata mast'arqani, kay pachatapas teqsicharqani, kunantaq Sión llaqtata nini: Qanqa llaqtaymi kanki, ñoqan yachachiyki, makiywanmi llanthuykuyki, nispay.

¹⁷Jerusalén llaqta, ¡rikch'ariy! ¡Rikch'ariy! ¡Sayariy! Qanmi Señor Diospa k'arak phiñakuyninwan hunt'a qeruta chaskirqanki, hinaspan ch'umapantinta ukyarqanki, machasqa hinan thamaykachasharqanki.

¹⁸Llapa wawaykikunamantaqa manan mayqenpas pusaqniyki kanchu, llapa uywasqayki wawakunamantaqa manan makimanta aysaqniyki kanchu.

¹⁹Kay iskay llakin qatirqasunki: suyuykin purunyachisqa llat'anasqa karqan, runaykikunan yarqaypi awqa-tinkuypi wañurqan. ¿Pitaq llakipayasunki? ¿Pitaq sonqochaykusunki?

²⁰Llikapi hap'isqa taruka hinan wawaykikunaqa mana kallpayoq kashanku, llapa calle esquinakunapin chuta-chuta urmanku, Señormi k'arakta phiñakuspan paykunata muchuchirqan, Diosniykin paykunata wanachirqan.

²¹Llakichisqa llaqta, uyariy, machasqan kashanki, ichaqa manan vinowanchu.

²²Qollana Señor Diosniykin, llaqtanta amachaqmi nisunki: Chay machasqayki qerutan qechuyki, manañan k'arak phiñakuyniywan hunt'a qerutaqa ukyankichu.

²³Muchuchiqniykikunan nirqasunki: Kumpakuy, qan patantan thaskisaqku, nispanku. Qantaq pampaman thallaykurqanki, pampata hina sarunasuykikupaq. Kunantaqmi chay muchuchiqniykikunaman chay qeruta qosaq ukyanankupaq.