Read Quechua Cuzco Bible 1988 ISAÍAS 59 Bible Online

ISAÍAS 59 - Quechua Cuzco Bible 1988 bible

ISAÍAS 59

¹Manan Señor Diospa atiyninqa pisiyarqonchu, payqa qespichinmanpunin. Manan Señor Diosqa roqt'uyarqonpaschu, payqa uyarinmanpunin.

²Ichaqa mana chanin ruwasqaykichiskunan qankunataqa Diosniykichismanta t'aqarqasunkichis, huchaykichiskuna hawan mana qhawarimusunkichischu, mana uyarisunkichispaschu.

³Qankunaqa runa wañuchiqmi kankichis, mana chanin ruwaqmi kankichis, llullan kankichis, millaytan rimankichis.

⁴Manan pipas juzganapi chaninninpi quejakunchu, manan pipas cheqaq sonqowan juzganaman rinchu, aswanpas yanqa thawtiyman hap'ipakuspan llullakunku, mana allinkunatan kamarinku, mana chanintan paqarichinku.

⁵Mach'aqway runtukunata oqllaq hinan millaykunata yuyaykunku, qhampu llikakuna hinan yuyaykusqankuqa. Chay runtukunata mikhuqqa wañunmi, q'apiykuqtinkupas mach'aqwaykunan lloqsimun.

⁶Chay llikakunaqa manan p'acha ruwakunapaq allinchu, manan pipas ruwasqankuwanqa p'achakuyta atinchu, ruwasqankuqa mana chaninpunin, maqashaspallan pitapas imaymanata ruwanku.

⁷Usqhayllan mana allinmanqa phawarinku, mana mancharispan mana huchayoqta wañuchinku. Yuyaykusqankuqa mana chaninpunin, runakunata waqllichispallan muchuchispallan kawsanku.

⁸Manan piwanpas sumaqta kawsankuchu, manan paykunaqa ima chanintapas ruwankuchu. Purisqanku ñankunaqa q'ewisqakaman, pipas chaykunanta puriqqa manan sumaq kawsayta yachanchu.

⁹Chaymi Diosqa mana kacharichiwanchischu, payqa manan qespichiwanchischu. K'anchaytan purinanchispaq suyanchis, ichaqa tutayaqllapunin kashan, sut'iyaytan suyanchis, ichaqa laqhayaqllapipunin purinchis.

¹⁰Ñawsakuna hinan perqata llankhukunchis, mana rikuqkuna hinan llamispalla purinchis, tutapi hinan chawpi p'unchaypi misk'akunchis, kallpasapakuna ukhupin wañusqakuna hina kanchis.

¹¹Llapallanchismi ukumarikuna hina ayqonchis, urpikuna hinan khuyayta anchinchis, Diospa qespichiwananchistan suyanchis, manataq qespichiwanchischu, kacharichiwananchistan suyanchis, manataq kacharichiwanchischu.

¹²Diosnillayku, ñoqaykuqa sinchitan mana kasurqaykikuchu, huchaykupas huchachawankun, mana chanin ruwasqaykutaqa reqsikuykun, huchaykutapas willakuykikun.

¹³Manan qantaqa kasurqaykikupaschu, manataq qanpaqqa hunt'aqpaschu karqayku, aswanpas saqepurqaykikun, hukkunatan saruncharqayku, ch'aqwa hatarichiqmi karqayku, llullakuyta yuyaykuspaykun hukkunata q'otunaykupaq rimanakurqayku.

¹⁴Ahinaqa chanin-kaymi wikch'usqa kapun, chanin kawsaymi mana qayllaykampunchu, manan plazapi cheqaq-kayqa kapunchu, chanin kawsaypas manan rikhurimpunchu.

¹⁵Manañan pipas siminta hunt'apunchu, mana allinmanta t'aqakuqtapas llat'anankun. Señor Diosqa manan kusikurqanchu chanin-kaypa mana kapusqanta rikuspa.

¹⁶Sarunchasqakunata mana pipas yanapaykuq kasqantan rikurqan, mana pipas sayarikuq kasqanmantan utirayarqan, chaymi atiyninwan qespichirqan, chanin yuyaykusqanwanmi atiparqan.

¹⁷Chanin-kaywanmi soldadoq unkunwan hina p'achakurqan, qespikuywanmi cascowan hina churakurqan, awqankunata vengakuywanmi p'achawan hina p'achakurqan, muchuchinanpaq sienteywanmi llaqollawan hina churakurqan.

¹⁸Ruwasqankunaman hinan sapankaman paganqa, payta cheqnikuqkunatan k'arakta muchuchinqa, awqankunamanmi maychus chaskinankutapuni qonqa, mama qocha patapi tiyaq llaqtakunatapas muchuchinqan.

¹⁹Inti lloqsimuy ladomanta inti haykuy ladokama tiyaqkunan Señor Diosta hatun atiynintapas manchakunqaku. Payqa kallpasapa wayraq tanqasqan phawashaq mayu hinan hamunqa.

²⁰Señor Diosmi nin: Sionmanmi kacharichiqniykichisqa hamusaq, Jacobpa mirayninkuna huchankumanta ñoqaman kutirikamuqkunamanmi hamusaq.

²¹Qankunawanmi rimanakuni: Ñoqan Espirituyta qoykichis, simiykunawanmi yachachiykichis. Chaykunaqa wiñay-wiñaypaqmi kashanqa qankunawanpas, wawaykichiskunawanpas, nietoykichiskunawanpas, nispa.