Read Quechua Cuzco Bible 1988 ISAÍAS 6 Bible Online

ISAÍAS 6 - Quechua Cuzco Bible 1988 bible

ISAÍAS 6

¹Rey Uziaspa wañukapusqan watapin Señor Diosta rikurqani, paymi altopi tiyashasqa kamachikunan hatun tiyananpi, qoysu p'achanmi yupaychana wasita hunt'aykushasqa.

²Paypa altonpin k'anchashaq kawsaqkuna kashasqa, chaykunan soqta raphrayoqkama kasqaku. Iskay raphrankuwanmi uyankuta pakakusqaku, iskaywantaq chakinkuta pakakusqaku, iskaywantaq phalasqaku.

³Paykuna puran waqyanakurqanku: Tukuy-atiyniyoq Señor Diosqa ch'uyay-ch'uyapunin, paypa lliphlli-kayninqa kay pachantintan hunt'aykun, nispanku.

⁴Chay hinata qapariqtinkun yupaychana wasiq punkunraq chhaphchikurqan, wasimantaq q'osñi hunt'aykurqan.

⁵Hinan ñoqaqa nirqani: ¡Ay, imanaykusaqtaq, wañusaqchá kunanqa! Tukuy-atiyniyoq Señor Diostan rikurqoni, payqa Reymi, ñoqaqa millay qhelli simi runan kani, millay qhelli simi rimaq runakuna ukhupitaqmi tiyanipas, nispay.

⁶Chay raton k'anchashaq kawsaqkunamanta huknin ñoqaman phalarimurqan. Altar patamanta sansata tenazakunawan hap'ispan apamuwarqan,

⁷hinaspan chaywan simiyta tupaykuwaspa niwarqan: Qhawariy, kay sansan simiykita tupaykusunki, huchallikusqaykin pichasqa, huchaykikunan pampachasqa, nispa.

⁸Chaymantataq Señor Diospa kunkanta uyarirqani: ¿Pitataq kachasaq? ¿Pitaq ñoqanchismanta willaq rinqa? nishaqta. Hinan ñoqaqa kutichirqani: Ñoqan kamachiyki kani, ñoqata kachaway, nispa.

⁹Chaymi niwarqan: Phaway, kay llaqtata nimuy: Anchataña uyarishaspapas manan entiendenkichischu, allintaña qhawashaspapas manan reparankichischu, nispayki.

¹⁰Kay runakunaq yuyayninta loqheyachiy, ninrinkutapas roqt'uyachiy, ñawinkutapas ñawsayachiy, ama uyarinankupaq, ama rikunankupaq, ama entiendenankupaqwan. Ahinapin ñoqaman mana kutirikamuwanqakuchu, manataq qhaliyachisqapaschu kanqaku, nispa.

¹¹Chaymi ñoqaqa tapuykurqani: Señor Diosníy, chaykunari, ¿hayk'a unaytaq kanqa? nispa. Paytaq niwarqan: Llaqtakuna lliw thunisqa, mana ch'ulla tiyaqniyoq kanankama, wasikunapas mana ch'ulla runayoq kanankama, campokunapas purun-purun kanankama,

¹²runakunata presota karu suyuman apachinaykama, kay suyu ch'usaqpuni-ch'usaq kanankama.

¹³Runakunamanta chunka p'akillanña qhepanman chaypas, wañuchisqallapunin kanqa, ichaqa imaynan encina sach'a wit'usqa saphi kurkumanta ch'ikchimun, chay hinatan ch'uya llaqtayqa ch'ikchimunqa, nispa.