Read Quechua Cuzco Bible 1988 ISAÍAS 60 Bible Online

ISAÍAS 60 - Quechua Cuzco Bible 1988 bible

ISAÍAS 60

¹Jerusalén, sayariy, k'anchariy, Señor Diosmi k'anchaykamusunki, lliphipiyninmi k'anchaykamusunki.

²Laqhayaqmi hallp'a pachaman mast'arikun, tutayaqmi hatun suyukunata tutayaykun, qanmanqa Señor Diosmi k'anchaykamusunki, lliphipiyninmi k'anchaykamusunki.

³Hatun suyukunapas k'anchayniykimanmi hamunqaku, reykunapas illariyniyki k'anchaymanmi hamunqaku.

⁴Muyuriqniykita qhawariy: Runaykikunan huñukamuspa hamushasunki, churiykikunan karumanta chayamunku, ususiykikunan marq'api hamunku.

⁵Qanqa chaykunata rikuspan anchata kusikunki, sonqoykin kusikuymanta q'ochukunqa. Hatun suyukunaq qhapaq-kayninkunatan apamusunkiku, mama qocha chimpamantan qhapaq-kayninkuta chayachimusunkiku.

⁶Askhallaña camellokunan hunt'aykamusunki, Madián runakunaq Efa runakunaq malta camellonkunan hamusunki, chay uywakunan Sabá suyumanta chayamunqaku qori q'epintin incienso q'epintin, runakunataq Señor Diosta yupaychaspa hamunqaku.

⁷Kidar runakunaq llapa uywanmi qanman qatimusqa kanqa, Nebaiot runakunaq anejonkunan qanpaq kanqa, chaykunan altarpi Señor Diosman haywasqa kanqa, paytaqmi sumaqta chaskinqa, yupaychana qhapaq wasintapas astawanmi sumaqchanqa.

⁸¿Imakunataq chay phuyu hina phawaq barcokunaqa? ¿Pikunataq q'esankuman phawaq urpikuna hina hamushanku?

⁹Karumanta hamuq barcokunan kashan, mama qocha ukhunta puriq hatun barcokunan ñawpamushan wawaykikunata karumanta apamuspa. Paykunawan kuskatan qolqenkutapas qorinkutapas apamushanku Apu Señor Diosniykita yupaychanankupaq, Israelpa Ch'uya Diosninta qhapaqchanankupaq. Paymi hatunchasunki.

¹⁰Señor Diosmi Jerusalenta nin: Wak llaqtayoqkunan perqaykikunata wakmanta perqanqaku, reyninkun kamachiykita ruwanqaku. K'arakta phiñakuspaymi muchuchirqayki, sumaq sonqo kaspaytaqmi khuyapayarqayki.

¹¹Llaqta punkuykikunaqa kicharayashallanqapunin, manan p'unchaypas tutapas wisq'akunqachu, hatun suyukunaq qhapaq-kayninkuna qanman apaykusqa kananpaq, atipasqa reyninkupas pusaykusqa kanankupaq.

¹²Kamachiykita mana ruwaq hatun suyupas chinkanqan, chay suyukunaqa ch'usaqyachisqan kanqa.

¹³Líbano orqo-orqopi sumaqnin sach'akunan chayamusunki, ch'uya wasiyta sumaqchanapaqmi cipreskunata, pinokunata, huk sach'akunatapas apamusunkiku. ahinatan tiyasqay wasita qhapaqchasaq.

¹⁴Sarunchaqniykikunaq churinkunan k'umuykukuspa hamusunkiku, pisichaqniykikunan llapallanku k'umuykamusunkiku, hinaspan sutichasunkiku: Señor Diospa Llaqtan, Israelpa Ch'uya Diosninpa Sión Llaqtan, nispa.

¹⁵Wikch'usqan cheqnisqan karqanki, manan pipas qan ukhunta purirqanchu, kunanqa qhapaq llaqtamanmi wiñaypaq tukuchisqayki, qanta rikuspan sapanka miray runa kusikunqa.

¹⁶Hatun suyukunan allinnin mikhunawan uywasunkiku, reykunan qhapaq-kayninkuta apamusunkiku, hinan yachanki Qespichiqniyki Kacharichiqniyki kasqayta, Jacobpa Atiyniyoq Diosnin kasqayta.

¹⁷Bronce apamunaytan qorita apamusqayki, fierro apamunaytan qolqeta apamusqayki, kurku apamunaytan bronceta apamusqayki, rumi apamunaytataq fierrota apamusqayki. Kamachikuqniykikunaqa manañan muchuchisunkikuchu, aswanpas chanin-kaymi thak kawsaymi suyuykiman hunt'aykunqa.

¹⁸Manañan hayk'aqpas suyuykipi maqakuy uyarikunqachu, manañan pipas suyuykipi thuniqpas purunyachiqpas kanqachu, aswanmi perqaykikunata “Qespikuy” nispa sutichanki, punkuykikunatapas “Yupaychay” nispa sutichanki.

¹⁹Intiqa manañan p'unchaypi k'anchaykuqniykichu kanqa, manan killaq k'anchayninpas tuta k'anchaykusunkichu, aswanpas ñoqa Señor Diosmi wiñaypaq k'anchaykusqayki, ñoqa Diosniykin sumaqta lliphipiykusqayki.

²⁰Manan intiykiqa hayk'aqpas haykunqachu, manan killaykipas tutayanqachu, ñoqa Señor Diosmi wiñaypaq k'anchaykusqayki, manañan hayk'aqpas llakikunkiñachu.

²¹Runaykikunaqa chaninkaman kanqaku, wiñaypaqmi suyunkuta hap'inqaku. Ñoqan paykunata ruwarqani, suyunkupipas plantarqani ñoqa qhapaqchasqa kanaypaqmi.

²²Paykunamanta aswan huch'uymi hatun aylluman tukupunqa, aswan pisipaq qhawarisqan mentasqa suyuman tukupunqa. Ñoqan Señor Diosqa kani, tiempollanpin chayta usqhaylla hunt'achisaq, nispa.