Read Quechua Cuzco Bible 1988 ISAÍAS 9 Bible Online

ISAÍAS 9 - Quechua Cuzco Bible 1988 bible

ISAÍAS 9

¹Chaywanpas muchuqkunapaqqa manañan laqhayaq kanqañachu. Diosqa Zabulón aylluta Neftalí ayllutawanmi k'umuykachirqan, hamuq p'unchaykunapin ichaqa hatunchanqa mama qocha patapi tiyaqkunata, Jordán mayuq inti lloqsimuy ladonpi tiyaqkunata, wak llaqtayoqkunaq tiyasqan Galilea hap'iytapas.

²Tutayaqpi purishaq llaqtan huk hatun k'anchayta rikurqan, sinchi laqhayaqpi tiyaq runakunatan huk k'anchay k'anchaykurqan.

³Qanmi, Señor Dios, paykunata aswanta askhayachirqanki, qanmi anchatapuni kusichirqanki. Chaymi paykunaqa llapallanku ñawpaqeykipi q'ochukunku imaynan cosecha tiempopi runakuna kusikunku hinata, imaynan llat'anasqata rakinakuqkunapas q'ochukunku hinata.

⁴Imaynan Madián suyuta unayña atiparqanki, chay hinatan sarunchaq llaqtataqa k'umuchirqanki, qanmi llasa yugonkuta p'akirqanki, waqtananku varatapas qechurqanki.

⁵Soldadokunaq q'aqraqechisqan botaskunapas, yawarkama p'achankunapas ruphachisqataq ninaq q'olasqantaq kanqa.

⁶Huk qhari wawan nacepuwanchis, Diosmi qowanchis huk qhari wawata, paymi ñoqanchista kamachiwasun. Paypa sutinqa kay hinan kanqa: Musphana ruway Yuyaykuq, Atiyniyoq Dios, Wiñay Yaya, Thak-kayta kamachiq.

⁷Rey Davidpa kamachikuy tiyananpin tiyanqa, kamachikuy atiyninqa hinantinmanmi mast'arikunqa, thak-kaypas manan tukukunqachu. Chaninchayta ruwaspa cheqaqllatapuni kamachispanmi kamachikuyninta allinta takyachinqa kunanmanta wiñay-wiñaypaq. Chaytan ruwanqa Tukuy-atiyniyoq Señor Diosqa pay kikin hatunchasqa kananpaq.

⁸Señor Diosmi Jacobpa mirayninman rimaykurqan, Israel runakunamanmi siminkunata apachimurqan.

⁹Samariapi tiyaq llapa Israel runakunan chayta entiendenku, paykunan ichaqa hatunchakuspanku anchaykachaspanku ninku:

¹⁰Ladrillo wasikunaqa urmaykapunmi, ñoqanchisqa rumikunawanmi perqasunchis, k'ita higos sach'akunatan wit'upunku, ñoqanchisqa chaypa rantinpin cedro sach'akunata mallkisunchis, nispa.

¹¹Chayraykun Señor Diosqa awqankunata kallpacharqan, pay kikinmi phawaykunanpaq tanqarqan.

¹²Inti lloqsimuy ladomanta siria runakuna, inti haykuy ladomantataq Filistea runakuna hamuspanku Israeltaqa huk simillata oqoykurqanku. Chaywanpas Señor Diospa k'arak phiñakuyninqa manan thanirqanchu, aswanpas: Muchuchisaqmi, nishallanpunin payqa.

¹³Paykunaqa manan muchuchiqninku Diosman kutirikurqankuchu, Tukuy-atiyniyoq Señor Diostapas manan maskharqankuchu.

¹⁴Chaymi Señor Diosqa Israel suyuta umantawan chupantawan wit'unqa, huk p'unchayllapin payqa hatuntapas huch'uytapas wañuchinqa.

¹⁵Umaqa kurak runakunaman umallikunamanwanmi rikch'akun, chupataq llulla yachachiq profetakunaman rikch'akun.

¹⁶Umallikunan kay llaqtata waqllichirqan, llaqta runakunataq chinkapurqanku.

¹⁷Chayraykun Señor Diosqa waynakunatapas mana tayta-mamayoqkunatapas viudakunatapas mana khuyapayarqanchu, llapan runakunan millay mana chanin kanku, mana yuyayniyoq hinataqmi thawtinkupas. Chaywanpas Señor Diospa k'arak phiñakuyninqa manan thanirqanchu, aswanpas: Muchuchisaqmi, nishallanpunin payqa.

¹⁸Mana chanin kayqa nina hinaraqmi rawrarin, khiskakunata ch'aphrakunata hap'iriq nina hinaraqmi rawrarin, sach'a-sach'akunata ruphaykuq nina hina, putumiq q'osñipi wayraman wach'iq hina.

¹⁹Tukuy-atiyniyoq Señor Diospa k'arak phiñakuynin hawan suyuqa ninawan hap'iykachisqa kashan, hinan runakunata muchuchishan, chaymi mana pipas wawqenta khuyapayanchu.

²⁰Lloq'e ladonpi tarisqantan oqorqon, manataq saksanchu, paña ladonpi tarisqantan mikhurqon, yarqasqallataqmi kashan, wawankunatawanraqmi mikhukunkupas.

²¹Manaseswan Efrainwanqa paykuna puran maqanakunku, iskayninkutaq kuska Judá contra phawaykunku. Chaywanpas Señor Diospa k'arak phiñakuyninqa manan thanirqanchu, aswanpas: Muchuchisaqmi, nishallanpunin payqa.