Read Quechua Cuzco Bible 1988 LEVÍTICO 16 Bible Online

LEVÍTICO 16 - Quechua Cuzco Bible 1988 bible

LEVÍTICO 16

¹Aaronpa iskaynin churinkunan Señor Diosman qayllaykuspa wañurqanku, chay qhepatan Señor Diosqa Moisesta nirqan:

²—Wawqeyki Aaronta niy unanchasqa tiempollapi cortina qhepa Ch'uyay-ch'uya Cheqasman haykunanpaq, caja patapi kaq hucha pampachana cheqas nisqa kirpana qayllaman, paqtan wañunman. Ñoqaqa kirpana patapin phuyu ukhupi rikhurini.

³Aaronqa karpa kanchaman haykunqa hucha pampachaypaq huk torillontin, ruphachina sacrificiopaqtaq huk anejontin.

⁴Unuwan bañakuspañan churakunqa linomanta ch'uya sotanawan, lino calzoncillowan, lino chumpiwan chumpikunqa, linomanta uma k'uyunawan umanta k'uyukunqa. Chaykunaqa ch'uya p'achakunan.

⁵Israel runakunamantataq iskay orqo cabrata hucha pampachaypaq hap'inqa, huk anejotataq ruphachina sacrificiopaq.

⁶Aarontaq hucha pampachaypaq huk torillota haywanqa paypaqwan familianpaqwan.

⁷Hinaspataq iskaynin orqo cabrata qayllayman apamunqa Ñoqawan Tupana Karpa punkuman.

⁸Chaymantataq Aaronqa iskaynin orqo cabrapaq sorteanqa, hukta ñoqa Señor Diospaq, huktataq hucha apaqpaq.

⁹Aaronmi ñoqapaq sorteasqa orqo cabrata apachimunqa, hinaspan chayta hucha pampachaypaq haywanqa.

¹⁰Hucha apaqpaq sorteasqa orqo cabratataq ichaqa kawsashaqta ñawpaqeyman chimpachimunqa, hinaspa ch'inneqman qatirparipunqa Israel runakunaq huchankunata apananpaq.

¹¹Hinaspan Aaronqa huchan pampachaypaq kaq torillota apachimunqa paypaqwan familianpaqwan, hinaspa chay torillota nak'anqa.

¹²Chaymantataq ñawpaqeypi kaq altarmanta incienso q'osñichinata hunt'a sansayoqta hoqarinqa, hinallataq huk phoqtuy q'apashaq incienso kutasqatapas, chaykunatan cortina ukhuman apaykunqa.

¹³Hinaspan inciensotaqa ñawpaqeypi kaq nina pataman churaykunqa kamachikuy simiyoq caja patapi kaq hucha pampachana cheqas nisqa kirpanata incienso q'osñi pakaykunanpaq, ahinapi mana wañunanpaq.

¹⁴Hinamantataq torillo yawarta hap'ispa kirpana pataman ch'allaykunqa, hinaspataq kirpanaq ñawpaqenman chay yawarta dedonwan qanchis kutita ch'allaykunqa.

¹⁵Hinaspataq orqo cabrata nak'anqa llaqtaq huchanta pampachaypaq, hinamantataq yawarninta apaykunqa cortina ukhuman, hinaspataq torilloq yawarninwan ruwasqanta hina ruwanqa, chay yawartan kirpana pataman ch'aqchuykunqa, hinallataq kirpanaq ñawpaqenmanpas.

¹⁶Chay hinatan Ch'uyay-ch'uya Cheqasta ch'uyanchanqa Israel runakunaq qhelli kasqankurayku, mana kasukusqankurayku, tukuy huchallikusqankumantawan. Kaqllataqmi Ñoqawan Tupana Karpatapas ch'uyanchanqa qhelli runakuna ukhupi kasqanrayku.

¹⁷Ch'uyay-ch'uya Cheqasman Aaronqa haykuspa paypaq, familianpaq, llapa Israel runakunapaqwan hucha pampachaypaq chay yawarta haywanqa. Chaymi haykusqanmanta lloqsinankama mana pipas karpaman haykunqachu.

¹⁸Ñawpaqeypi kaq altarman lloqsimuspan chayta ch'uyanchananpaq haywanqa, hinaspan torillo yawartapas orqo cabra yawartapas hap'ispa altar waqrakunaman llusiykunqa.

¹⁹Chay altar patamanmi qanchis kutita yawarta dedonwan ch'allaykunqa, chay hinatan Israel runakunata qhelli kasqankumanta ch'uyanchaspa ñoqapaq t'aqanqa.

²⁰Ch'uyay-ch'uya Cheqasta, Ñoqawan Tupana Karpata, altartawan ch'uyanchasqanmantataq Aaronqa kawsashaq orqo cabrata apachimunqa.

²¹Hinaspan chay cabra umaman iskaynin makinta churaykuspa chay patapi willakunqa Israel runakunaq tukuy huchallikusqanta, tukuy mana kasukusqanta, hinaspa chay cabra umaman llapa huchankuta q'epiykachispa chaypaq kamachisqaña runawan ch'inneqman qatirparichipunqa.

²²Chay cabrataq llapa mana chanin ruwasqankuta mana runaq tiyasqan hallp'aman apanqa, chay runataq ch'inneqman chay cabrata qatirparipunqa.

²³Chaymantataq Aaronqa Ñoqawan Tupana Karpaman haykunqa, hinaspan Ch'uyay-ch'uya Cheqasman haykunanpaq p'achakusqan lino p'achakunata ch'utikuspa chayman churaykunqa.

²⁴Chaymantataq karpaq ch'uya kanchampi bañakunqa, p'achankunawan p'achakuspataq lloqsispa ruphachina sacrificiokunata haywanqa, paypa huchantapas llaqtaq huchantapas pampachaypaq.

²⁵Huchapaq nak'asqaq wirantataq altarpi ruphachinqa.

²⁶Hucha apaq orqo cabrata qatirpariqqa p'achankunatan t'aqsakunqa, unuwanmi bañakunqa, hinaspañan karpa-karpaman haykunqa.

²⁷Hucha pampachaypaq torilloq orqo cabraq yawarninta Ch'uyay-ch'uya Cheqasman apaykusqan qhepatataq chay animalkunaq qaranta, aychanta, phusnuntawan karpa-karpa hawaman horqospa ruphachinqaku.

²⁸Chaykunata ruphachiqqa p'achankunatan t'aqsakunqa, unuwanmi bañakunqa, chaymantañan karpa-karpaman kutiykapunqa.

²⁹Wiñaypaqmi kayqa kamachikuy simi qankunapaq kanqa: Qanchiskaq killaq chunkakaq p'unchayninpin ayunankichis, aman ima ruwanatapas ruwankichischu, llaqtayoqpas qankuna ukhupi tiyaq wak llaqtayoqpas.

³⁰Chay p'unchaypin qankunapaq hucha pampachaypaq haywakunqa, chaymi tukuy huchaykichismanta qayllaypi ch'uya kapunkichis.

³¹Samakuna p'unchaymi qankunapaqqa kanqa, chaypiqa ayunankichismi. Chayqa wiñaypaq kamachikuy simin.

³²Taytanman qatiq sacerdote kananpaq hawispa churasqa uma sacerdoten hucha pampachaypaq haywanqa. Payqa linomanta ch'uya p'achakunawanmi p'achakuspa

³³ch'uyanchanqa Ch'uyay-ch'uya Cheqastapas, Ñoqawan Tupana Karpatapas, altartapas, hinaspan sacerdotekunaq huchan llaqtaq huchan pampachaypaq sacrificiota haywanqa.

³⁴Chaykunaqa wiñaypaq kamachikuy simin qankunapaq kanqa, Israelpa tukuy huchankunapaq watapi ch'ulla kutillata hucha pampachachiypaq, nispa. Hinan Señor Diospa Moisesta kamachisqanqa ruwasqa karqan.