Read Quechua Cuzco Bible 1988 LEVÍTICO 20 Bible Online

LEVÍTICO 20 - Quechua Cuzco Bible 1988 bible

LEVÍTICO 20

¹Señor Diosmi Moisesta nirqan:

²—Israel runakunatan nillankitaq: Señor Diosmi nin: Mayqen Israel runapas, Israelpi tiyaq mayqen wak llaqtayoqpas mayqen wawantapas Molok nisqa diosman haywanqa chayqa, wañuchisqapunin kanqa. Llaqta runakunan payta rumiwan ch'aqenqa.

³Ñoqa yupaychana cheqastan qhellichan, ch'uya sutiytan pisichan, chaymi ñoqaqa chay runaq awqan kasaq hinaspan llaqtaymanta qarqosaq, wawanta Molokman haywasqanrayku.

⁴Wawanta Molokman haywaq runatachus chay llaqta runakunaqa mana wañuchinqakuchu chayqa,

⁵ñoqan chay runaq chay aylluq awqan kasaq, hinaspaymi llaqtaymanta qarqosaq, Molokwan qhellichakuspa llapa paywan qhellichaysikuqkunatawan.

⁶Pipas wañusqakunaq almanta tapuchinqa, layqamanpas rinqa chaykunawan qhellichakunanpaq chayqa, ñoqan chay runaq awqan kasaq, hinaspan llaqtaymanta qarqosaq.

⁷Ñoqapaq t'aqakuychis, ch'uyataq kaychis, ñoqa Apu Señor Diosniykichis kasqayrayku.

⁸Unanchayniykunata waqaychaspa hunt'aychis. Ñoqa Señor Diosmi ch'uyanchaqniykichis kani.

⁹Pipas taytantapas mamantapas ñakaqqa wañuchisqapunin kanqa. Taytanta mamanta ñakasqan huchanmantan wañunqa.

¹⁰Pi qharipas runa masinpa warminwan wasanchanqa chayqa, chay wasanchaqkunaqa wañuchisqapunin kanqa.

¹¹Pipas taytanpa warminwan puñukuqqa taytantan pisichan, chaymi iskayninku huchankumanta wañuchisqa kanqaku.

¹²Pipas qhachuninwan puñunqa chayqa, iskayninkun huchankumanta wañuchisqa kanqaku. Chay ruwayqa waqlliymi.

¹³Pikunapas qharipura t'inkikunqaku chayqa, millaytapunin ruwanku, iskayninkun huchankumanta wañuchisqa kanqaku.

¹⁴Pipas ususintin mamantinwan casarakuqqa, sinchi millaytan ruwan. Ninawanmi qharitapas warmikunatapas kanaykunqaku, qankuna ukhupi chay hina ancha millay ama kananpaq.

¹⁵Pipas animalwan t'inkikuqqa wañuchisqan kanqa, animaltapas wañuchinkichismi.

¹⁶Huk warmitaqchus ima animalmanpas qayllaykunqa chaywan t'inkikunanpaq chayqa, warmitawan animaltawanmi wañuchinkichis. Huchankumantan wañunqaku.

¹⁷Pipas pananwan casarakunman, taytanpa ususinña mamanpa ususinña kaqtinpas, hinaspa puñunkuman chayqa, p'enqan. Chaymi llaqtan runakuna rikushaqtin qarqosqa kanqaku. Pananwan puñukusqan huchanmantan qarqochikunqa.

¹⁸Pipas killanwan kashaq warmiwan puñukunqa chayqa, paypa yawarnintan rikurqan, warmipas yawarnintan rikuchikurqan. Iskayninkun llaqtanku ukhumanta qarqosqa kanqaku.

¹⁹Aman mamaykiq ñañanwanpas taytaykiq pananwanpas puñukunkichu, chayqa familiata pisichaymi kanman, Iskayniykichismi huchaykichismanta muchuchisqa kankichis.

²⁰Pipas taytanpa wawqenpa warminwan puñukuqqa, tiontan pisichan. Huchankumantan wañuchisqa kanqaku, mana wawaqoymi wañunqaku.

²¹Wawqe kawsashaqtin warminwan casarakuyqa millay ruwaymi. Pipas chayta ruwaqqa wawqentan pisichan. Mana wawayoqmi kapunqaku.

²²Waqaychankichismi llapa unanchayniykunata, llapa kamachikuyniykunatapas, hinaspa chaykunata hunt'ankichis. Paqtan tiyanaykichispaq pusaykushasqay hallp'a qarqomusunkichisman.

²³Aman ñawpaqeykichismanta wikch'usaq chay hatun suyukunaq ruwasqankunata hina ruwankichischu. Paykunaqa tukuy chay millaykunatan ruwarqanku, ñoqataq paykunata millakurqani.

²⁴Qankunatan ichaqa nirqaykichis: Qankunan hallp'ankuta hap'inkichis, chaytan herenciaykichis kananpaq qosqaykichis, imaymanaq hunt'asqa wiñanan hallp'ata, nispa. Ñoqaqa Apu Señor Diosniykichismi kani, wak llaqtakunamanta t'aqaqniykichis.

²⁵Chayraykun reparankichis mayqenchus mikhuna animal kasqanta, mana mikhuna kasqantapas, mikhuna phalaq animal kasqanta, mana mikhuna kasqantapas. Qankunapaq qhelli kasqanta t'aqasqay animalkunawan, phalaq animalkunawanpas, pampanta ima suchuqwanpas ama qhellichakuychischu.

²⁶Ñoqapaq ch'uya kaychis, ñoqa ch'uya kasqayrayku, llaqtakunamantan t'aqarqaykichis ñoqaq kanaykichispaq.

²⁷Qharipas warmipas wañusqakunaq almanta waqyanman otaq layqa kapunman chayqa, wañuchisqan kanqa. Rumiwan ch'aqesqan kanqaku, huchankumantan wañunqaku, nispa, nispayki.