Read Quechua Cuzco Bible 1988 LEVÍTICO 26 Bible Online

LEVÍTICO 26 - Quechua Cuzco Bible 1988 bible

LEVÍTICO 26

¹Aman hallp'aykichispi ruwakunkichischu yanqa dioskunatapas, idolokunatapas, yupaychana saywa rumikunatapas, sumaqchasqa rumikunatapas chaykunaman k'umuykunaykichispaqqa. Ñoqaqa Apu Señor Diosniykichismi kani.

²Samana p'unchayniykunata waqaychaychis, ñoqa yupaychana cheqastapas manchakuychistaq. Ñoqaqa Señor Diosmi kani.

³Unanchayniykunaman hinachus purinkichis, kamachikuyniykunatapas waqaychaspa hunt'ankichis chayqa,

⁴ñoqan tiemponpi parachimpusqaykichis, hinan hallp'aqa ruruchinqa, sach'akunapas rurunqa.

⁵Uvas pallanaykichis tiempopin trigota saruchishankichisraq, tarpunaykichis tiempopin uvastapas pallashankichisraq. Askha mikhunayoqmi kankichis, hallp'aykichispipas mana llakipakuspan tiyankichis.

⁶Ñoqataq chay suyupi sumaqta kawsachisqaykichis, hinan mana piqpa manchachisqan puñunkichis. Suyuykichismanta phiña animaltapas karunchasaqmi, manataqmi suyuykichispi hatun maqanakuy kanqachu.

⁷Awqaykichistan ayqechispa espadawan wañuchinkichis.

⁸Qankunaqa phisqallan pachakta ayqechinkichis, pachaktaq chunka waranqata, hinaspa awqaykichiskunata espadawan wañuchinkichis.

⁹Ñoqan sumaqta qhawarimusqaykichis, mirachisqaykichismi, askhayachisqaykichismi, qankunawan rimanakusqaytan hunt'asaq.

¹⁰Pasaq wata mikhuyta mikhushaspaykichismi mosoq mikhuyta taqenaykichispaq chay taqeta qasichinkichis.

¹¹Qankuna ukhupin tiyasaq, manataqmi qesachasqaykichischu.

¹²Qankunawantaqmi kasaqpas. Diosniykichistaq kasaq, qankunataq llaqtay kankichis.

¹³Ñoqaqa Apu Señor Diosniykichismi kani, Egipto suyumantan horqomurqaykichis ama paykunaq kamachin kanaykichispaq. Kamachiqniykichiskunamantan kacharichimurqaykichis, hinaspan mana manchan-manchantachu purichirqaykichis.

¹⁴Ichaqa qankunachus llapa kamachikusqay simikunata mana kasuspa rimanakusqaytapas p'akispa, mana uyariwankichischu, tukuy chay kamachikuyniykunata mana hunt'ankichischu, unanchayniykunatapas qhawarparinkichis, chaninchasqay simikunatapas pisicharparinkichis chayqa,

¹⁶ñoqapas kaytan ruwallasqaykichistaq: Q'aqchasqaykichismi, hap'ichisqaykichismi tisis onqoywan, ruphapakuy onqoypiwan. Ñawiykichispas ñawsayanqan, kallpaykichispas pisiyanqan. Yanqan muhuykichista tarpunkichis, awqaykichiskunan chayta mikhunqa.

¹⁷Qankuna contran sayarisaq, hinan awqaykichiskuna atipasunkichis. Cheqnikuqniykichiskunan munaychakusunkichis, mana pipas qatishasuqtiykichismi ayqekunkichis.

¹⁸Manataq chaykunawanpas uyariwankichischu chayqa, huchaykichiskunamantaqa qanchis kutitawanraqmi muchuchisqaykichis.

¹⁹Chinkachisaqmi sinchi anchaykachayniykichista. Manapunin parapas paramunqachu, hallp'aykichispas ch'akillañan kanqa.

²⁰Yanqapaqmi llank'ankichis, chakraykichisqa manan rurunqachu, chakra sach'akunapas manan rurunqachu.

²¹Manataqchus kasuwankichis, manataqchus uyariwaytapas munankichis chayqa, huchaykichisman hinan ñoqaqa qanchis kutitawanraq muchuchisqaykichis.

²²Phiña animalkunatapas kachamullasqaykichistaqmi wawaykichista qechunasuykichispaq, uywaykichistapas wañurqarichinanpaq, pisiyachinasuykichispaq ima. Chhaynapin ñanniykichiskunapipas manaña pipas purinqachu.

²³Chaykunawanpas manataq kutirikamuwankichischu, aswanpas contrallaypunitaq kashankichis chayqa,

²⁴ñoqapas contraykichismi sayarisaq, hinaspan huchaykichismanta qanchis kutitawanraq ñoqa kikiy muchuchisqaykichis.

²⁵Rimanakusqayta mana kasusqaykichismantan hatun maqanakuyta chayachimusqaykichis. Llaqtaykichis ukhupichus pakakunkichis chayqa, ñoqan qankuna ukhupi onqoyta rikhurichisaq, awqaykichismanpas hap'iykachisqan kankichis.

²⁶Mikhunata qechupuqtiyqa, chunka warmin ch'ulla hornollapi llapaykichispaq t'antata masanqa, hinaspanmi huk khamuyllataña llapaykichispaq aypachisunkichis, mikhuspaykichistaq mana saksankichischu.

²⁷Chaywanpas manachus uyariwankichis, aswanpas awqayraq kankichis chayqa,

²⁸ñoqan k'arak phiñasqa qankuna contra sayarisaq, hinaspan huchaykichismanta qanchis kutitawanraq ñoqa kikiy muchuchisqaykichis.

²⁹Churiykichispa ususiykichispa aychantan mikhunkichis.

³⁰Orqopi yupaychanaykichistan thunisaq, incienso q'apachina altarniykichistan ñut'usaq, ayaykichistan mana kawsaq idoloykichiskunaman tawqaykusaq, ñoqa kikiytaq millakusqaykichis.

³¹Llaqtaykichiskunatan raqayman tukuchisaq, yupaychanaykichis cheqaskunatan purunyachipusaq, manañataqmi sumaq q'apaq sacrificioykichiskunatapas chaskisaqchu.

³²Hallp'aykichistapas purunyachisaqmi, hinan chaypi tiyaq awqaykichiskunaqa chaymanta utirayanqaku.

³³Hatun maqanakuywanmi muchuchisqaykichis, hinaspan hatun suyukunaman ch'eqechisqaykichis, hallp'aykichistaq purunyachisqa kapunqa.

³⁴Hinaqtinmi llapa purunyachisqa kasqan p'unchaykunapi hallp'aqa samana p'unchayninkunata samakapunqa, awqaykichiskunaq hallp'anpi kashanaykichiskama.

³⁵Tukuy purunyachisqa kasqan tiempopin samanqa chaypi tiyashaqtiykichis p'unchaykunapi mana samasqanmanta.

³⁶Qankunamanta puchuq runakunatataq awqaykichispa suyunpi sonqonkuta manchapachisaq, urmaykuq raphiq “chhaq” nisqallanmi paykunataqa qatirinqa, chaymi hatun maqanakuymanta ayqekuq hina ayqespa mana pipas qatishaqtin kumpakunqaku.

³⁷Awqa-tinkuypipas kashankuman hinan mana pipas paykunata qatishaqtin sarunakunqaku. Manataqmi awqaykichiskunawan maqanakuyta atinkichischu.

³⁸Hatun suyukuna ukhupin wañunkichis, awqaykichiskunaq suyunpitaq tukukunkichis.

³⁹Puchuqniykichistaq awqaykichiskunaq hallp'anpi huchallikusqankumanta tayta-mamankuq huchallikusqanmantawan tulluyapunqaku.

⁴⁰Hinan contrayta huchallikusqankutapas tayta-mamankuq huchallikusqantapas cheqnikuwasqankutapas reqsikuspa willakunqaku.

⁴¹Chay hinata huchallikuqtinkun paykunataqa cheqnikurqani, hinaspan awqankuq suyunman paykunata apachirqani. Chaykunawanchus chay rumi sonqokuna k'umuykukunqaku, huchallikusqankutapas reqsikunqaku chayqa,

⁴²ñoqan Jacobwan rimanakusqaytapas, Isaacwan rimanakusqaytapas, Abrahamwan rimanakusqaytapas yuyarisaq, hallp'ankutapas yuyarillasaqtaq.

⁴³Ichaqa hallp'ankutan saqepunqaku, chaymi ch'inta saqepuqtinku samana p'unchayninkunapi samakunqa. Paykunaqa huchallikusqankumantan muchuchisqa kanqaku kamachikuyniykunata pisicharparisqankurayku, unanchayniy simikunatapas mana munasqankurayku.

⁴⁴Chaypas awqankuq hallp'anpi kashaqtinkupas manan ñoqaqa paykunata wikch'usaqchu, hinaña paykunata cheqnikusaq chaypas, manan pasaqtachu ch'usaqyachisaq, paykunawan rimanakusqaytapas manan yanqayachisaqchu. Ñoqaqa Apu Señor Diosninkun kani.

⁴⁵Aswanpas paykunataqa uyarisaqmi machulankuwan rimanakusqayrayku, paykunatan hatun suyukunaq rikushasqan Egipto suyumanta horqomurqani Diosninku kanaypaq. Ñoqaqa Señor Diosmi kani, nispa, nispayki.

⁴⁶Chay unanchay simikunatan, kamachikuykunatan, yachachikuy simikunatawan Señor Diosqa Israel runakunapaq Sinaí orqopi Moiseswan churachirqan.