Read Quechua Cuzco Bible 1988 LEVÍTICO 8 Bible Online

LEVÍTICO 8 - Quechua Cuzco Bible 1988 bible

LEVÍTICO 8

¹Señor Diosmi Moisesta nirqan:

²—Pusay Aaronta churinkunatapas Ñoqawan Tupana Karpaman, apallaytaq p'achakunatapas, hawina aceitetapas, hucha pampachaypaq torillotapas, iskaynin anejotapas, mana qonchuyoq t'antantin canastatapas.

³Hinaspa llaqtantinta Karpa haykunaman huñuy, nispa.

⁴Hinan Moisesqa Señor Diospa payta kamachisqanman hina ruwarqan, chaymi llaqtaqa huñuykukurqan Karpa haykunaman.

⁵Moisestaq llaqtata nirqan: —Señor Diosmi kay hina ruwanaypaq kamachimuwan, nispa.

⁶Hinaspan Moisesqa Aaronta churinkunatawan asuykachikuspa unuwan bañachirqan.

⁷Chaymantataq Aaronta sotanawan churaspa watuwan wataykurqan. Hinaspataq llaqollawan churaykurqan, chay patamantaq unkuwan churaykurqan, chaytataq unku chumpiwan wataykuspa unkuta mat'iykurqan.

⁸Chay patamantaq qhasqo-ch'uspata churarqan, chaypitaq churarqan Señor Diospa munaynin tapuna Urimta Tumimtawan.

⁹Hinaspanmi umanman churaykurqan uma k'uyunata, uma k'uyunamantaq qori llaphllata churarqan Señor Diospaq t'aqasqa kasqanta rikuchinanpaq. Chaykunatan ruwarqan Señor Diospa payta kamachisqanman hina.

¹⁰Chaymantataq Moisesqa hawina aceiteta hap'ispa ch'aqchurqan Karpata chaypi tukuy imaymana kaqtawan Señor Diospaq t'aqananpaq.

¹¹Chay aceitetan qanchis kutita altar pataman ch'allaykurqan, hinaspan Señor Diospaq t'aqananpaq ch'aqchurqan altarta tukuy imaymanantinta, tiyanayoq puruñatapas.

¹²Hawina aceitetan Aaronpa umanman hich'aykuspa Señor Diospaq t'aqananpaq payta hawiykurqan.

¹³Chaymantataq Moisesqa Aaronpa churinkunata qayllaykachikurqan, hinaspan paykunaman sotanata churaykurqan, chumpikunawan chumpiykachirqan, uma chukukunawanpas churaykurqan, Señor Diospa payta kamachisqanman hina.

¹⁴Hinamantataq hucha pampachaypaq torillota apachimurqan, Aaronwan churinkunawantaq umanman makinkuta churaykurqanku,

¹⁵chaymantataq chayta nak'arqan. Moisesmi yawarta hoqarispa altar waqrakunata dedonwan llusiykurqan altarta ch'uyanchananpaq. Wakin yawartataq altar chakiman hich'aykurqan, chay hinatan altarta ch'uyanchaspa Señor Diospaq t'aqarqan.

¹⁶Hinaspataq wiksa llika wirata hap'irqan, sullk'a k'ipchantapas, iskaynin ruruntapas chaykuna qayllapi kaq wirantinta, hinaspan Moisesqa chaykunata altar patapi ruphachirqan.

¹⁷Torilloq qarantawan aychantawan phusnuntawantaq ichaqa karpa-karpa hawapi ruphachirqan, Señor Diospa payta kamachisqanman hina.

¹⁸Hinamantataq Moisesqa ruphachina anejota apachimurqan, Aaronwan churinkunawantaq anejoq umanman makinkuta churaykurqanku,

¹⁹hinaspataq chayta nak'arqan. Moisesmi yawarta altar muyuriq qhataman hich'aykurqan.

²⁰Chaymantataq Moisesqa anejota kuchurqarispa, ruphachirqan umanta, kuchurqarisqa aychata, wirata ima.

²¹Hinaspataq unuwan maqchirqan ch'unchulkunata chakankunatawan, hinaspan anejota llapallanta altarpi ruphachirqan. Chayqa ruphachina sacrificion, Señor Diospaq mikhuna ofrenda, q'apaynintaq Señor Diospa sonqonman chayarqan. Chaykunatan Moisesqa ruwarqan Señor Diospa kamachisqanman hina.

²²Chaymantataq sacerdote churana hukkaq anejotawan apachimurqan, Aaronwan churinkunawantaq makinkuta churaykurqanku anejoq umanman.

²³Chayta nak'aspataq Moisesqa yawarwan llusiykurqan Aaronpa paña ninrin ura puntata, paña makinpa mama dedonta, paña chakinpa mama dedontawan.

²⁴Hinallataq Moisesqa Aaronpa churinkunata qayllaykachikuspa yawarwan llusiykurqan paña ninrinkuq ura puntanta, paña makinkuq mama dedonta, paña chakinkuq mama dedontawan. Wakin yawartataq Moisesqa altar muyuriq qhataman hich'aykurqan.

²⁵Hinamantataq hap'irqan wirata, chupata, wiksa llika wiratapas, sullk'a k'ipchantapas, iskaynin ruruntapas, chaykuna qayllapi kaq wiratapas, paña chakantapas.

²⁶Hinallataq Señor Diospa ñawpaqenpi kaq mana qonchuyoq t'anta canastamanta hoqarirqan mana qonchuyoq t'antata, aceiteyoq q'apisqa tortatapas, llaphllallaña t'antatapas, hinaspan chaykunata churarqan wira pataman paña chakan patamanwan.

²⁷Hinaspanmi llapanta Aaronpa makinman churinkunaq makinmanwan phoqtuykurqan, paykunataq chaykunata Señor Diospaq t'aqarqanku sumaq sonqo allin ofrendata.

²⁸Chaymantataq Moisesqa chaykunata makinkumanta chaskirqan, hinaspan altarpi ruphachina sacrificio patapi ruphachirqan. Chaykunaqa karqan paykunata sacerdote kanankupaq churay ofrendan, Señor Diospaq mikhuna ofrenda, q'apayninqa Señor Diospa sonqonmanmi chayarqan.

²⁹Hinamantataq Moisesqa chay pechonta hap'ispa Señor Diosman sumaq sonqota hina haywarqan. Chay pechonqa karqan sacerdote churana anejomanta Moisesman tupaqmi. Moisesmi chaykunata ruwarqan Señor Diospa kamachisqanman hina.

³⁰Hinaspataq Moisesqa hawina aceiteta hoqarirqan, altar patapi kashaq yawartawan, hinaspan ch'aqchuykurqan Aaronman p'achanmanwan churinkunaman p'achankumanwan. Chay hinatan Señor Diospaq t'aqarqan Aaronta, p'achantapas, churinkunatapas, p'achankutawan.

³¹Hinaspan Moisesqa Aaronta churinkunatawan nirqan: — Aychata chayachiychis Dioswan Tupana Karpa punkupi, hinaspa chay aychata chaypi mikhuychis canastapi kashaq sacerdote churana ofrendakunatawan: Aaronwan churinkunawanmi chayta mikhunqa, nispa Señor Diospa kamachisqanman hina.

³²Aychamanta t'antamanta puchuqtataq ninaman kanapunkichis.

³³Karpaman haykunamantaqa aman qanchis p'unchaynintin lloqsinkichischu, sacerdote churasqa kasqaykichis qanchis p'unchay hunt'akunankama.

³⁴Kay p'unchay ruwasqatan Señor Diosqa kamachikurqan huchaykichis pampachasqa kananpaq.

³⁵Karpa punkupin qanchis p'unchaypacha tutantin p'unchaynintin qhepakunkichis, ahinapin Señor Diospa kamachisqanta hunt'ankichis ama wañunaykichispaq. Ahinatan ñoqataqa kamachiwarqan, nispa.

³⁶Hinan Aaronwan churinkunawan tukuy imaymanata ruwarqanku Señor Diospa Moiseswan kamachikusqanta.