Read Quechua Cuzco Bible 1988 JEREMÍAS 1 Bible Online

JEREMÍAS 1 - Quechua Cuzco Bible 1988 bible

JEREMÍAS 1

¹Kay qelqan willakun Hilkiaspa churin Jeremiaspa rimasqankunata ruwasqankunatawan. Jeremiasqa Benjamín ayllu hallp'api Anatot llaqtamantan karqan, ayllunkunaqa sacerdotekunan karqan.

²Señor Diosmi Jeremiasman rimapayarqan Amonpa churin Josías chunka iskayniyoq wata kurakña Judapi rey kashaqtin.

³Chaymantapas rimapayallarqantaq Josiaspa churin Joakim Judapi rey kashaqtin, rimapayallaqpunitaq Josiaspa churin Sedekías Judapi chunka hukniyoq wata rey kanankama. Chay wataq phisqa killanpitaq Jerusalén llaqta runakunaqa Babilonia suyuman kamachipaq apasqa kapurqanku.

⁴Señor Diosmi niwarqan:

⁵Mamaykiq wiksanpi manaraq kashaqtiykin akllakurqayki, manaraq nacemushaqtiykin t'aqakurqayki, hatun suyukunapaq profeta kanaykipaqmi churarqayki, nispa.

⁶Ñoqataq nirqani: ¡Ay Qollana Señor Diosníy! Sinchi waynallaraqmi kani, manan rimaytapas yachaniraqchu, nispa.

⁷Señor Diostaq ichaqa niwarqan: Ama sinchi waynallaraqmi kani, niychu. Maytachus “Riy” nisqaytan rinki, ñoqaq kamachisqaytataqmi nimunki.

⁸Aman pitapas manchakunkichu, ñoqan qanwan kashasaq amachanaypaq, ñoqa Señor Diosmi chayta nishayki, nispa.

⁹Chaymantataqmi Señor Diosqa makinta haywarimuwaspa simiyta tupaykuwarqan, niwarqantaq:

¹⁰Ñoqan simiykiman simiyta qoyki rimanaykipaq. Kunanmi huk kamachikuqta churayki hatun suyukunamanpas huch'uy suyukunamanpas, qanmi t'irankipas kumpankipas, qanmi chhallunkipas ñut'unkipas, qantaqmi sayarichinkipas takyachinkipas, nispa.

¹¹Señor Diosqa nillawarqantaqmi: Jeremías, ¿imatan rikushanki? nispa. Ñoqataq kutichirqani: Almendro mallki k'allmatan rikushani, nispa.

¹²Señor Diostaq niwarqan: Allintan rikusqanki, ñoqaqa qhawashallasaqpunin[1] simiykuna hunt'akunantaqa, nispa.

¹³Wakmantan Señor Diosqa tapuykuwarqan: ¿Imatan rikushanki? nispa. Ñoqataq kutichirqani: T'impushaq mankatan rikushani, wichay ladomanta kaykamaraq wasapasqan chayamushaqtan, nispa.

¹⁴Señor Diostaq niwarqan: Wichay ladomantan wasapamunqa hatun llakikuna llapan kay suyupi tiyaq runakunaman.

¹⁵Ñoqa kikiymi waqyashani llapan wichay lado suyukunata hamunankupaq. Reyninkun hamunqaku, Jerusalenman haykuna kikin punkukunapin kamachikuy tiyanankuta wakichikunqaku. Llaqta muyuriq perqa contran kanqaku, Judá llaqtakunatan muyuykunqaku.

¹⁶Ñoqan llaqtayta muchuchisaq saqerpariwasqanku huchankumanta, paykunan wak dioskunaman inciensota q'osñichirqanku, paykunaq ruwasqanku idolokunatan yupaycharqanku.

¹⁷Qanqa allintapuni chumpiykita mat'iykukuy, sayariy, ñoqaq kamachisqay simita llapanta willamuy. Aman mancharikunkichu, mancharikunkichus chayqa, ñoqan paykunaq ñawpaqenpi khatatatachisqayki.

¹⁸Kunanmi qanta tukuchiyki allin kallpachasqa llaqtata hina, fierromanta wasi tusata hina, broncemanta perqata hina, Judá reykunawan, uma runakunawan, sacerdotekunawan, llapan runakunawanpas churanakunaykipaq.

¹⁹Paykunan contraykipi sayarinqaku ichaqa manan atipasunkikuchu, amachanaypaq qanwan kashasqayrayku. Ñoqa Señor Diosmi chayta nishayki, nispa.