Read Quechua Cuzco Bible 1988 JEREMÍAS 10 Bible Online

JEREMÍAS 10 - Quechua Cuzco Bible 1988 bible

JEREMÍAS 10

¹Israel llaqta, uyariy Señor Diospa nisqasuykita.

²Paymi nin: Ama yachaqakuychischu wak llaqtakunaq ruwasqanmanta, amataq mancharikuychischu hanaq pachapi imatapas rikuspa watupakuqkunawan, hinaña chay suyukuna hina ruwaqpuni kanku chaypas.

³Chay runakunaq diosninkumanta yachachikuyninqa yanqan. Mallki-mallkimantan kurkuta wit'urqamunku, kurku llaqllaqtaq q'allananwan llaqllarparin.

⁴Chaymantataq qoriwan qolqewan k'achancharqon, clavokunawan takarqarispataq allin-allinta hap'irqarichin mana kuyunanpaq.

⁵Idolonkuqa pepino tarpusqa chakrapi pisqo manchachina saywa hinan. Chaykunaqa manan rimaqchu, wantuykachanallan mana puriq kaspanku. Ama manchakuychischu chaykunataqa, manan pitapas mana allintaqa ruwanmanchu, manallataq pitapas allintaqa ruwanmanchu, nispa.

⁶Señor Diosníy, qan hinaqa manan pipas kanchu. Qanqa atiyniyoqmi kanki, sutiykiqa hatunmi qhapaqtaq.

⁷Qanmi kanki suyukunaq Reyninqa, ¿pitaq manari manchakusunkimanchu? Kay pachapi reykuna yachayniyoqkuna ukhupiqa qanllapunin manchakunaqa kanki, qan hinaqa manan pipas kanchu.

⁸Llapallankun mana yuyayniyoqkuna kanku, kurkumanta idolonkuqa manan imatapas yachachinmanchu.

⁹Idolonkuqa España suyumanta apamusqa qolqe llaphllawan qatasqallan, diosninkuqa Ufaz suyumanta apamusqa qori llaphllawan p'istusqallan. Idolonkuqa kurku llaqllaqpa qori ch'uyanchaqpa ruwasqallanmi, p'achankuqa llawlli-pukamanta rawraq-pukamantawanmi, llapan chaykunaqa allin awaqkunaq ruwasqanmi.

¹⁰Qan Señorllan ichaqa cheqaq Diospuni kanki, kawsaq Dios, wiñay Rey, phiñakuqtiykipas pacharaqmi kuyurin, phiñakuqtiykiqa manan suyukunapas sayanmanchu.

¹¹Qankunaqa, Israel runakuna, wak suyu runakunata niychis: Kay pachatapas hanaq pachatapas mana ruwaq dioskunaqa ch'usaqyachipusqan kay pachamanta kanqa, manapunin hukllapas hanaq pachaq uranpiqa qhepanqachu, nispa.

¹²Atiyninwanmi Señor Diosqa kay pachata ruwarqan, yachayninwanmi teqsimuyuntinta takyachirqan, yuyayninwanmi hanaq pachatapas mast'arirqan.

¹³Kunununuq kunkawanmi hanaq pacha unupas qaparin, hinantinmanta pacha phuyutapas sayarichin, paratapas parachin illapatapas lliphllikichin, waqaychasqa ukhumantan wayratapas horqomun.

¹⁴Lliw runataq mana yuyayniyoq uma muyusqakuna, qori ch'uyanchaq runaqa ídolo ruwasqanmantan uyanta mana maymanpas churayta atinchu, ídolo ruwasqanqa mana kawsaq q'otulla kasqanmanta.

¹⁵Mana imapaq valeq pukllana kasqanmi kanku, p'uchukay p'unchaypin Señor Diosqa chaykunata thunipunqa.

¹⁶Chaykunamantaqa Jacobpa Diosninqa huk niraqpunin, paymi tukuy imaymanakuna kamaq, paymi Israelta akllakurqan kaqnin kananpaq, Tukuy-atiyniyoq Señor Diostaqmi sutinqa.

¹⁷Yaw awqaq muyuykusqan ukhupi kashaq llaqta, kaqniykikunata q'epichakuy.

¹⁸Señor Diosmi nin: Kay kutipiqa karumanmi warak'arparisaq kay suyupi tiyaq runakunata. Aswantan mat'iykusaq, pasaqtapunin paykunataqa ch'irwarqosaq, nispa.

¹⁹Llaqtataq qaparirqan: ¡Imanaykusaqtaq kay nanaypi rikukuspay! ¡K'iriykunapas mana hampiy atiymi! Ñoqaqa yuyarqanin: Chay nanayqa muchunallachá, nispaymi.

²⁰Karpaykunapas lliwmi thunisqa, watanankunapas llapanñan p'itisqa. Wawaykunapas llapanmi wikch'upuwarqan, manapunin kapunkuñachu. Manapunin pillapas kanñachu wakmanta karpay sayarichiqllapas, ukhunpi t'aqaqninkunata ruwaqllapas, nispa.

²¹Ñoqataq nirqani: Kay llaqtaq michiqninkunaqa mana yuyayniyoqkunan, manan Señor Diostapas maskhankuchu, chayraykun qaqaparqanku, llapan ovejankunapas ch'eqechisqan kashanku.

²²¡Uyariychis! ¡Huk willakuymi chayarqamun! Wichay lado huk llaqtamantas hatun ch'aqway hamushan, Judapi llaqtakunatas ch'usaq purunman tukuchinqa, chacal nisqa animalkunaq tiyananmansi tukuchinqa, nispa.

²³Señor Diosmantaq nirqani: Señor Diosníy, yachanin, manan runaq munayninchu imayna kananpaqpas, runaqa manan yachakunchu imayna kanantapas.

²⁴Chaninchayniykiman hina wanachiwayku ama phiñakuspalla, phiñakuspaqa thunirqowankikumanmi.

²⁵Phiñakuyniykitaqa chayachiy mana reqsiqniyki suyukunaman, sutiyki mana yupaychaq llaqtakuna pataman. Jacobpa llaqtantaqa paykunan wañuchirqanku, paytaqa pasaqtan thunipurqanku, suyuntintan raqay-raqayta ruwaykapurqanku, nispa.