Read Quechua Cuzco Bible 1988 JEREMÍAS 11 Bible Online

JEREMÍAS 11 - Quechua Cuzco Bible 1988 bible

JEREMÍAS 11

¹Señor Diosmi niwarqan:

²Rimanakusqay simita uyarispa Judá runakunaman Jerusalenpi tiyaqkunamanwan willay:

³Israelpa Diosnin Señormi nin: Kay rimanakuyta mana kasuq runaqa llapanmi ñakasqa kanqa.

⁴Machulaykichispaqmi Egipto llaqtaqa fierro unuyachina horno hina karqan, chaymanta horqomushaspaymi paykunawan rimanakuspa nirqani: Uyariwaychis llapan nisqayta, kasuwaychistaq kamachisqaytapas. Chay hinapin qankunaqa llaqtay kankichis, ñoqataq Diosniykichis kasaq.

⁵Ahinapin machulaykichisman juraspa prometesqayta hunt'anay kanqa, paykunamanmi imaymanaq hunt'asqa wiñanan hallp'ata qoyta prometerqani, imaynan kunan p'unchay qoshaykichis hinata, nispa, nispayki. Ñoqataq kutichirqani: Arí, Señor Diosníy, chay hinapuni kachun, nispa.

⁶Hinan Señor Diosqa nillawarqantaq: Kayta willaykuy Judá suyu llaqtakunapi Jerusalén callekunapipas: Uyariychis kay rimanakusqa simikunata, hinaspa hunt'aychis.

⁷Machulaykichiskunata Egiptomanta horqomushaspaymi, allin-allinta ñawpaqmanta paykunaman willarqani kasuwanankupaq, kunan p'unchaykamapas llaqtaymanqa willapayashallanipunin.

⁸Ichaqa manan kasuwarqankuchu manataq uyariwarqankupaschu, aswanmi sapankanku sonqonkuq millay kasqanman hina purirqanku. Manapunin hunt'ayta munarqankuchu rimanakusqayman hinaqa, chaymi imaynan rimanakusqanchispi karqan ñak'arichinaypaq chayta hunt'arqani, nispayki, nispa.

⁹Señor Diosqa nillawarqantaqmi: Judá runakunaqa Jerusalenpi tiyaqkunapiwanmi ñoqa contra rimanakuspa,

¹⁰kasqan machulankuq hucha ruwasqanman kutiripurqanku, paykunaqa manan uyariwayta munarqankuchu, aswanmi wak dioskuna yupaychaq ripushanku. Judá llaqtapas Israel llaqtantin machulankuwan rimanakusqayta p'akipunku.

¹¹Chayraykun paykunaman kachamusaq mana ayqey atinankupaq hatun llakita. Hinan waqyakamuwanqaku yanapanayta munaspa, manapunitaq uyarisaqpaschu.

¹²Chaymantataq Judá runakunaqa Jerusalén runakunapiwan sacrificio ruphachisqanku dioskunaman rispa yanapayta mañakunqaku, chaykunaqa manataqmi qespichiyta atinqachu hatun llaki chayamuqtinqa, nispa.

¹³Señor Diosmi llaqtanta nirqan: Yaw Judá, askha llaqtaykiq kasqanman hinan askha diosniykikunaqa, imaynan Jerusalén callekunaqa askha, hinallataqmi millay Baal nisqa diosman sacrificio ruphachina altarniykipas askha, nispa.

¹⁴Chaymi Señor Diosqa nillawarqantaq: Qanqa aman chay runakunapaq mañapunkichu, aman paykunamanta valepakuwankichu, manan paykunataqa uyarisaqchu hatun llakipiña rikukuqtinkupas, nispa.

¹⁵Señor Diosmi llaqtanta nillarqantaq: Sumaq wayllusqay llaqtalláy, qanqa millaykunatan ruwashanki, chayri, ¿imañataq ruwanayki ñoqa yupaychana wasipiri? ¿Qanqa yuyankichu aychakuna haywamuwasqaykiwan prometekusqaykipiwan hatun llakimanta pakakuyta? ¿Yuyankichu chayta ruwaspa kusikuyta?

¹⁶Huk p'unchaymi sutiyarqayki sumaq llanllashaq rurusapa olivo mallkita, kunantaqmi chikchi t'oqyaq hinaraq rawrarispa raphiykikunata ruphasaq, k'allmaykikunatapas p'akisaq.

¹⁷Ñoqa Tukuy-atiyniyoq Señor Diosmi plantarqayki, kunantaqmi ichaqa qankuna contra hatun llakita kachamushani. Qankunan, Israelpiwan Judapiwan, mana chaninta ruwaspa Baal nisqa dioskunaman sacrificiota haywaspaykichis phiñachimuwarqankichis, nispa.

¹⁸Señor Diosmi willaykuwarqan awqaykunaq mana allin ruway yuyaykuwasqankuta, paymi ñawiyta kichariwarqan qhawanaypaq.

¹⁹Ñoqaqa llakhillan kasharqani, nak'anaman apanapaq borrego hina, mana allin ruwanawankuta mana yachaspa. Paykunaqa nisharqankuñan: Chay mallkita q'omerllaraq kashaqtin wit'urqapusun, mana pipas paymanta yuyarinanpaq hukpaqkama sipirqapusun, nispa.

²⁰Ñoqan mañakurqani: Tukuy-atiyniyoq Señor Diosnilláy, qanmi chanin t'aqtaq kanki, qanmi runaq yuyaynintaqa llapanta yachanki, Makiykimanmi kawsayniyta hap'iykachimurqayki, qanpuni rikuchiway chay runakuna muchuchisqaykita, nispa.

²¹Anatot runakunan wañuchiyta munaspa niwarqanku: Aman Señor Diospa sutinpi rimankichu, mana chayqa wañurqachisqaykikun, nispa.

²²Chaymi Tukuy-atiyniyoq Señor Diosqa paykunamanta nirqan: Cheqaqtapunin paykunataqa ñak'arichisaq. Waynakunan maqanakuypi wañuranqaku, churinkuwan ususinkuwantaqmi yarqaymanta wañuranqaku,

²³manataq hukllapas paykunamanta qhepaq kanqachu. Chayamunqan wañurananku wataqa, chaypitaqmi ñoqa pasaqtapuni ñak'arichisaq, nispa.