Read Quechua Cuzco Bible 1988 JEREMÍAS 12 Bible Online

JEREMÍAS 12 - Quechua Cuzco Bible 1988 bible

JEREMÍAS 12

¹Señor Diosníy, qanwan churanakuqtiyqa, qanpunin chaninqa rikhurinki. Chaytukuywanpas tapurikuytan munayki imanaqtinchus imakunapas kasqanmanta. ¿Imanaqtintaq millay runakunaqa allinpuni kanku? ¿Imanaqtintaq runamasin qaraykuqkunaqa kusisqa tiyakunku?

²Qanmi plantanki, paykunataq saphirinku, wiñaspataq rurunku. Simillankuwanmi yupaychashasunkiku, sonqonkuwantaqmi ichaqa qanmanta mana yuyarillankupaschu.

³Ñoqatan ichaqa reqsiwankupuni, Señor Diosníy, qanqa rikuwankin, qanmanta yuyasqaykunata t'aqwiwanki. Chay runakunata ovejata hina nak'anaman apay, wañurqarichina p'unchaypaq tuyrurqariy.

⁴¿Hayk'aqkamataq hallp'aqa ch'akilla kanqa? ¿Hayk'aqkamataq pampapi qarakunapas tuntinqa? Animalkunapas phalaq animalkunapas lliwmi wañupushan, chay suyu runakunaq millay ruwasqan hawa, paykunaqa ninkun: Ruwasqanchistaqa manan Diosqa rikunchu, nispa.

⁵Señor Diostaq niwarqan: Chakipi phawaq runakunaq qhepanta phawaspallaraq sayk'unki chayri, ¿imaynataraqtaq sayk'uwaq caballopi phawaqwan phawaspari? Sumaq llaqtapi kashaspapas mana imatapas reparankichu chayri, ¿imaynañataq kapuwaq Jordanpa sach'a-sach'a wayq'onpiri?

⁶Aylluykimanta wawqeykikunallaraqtaqmi wañuyman qaraykusunkiku, qaparkachamuspataq qatiykachashasunkiku. Chayrayku ama paykunaman hap'ipakuychu, sumaq simiwanña rimapayashaqtinpas, nispa.

⁷Señor Diosmi nillarqantaq: Llaqtaytaqa saqerparipurqanin, akllakusqaytaqa wikch'upurqanin, ñoqan chay sinchi munasqaytaqa awqanpa makinman hap'iykachirqani.

⁸Akllakusqay llaqtaymi kutipakuwarqan, yunkapi león hinaraqmi contrayta qaparirqan, chayraykun cheqnikapuni.

⁹Llaqtayqa sumaq phuruyoq phalaq animal hinan, mikhukuq ankakunaq muyuykusqan. ¡Waqyamuychis llapan salqa animalkunata mikhuq hamunankupaq!

¹⁰Askha michiqkunan uvas chakrayta chaqoykurqanku, hallp'aytapas saruykurqanku. Sumaq munasqay hallp'aytan pasaq purunman tukuchirqanku.

¹¹Sinchi ch'usaqtan tukuchirqanku, waqaraqllatañan rikushani. Llapan suyupin purunyachisqa kapushan, manataqmi pimanpas imapas qokunchu.

¹²Llapan ch'inneqpi pata pampakunamanmi llat'anaqkuna wakwaykurqanku, chaykunaqa Señor Diospa espadanmi suyuntinpi k'uchunmanta-k'uchunkama wañuchinanpaq, manataqmi pipaqpas thak-kay kanqachu.

¹³Trigotan t'akarqanku, khiskallatataq hoqarirqanku, ñoqaq rawrashaq phiñakuyniy hawa. Lliw ima llank'asqankupas yanqakaman karqan, mikhuy hoqariypitaq kallpanku wañurqan, nispa.

¹⁴Señor Diosmi nirqan: Israelpa millay llaqtamasinkunamanmi rimapayayta munashani. Paykunan llaqtayman hallp'anku kananpaq qosqayta purunyachirqanku. Paykunatan suyunkumanta wikch'usaq, chaykuna ukhumantataqmi Judá llaqtayta horqokapusaq.

¹⁵Wikch'usqay qhepatataqmi paykunata khuyapayasaq, hinaspan kutichimpusaq kaqta llaqtanman hallp'anmanwan.

¹⁶Ñawpaqmi llaqtamasinkunaqa llaqtayta yachachirqan Baalpa sutinpi jurayta, kunataq ichaqa llaqtaywan tiyanankupaq kaykunata ruwananku: Imaynan llaqtayqa serviwan, chay hinatan serviwananku, kaqllataq ñoqaq sutiypi jurananku.

¹⁷Mana kasukuq llaqtatan ichaqa saphinmanta t'iraspa wikch'upusaq, nispan nin Señor Diosqa.