Read Quechua Cuzco Bible 1988 JEREMÍAS 13 Bible Online

JEREMÍAS 13 - Quechua Cuzco Bible 1988 bible

JEREMÍAS 13

¹Señor Diosmi niwarqan: Riy, linomanta p'alta chumpita rantikamuy, hinaspa chumpiykukunki, ichaqa amaraq unuman tupachinkichu, nispa.

²Ñoqataq Señor Diospa niwasqanman hina rantikamuspay chumpikurqani.

³Señor Diosqa nillawarqantaqmi:

⁴Chay rantispa chumpikusqayki chumpita aparikuspa Perat llaqtata riy, chaypitaq qaqa k'aktuman pakaykamuy, nispa.

⁵Ñoqataq Señor Diospa kamachiwasqanman hina Perat llaqtapi pakamurqani.

⁶Unay p'unchaymantañataq Señor Diosqa wakmanta niwarqan: Perat llaqtata riy, hinaspa chay pakasqayki chumpita apamuy, nispa.

⁷Ñoqataq Perat llaqtata rirqani, hallp'amanta horqoqtiytaq chumpiqa ismusqaña kapusqa, mana imapaq valeq.

⁸Hinan Señor Diosqa nillawarqantaq:

⁹Chay kasqallantapunin ismuchisaq Judapa uma hoqariq-kayninta Jerusalenpa sinchi uma hoqariq-kaynintawan.

¹⁰Kay millay llaqtaqa manapunin kamachiyta kasuyta munapunkuchu, aswanmi millay sonqonkuq kamachisqanta ruwapushanku, wak dioskunatataq servispa yupaychashanku, chay ismusqa p'alta chumpi hinan mana imapaq valeq kanku.

¹¹Imaynan chumpiqa ñañu wasata mat'iykun, chay hinatan ruwarqani Israel llaqtata Judá llaqtatawan ñoqaman k'askasqa kawsanankupaq. Ñoqaqa munarqanin paykuna llaqtay kananta, mentasqata ruwawanankuta, yupaychawanankuta, hatunchawanankutawan, paykunataq ichaqa mana uyariwarqankuchu.

¹²Nillankitaq paykunaman: Israelpa Diosnin Señormi nin: Llapa tuminmanmi vino hunt'achikunqa, nispa. Israel runakunataqmi nisunki: ¿Kunallanraqchu uyarikushan tuminman vino hunt'achinari? nispa,

¹³niqtinkun, qan kutichinki: Señor Diosmi nin: Llapan kay suyupi kaq runakunatan macharqarichisaq, Davidpa kamachikuy tiyananpi tiyaq reytapas, sacerdotekunatapas, profetakunatapas, Jerusalenpi llapan tiyaqkunatapas.

¹⁴Chaymantataqmi tuminta hina paykuna purata takanachispa p'akisaq, taytanta churintawan. Manapunin pitapas khuyapayasaqchu, llapallantapunin chhallusaq, nispa, nispayki.

¹⁵Israel runakuna, ¡Señor Diosmi rimanña! ¡Amapuni umata hoqariychischu! ¡Allintapuni uyariychis!

¹⁶Hatunchaychis Apu Señor Diosniykichista manaraq tutayachimushaqtin qankunaqa misk'akuwaqchismi tutayaq orqokunapi. Yupaychaychis Apu Señor Diosniykichista suyakusqaykichis sumaq k'anchayta manaraq laqhayaqman tukuchispa llanthuykachimushaqtin.

¹⁷Manataqchus qankuna kasukunkichis chayqa, pakallapin waqasaq uma hoqariq kasqaykichismanta. Ñawiymantan weqe unu surunqa, sonqoy lloqsinankaman waqaykusaq Señor Diospa llaqtan apasqa kasqanmanta.

¹⁸Reyta mamantawan niy: Kamachikuy tiyanamanta uraykuychis, ñan umaykichismanta pilluykichis urmaykunña, sumaq k'achanchaq coronaykichis urmaykunña.

¹⁹Neguev ch'inneqpi llaqtakunapas awqanpa muyuykusqanñan kashan, manañan pipas haykunmanñachu. Llapanñan Judapas pichaspa apasqaraq kapushan, wak suyuman pasaq apasqan kapun, nispa.

²⁰¡Yaw Jerusalén, ñawiykita kichariy! ¡Qhawariy wichaymanta awqaq hamusqanta! ¿Maytaq michinaykipaq qosqay ovejakunari? ¿Maytaq chay “allichachaq ovejaykuna” ninaykiri?

²¹¿Ima ninkitaq qanpa “reqsisqaymi” nisqayki runa qanta atipaspa kamachiqniyki kapuqtinri? ¿Manachu wachakuq warmita hina chaymanta nanay hap'isunki?

²²Ichapaschá ninki: ¿Imanaqtinmi kaykuna kawan? nispayki. Chaykunaqa hatun huchaykikunamantan kasunki, chayraykun q'alarparisqa rikukunki, hukkunaq violasqantaq karqanki.

²³¿Yana runaq yana kaynin yuraqyanmanchu? ¿Leopardoq alqa-kaynin chinkanmanchu? Qankunapas millay ruwayta yachaykuspari, ¿allinkaq ruwayta atiwaqchisñachu?

²⁴Chayraykun qankunata cheqnichisqaykichis ch'inneq wayra ichhu q'opata apashan hinataraq.

²⁵Chay hina ruwasqan qanpas kanki, chay hina kanaykin chayamushasunki, ñoqata qonqapuwasqaykimanta yanqa dioskunaman sonqollikusqaykimanta. Ñoqa Señor Diosmi chayta nishayki.

²⁶Ñoqapas pasaqtan q'alarparisqayki q'ala-kayniykita rikunankupaq.

²⁷Ñoqan rikuyki cheqnikusqaykaqta ruwashaqta, orqokunapin pampakunapin rikuyki wasanchashawaqta, uywa hina mana p'enqakuspa hucha ruwashaqta, millay qhellipi purishaqtapas. ¡Imaraqmi qanmanta Jerusalén! ¿Hayk'aqkamataq mana ch'uyanchakunkichu? nispa.