Read Quechua Cuzco Bible 1988 JEREMÍAS 14 Bible Online

JEREMÍAS 14 - Quechua Cuzco Bible 1988 bible

JEREMÍAS 14

¹Ch'akiriykapusqan hawataq Señor Diosqa rimapayarqan:

²Judá suyun llakikuymanta waqaykushan, llaqtankunapas pasaqtan phutikushan. Runakunapas llakikuymantan pituchakushan, Jerusalenpas nanaymantan qapariykamushan.

³Qhapaq runakunapas kamachinkutan unuman kachanku, paykunan p'uytukunaman rispa mana tarimunkuchu, ch'usaq p'uyñuntinmi kutirimunku, sinchi khuyay llakisqataq umankupas llakikuymanta pakasqataq.

⁴Chakra llankaqkunapas kallpa wañuymi kanku, umankutapas llakikuymantan qatakunku, mana para chayaqtin, hallp'apas anananasqanmanta.

⁵Campopi tarukakunapas qholla uñankutan wikch'ukapunku, mikhunankupaq mana q'achu kapuqtin.

⁶K'ita asnokunapas orqo patakunapin sayaranku, wayrallatan chacal nisqa animalkuna hina muskhinku, ñawinkupas qoyrupunmi mikhunankupaq mana pasto kaqtin, nispa.

⁷Llaqtataq Señor Diosta nirqan: Señor Diosniyku, hinaña huchayku contraykupi rimarin chaypas, imallapipas yanapawaykupuni sutiykita yupaychanaykupaq. Askha kutipin qanmanta t'aqarikurqayku, contraykitapunin huchallikurqayku.

⁸Qanllan Israelpa hap'ipakunanqa kanki, llakikuy p'unchaypipas qespichiqniykun kanki, ¿imanaqtinmi mana reqsisqa runa hina kanki? ¿Imanaqtinmi purikuq runa qorpachakuq hinalla kanki?

⁹¿Imanaqtinmi mancharisqa runa hina kanki? ¿Imanaqtinmi allin qhari mana yanapaykukuq hina kanki? Chaywanpas, Señor Diosniyku, chawpiykupipunin kashanki, llapa runan yachanku llaqtayki kasqaykuta. ¡Amapuni saqerpariwaykuchu! nispa.

¹⁰Kay llaqtamantan Señor Diosqa nin: Paykunan mana cuidakuspa hinantin phawaykachayta munakapurqanku, chayraykun paykunataqa mana chaskisaqchu. Kunantaqmi huchankumanta yuyarispay paykunata muchuchisaq, nispa.

¹¹Señor Diosmi niwarqan: Ama mañakamuychu kay llaqtaq allin kananpaqqa.

¹²Hinaña ayunashanku chaypas, mañakusqankutaqa manan uyarisaqchu, ruphachina sacrificiotaña ruru ofrendataña haywamuwanqaku chaypas, manan chaskisaqchu. Paykunataqa wañuchisaqmi maqanakuywan, yarqaywan, onqoypiwan, nispa.

¹³Ñoqataq kutichirqani: ¡Señor Diosníy, qhawariyyá! Profetakunaqa nishallankupunin: Señor Diosmi nin: Manan kanqachu maqanakuypas yarqaypas, aswanmi thak-kayllapi kakunkichis, nispa, nispanku.

¹⁴Chaymi Señor Diosqa kutichimuwarqan: Arí, profetakunaqa chay hinata sutiypi nispankuqa llullakushankun. Ñoqaqa manan hayk'aqpas paykunataqa kachamurqanichu, manataqmi willaqtapas churarqanichu, manapunin rimapayallarqanipaschu. Rikhuriymanta rimasqankuqa yanqa q'otullan, paykuna kikinkumanta watupakusqallankun, sonqonkumanta horqokuspa rimasqallankun.

¹⁵Chaymi ñoqa Señor Diosqa paykunamanta nini: Yanqan sutiypi rimaq churakunku mana ñoqa kamachishaqtiy. Ninkuraqtaq: Manan kay llaqtapi kanqachu maqanakuypas yarqaypas, nispanku. Chay rimaq profetakunan wañuranqaku maqanakuypi yarqaypiwan.

¹⁶Paykunaq rimapayasqanku llaqtapas wañurallanqataqmi maqanakuypi yarqaypiwan warmintin wawakunantin, ayankutaq Jerusalén callekunapi wikch'u-wikch'u kanqa, manataq pillapas kanqachu paykunata p'ampaykuq. Chaykunawanmi kutichisaq mana chanin kasqankumanta, nispa.

¹⁷Nillawarqantaq: Llaqtayta niy: Ñawiymanta waqay phawamuchun, tuta p'unchay ama thanispa, munasqay llaqtaypa manchakuy hatun llakinmanta, khuyay manchana k'irinmantawan.

¹⁸Hawaman lloqsispaypas, hatun maqanakuypi wañuqpa ayallantan rikushani. Llaqtaman haykuspaypas yarqaymanta wañuqpa ayallantan rikushani. Profetakunataq sacerdotekunantin llank'ashallankupuni manataq ima ruwasqankutapas reparakunkuchu, nispayki, nispa.

¹⁹Llaqtataq nirqan: Señor Diosnillayku, ¿Judataqa pasaqtapunichu wikch'upurqanki? ¿Sión llaqtataqa cheqnikunkipunichu? ¿Imanaqtinmi k'iriwarqankiku mana hampiy atiyta? Allillan kanaykutan suyakusharqayku, manataq ima allinpas kawankuchu. Qhalilla kanaykutan suyakusharqayku, manchapakuyllapitaq kashayku.

²⁰Señor Diosnillayku, millay ruwasqaykutan willakamuykiku, ñawpa machulaykuq huchallikusqantan reqsikuyku, qan contrapunin huchata ruwarqayku.

²¹Sutiyki yupaychasqa kanapaq amapuni wikch'uwaykuchu, ama pisichaychu ch'uya wasiykipi kaq qhapaq tiyanaykita. Yuyariy ñoqaykuwan rimanakusqaykita, amapuni mana hunt'aqqa kaychu.

²²¿Idolokunamantari kanchu mayqellanpas para chayachiy atiq? ¿Hanaq pachari payllamantachu parata parachimun? Señor Diosnillayku, qanmi kanki parachimuqqa, qanpunin kanki tukuy chaykuna ruwaqqa, chayraykun qanllapi suyakuyku, nispa.