Read Quechua Cuzco Bible 1988 JEREMÍAS 15 Bible Online

JEREMÍAS 15 - Quechua Cuzco Bible 1988 bible

JEREMÍAS 15

¹Chaymantataq Señor Diosqa niwarqan: Moisesña Samuelpiwan chimpamuwanman chaypas, manan kay llaqtamantaqa khuyallikuymanpunichu. ¡Hina ripuchunku, hina ñoqamanta karunchakuchunku!

²¿Maytataq risaqkuri? nispa tapusuqtiykiqa, ñoqaq sutiypin ninki: Hatun onqoypi wañuchinapaq kaqqa hatun onqoypi wañuchun. Awqa-tinkuypi wañuchinapaq kaqqa awqa-tinkuypi wañumuchun. Yarqayta muchunanpaq kaqqa yarqayta muchuchun. Llaqtanmanta wak llaqtaman kamachipaq apana kaqqa wak llaqtaman apasqa kachun, nispayki.

³Ñoqa Señor Diosmi nini: Tawa t'aqa ñak'arichiytan kachamusaq. Awqa-tinkuypin wañunqaku, ayankutaqa alqokunan achunqa, ankakunan salqa animalkunapiwan mikhuspa tukunqa.

⁴Chaytan ruwasaq Judá rey Ezekiaspa churin Manasespa Jerusalenpi ruwasqanmanta. Llapan suyukunataq chayta rikuspa llaksakunqaku, nispa.

⁵Señor Diosmi nin: Jerusalén, ¿pitaq qanmanta khuyallikunman? ¿Pitaq qanmanta llakikunman? ¿Pitaq qan qhawaykuq haykuykamunman?

⁶Qanqa saqerparipuwaspaykin qheparpariwanki, chayraykun ñoqa khuyapayashaqtiy umayta wasapawaqtiyki hasut'irqayki, hinaspa ch'usaqyachirqayki.

⁷Suyuq sapanka llaqtanpin qankunata wayrachinawan wayrachirqaykichis. Llaqtalláy, hatun llakimanmi churaykurqaykichis, mana allin kawsayniykichista mana wikch'uqtiykichis.

⁸Qankuna ukhupiqa askha viudakunallatan saqerqani qocha pata aqomantapas astawanraq. Ñoqan wañuchirqani kallpankupi kashaq waynakunata, chay hinapin mamankutapas muchuchirqani. Qonqayllan paykunaman chayachirqani hatun llakitapas llaksakuytapas.

⁹Qanchis wawayoq maman kallpanta chiriyachispa, yuyaynintaraq chinkachikurqan. P'unchaypa sut'iyninpas tutayarqan, hatun llakiq qatisqanmi p'enqasqa kashan. Pillapas kawsashanqaraq chaytaqa awqanwanpunin sipichisaq, nispan nin Señor Diosqa.

¹⁰¡Ikiraqmi ñoqamanta, mamalláy! ¿Imapaqraqmi wachawarqanki llapan llaqtantinwan k'aminakuspa maqanakunaypaq? Manan pimanpas manurqanichu qolqeyta, manataq manuwarqankupaschu, chaytukuywanpas lliwmi ñakawanku.

¹¹Señor Diosnilláy, ñakawasqanku chayawachun manataqchus allinta kamachiykita ruwarqani chayqa, manallataqchus awqaypaq hatun llaki-phutiypi kashaqtin mañapurqani chayqa, nispa.

¹²¿Pitaq p'akiyta atinman wichay lado fierrotapas broncetapas?

¹³Israel llaqtalláy, llapan huchaykikuna hawan awqaykikunaman hap'iykachisqayki, qhapaq-kayniykita qori-qolqeykita lliw hallp'aykipi kaqkunatawan yanqalla mana qolqenkuwan apakunankupaq.

¹⁴Phiñakuyniymi nina hinaraq wiñaypaq rawrarin, chayrayku mana reqsisqayki suyupi awqaykiq kamachin kanaykipaq ruwasqayki, nispa.

¹⁵Señor Diosníy, qanmi tukuyta yachanki, ñoqamanta yuyarikuway yanapaykuwaytaq. Sapa kuti muchuchiqniykunaman aynita kutichiy, amayá paykunata hinallata qhawaychu, paqtan wañuchiwankuman. Qhawariy, qanraykun imaymana nisqa kashani.

¹⁶Rimapayawasqaykitan llapachallanta uyarirqani, chaykunan ancha kusikuy sonqoypaq karqan, anchatapunin kusikurqani. Tukuy-atiyniyoq Señor Diosníy, qanpa wawaykin kani.

¹⁷Manapunin huñukuytapas munarqanichu aycha kusichiyllata munaq runakunawanqa. Anchatapunin phiñachiwarqanki, chaymi makiykipi kaspay sapallay tiyakurqani.

¹⁸¿Imanaqtinmi nanayniyqa manapuni thaninchu? ¿Imanaqtinmi k'iriyqa mana qhaliyay atiq, imaymanawanña hampishani chaypas? ¿Ikiraqmi qanqa ch'aki mayu hina ñoqapaqqa kanki, manaña ununpas phawapuq hina! nispa.

¹⁹Hinan Señor Diosqa kutichiwarqan: Llakikuspachus kutirikampuwanki chayqa, chaskikapusqaykin, wakmantan kamachillaypuni kapunki. Manaña yanqa rimayta rimaspa allin kaqllataña rimanki chayqa, qanmi kanki ñoqamanta willaq. Paykunan qanmanqa kutimunqaku, manan qanraqchu paykunamanqa rinayki.

²⁰Kay llaqtaykipaqmi churasqayki mana atipay atina bronce perqata hina. Maqanakunqakuchá, manataq atipasunkikuchu, ñoqan qanwan kashani qespichinaypaqpas horqonaypaqpas.

²¹Millay runakunaq atiyninmantan horqosqayki, hawan-ukhun ruwaqkunaq atiyninmantan qespichisqayki, nispa.