Read Quechua Cuzco Bible 1988 JEREMÍAS 16 Bible Online

JEREMÍAS 16 - Quechua Cuzco Bible 1988 bible

JEREMÍAS 16

¹Señor Diosmi huktawan niwarqan:

²Kay llaqtapiqa aman casarakunkichu, amallataq wawayoqpaschu kanki.

³Ñoqa Señor Diosmi willashayki kay llaqtapi paqariq wawakunapaq chay wawaq taytankunapaqpas imachus kananmanta:

⁴Manchay onqoywanmi wañuranqaku, paykunamantaqa manan pipas waqanqachu, manataqmi p'ampanqakupasñachu, wañusqanku cheqaspin wanu hina qhepakunqaku. Maqanakuymi yarqaypiwan paykunata ch'inyachipunqa, ayankutataqmi ankakuna salqa animalkunapiwan mikhupunqa, nispa.

⁵Señor Diosqa nillawarqantaqmi: Aman haykunkichu wañuchikuqpa wasinman, aman waqaysikunkichu, aman sonqochankipaschu. Kay llaqtamanqa manañan thak-kayniyta churasaqchu, manañan munaykusaqchu manallataq khuyapayasaqpaschu.

⁶Kay suyupiqa hatunpas huch'uypas llapanmi wañunqa, manan pipas ayanku p'ampaq kanqachu, manan paykunamanta waqaqpas kanqachu, manan pipas llakikuymanta aychanta mat'akuq chukchanta rutukuqpas kanqachu.

⁷Wañuqmanta llakisqa kaqwanqa manan pipas kusichinanpaq mikhunqapaschu ukyanqapaschu, mama-taytanña wañuqtinpas.

⁸Amallataq haykunkichu fiestayoqpa wasinmanpas, aman paykunawan tiyaykunkichu ukyaqpas mikhuqpas.

⁹Uyariway allinta ñoqa Tukuy-atiyniyoq Señor Israelpa Diosnin nisqayta: Kay llaqtapiqa ch'inyachisaqpunin fiestayoqpa kusikuymanta takiyninta, casarakuqpa qhaswaynintapas. Kaypi tiyaq runakunaqa chayta rikunkichisraqmi.

¹⁰Kay willakuyta willaqtiykin llaqtaqa tapusunki: ¿Imaraykun Señor Diosqa kay hatun llakita kachamuwanqaku? ¿Ima mana allintapunitaq ruwarqaykuri? ¿Ima huchatapunitaq Apu Señor Diosninchis contraqa ruwarqayku? nispa.

¹¹Qantaq kutichinki: Señor Diosmi nin: Kayqa machulaykichispa wikch'uwasqanmantan, paykunaqa wak dioskunatan qatikurqanku yupaychanankupaq hatunchanankupaqwan, ñoqatataq wikch'urparipuwarqanku, kamachisqaykunatapas manan kasuwarqankuchu.

¹²Qankunataq machulaykichiskunamantapas aswan mana allintaraq ruwarqankichis, qankunaqa sapankaykichismi millay rumi sonqokuna kankichis, manataq kasuwankichischu.

¹³Chayraykun kay suyumantaqa qarqosqaykichis, machulaykichispapas qankunaqpas mana reqsisqaykichis suyuman, chaypin qankunaqa tuta-p'unchay wak dioskunata yupaychamunkichis, manataqmi qankunataqa khuyapayasqaykichischu, nispa.

¹⁴Señor Diosmi nillantaq: Kanqan huk p'unchay manaña juranaykichis: Egiptomanta Israel runakunata horqomuq Señor Diospa sutinpin jurani, nispaqa,

¹⁵aswanmi jurankichis: Wichay lado suyumanta Israel runakunata horqomuq Señor Diospa sutinpin jurani, nispa, kaqllataq: Hinantin suyukunapi ch'eqeykusqa Israel runakunata horqomuq Señor Diospa sutinpin jurani, nispa. Ñoqan kaqta hallp'aykichisman kutichimpusqaykichis, machulaykichisman “Qosaq” nisqay hallp'aman, nispa.

¹⁶Señor Diosmi nillantaq: Askha challwaqkunatan kachamusaq Israel runakunata challwata hina hap'inankupaq. Chaymantapas pusamullasaqtaqmi qhamiyaspa hap'iqkunata, hinan qhamiyanqaku hap'inankukama hinantin orqokunapi moqokunapi qaqa wasikunapipas.

¹⁷Lliw ima ruwasqantan rikushani, manataqmi pillapas ñoqamantaqa pakakunchu, manapunin ima huchallankupas ñoqamantaqa pakasqa kanchu.

¹⁸Hallp'ayman mana kawsaq millay idolonkuwan, cheqnikusqay diosninkuwan hunt'aykachispan qhellicharqanku, chayraykun iskay kutita pagapusaq mana allin ruwasqankumanta huchankumantawan, nispa.

¹⁹Señor Diosníy, yanapaqníy, kallpachaqníy, llaki-phutiyniypi pakaykukunay, qanmanmi suyukuna qayllaykamunqa, hallp'aq k'uchunmanta hamuspan nisunkiku: Machulanchispaqa kaq kasqa yanqa dioskunallan, mana atiyniyoq mana imapaq valeqkunallan.

²⁰¿Runaqa atinmanchu diosninta ruwakuyta? Arí, ichaqa manan chaykunaqa dioschu, nispa.

²¹Qhawariy, paykunamanmi rikuchisaq, kunanpachan yachachisaq atiyniyoq kallpayoq kasqayta. Chay hinapin yachanqaku sutiyqa Señor Dios kasqanta, nispa.