Read Quechua Cuzco Bible 1988 JEREMÍAS 17 Bible Online

JEREMÍAS 17 - Quechua Cuzco Bible 1988 bible

JEREMÍAS 17

¹Yaw Judá, huchaykiqa fierromanta ch'eqonawan qelqasqan kashan, sonqoykipi huk qaqapi hina ch'ila umiñaq ñawch'inwan k'awasqa, altarniykikunaq waqranpipas k'awasqa.

²Wawaykikunan altarniykikunapi yupaychanku, orqo patakunapi, sapanka q'omer mallki chakipi, campopi kaq moqo patakunapipas Asera nisqa diosakunata yupaychanku. Kaqniykikunata qhapaq-kayniykitawan suwawan apachispan tukuy hinantinpi huchallikusqaykimanta pagachisqayki.

⁴Mana thanispa nina rawray hinan phiñakuyniyqa rawrashan, chayraykun qanman qosqay hallp'amantaqa munay mana munay lloqsinki, mana reqsisqayki hallp'apin awqaykiq kamachin ruwaqta churasqayki.

⁵Señor Diosmi nin: Ñakasqan kashan pipas ñoqamanta t'aqakuqqa, runa-masinman hap'ipakuqqa, wañuq runallaman hap'ipakuqqa.

⁶Ch'aki pampapi kanlli hinan mana hayk'aq allin wiñaq, chay runaqa mana unuq kanan purunpin tiyan, kachi-kachi pampapin tiyan.

⁷Saminchasqan kashan ñoqaman hap'ipakuq runaqa, ñoqa Señor Diospi suyakuqqa.

⁸Mayu patapi wiñaq sach'a hinan kashan unu ukhumanmi saphiykunpas. Ruphay mita chayamuqtinpas, manan manchakunchu, raphinpas q'omerllapunin kashan, chiraw mitapipas manan naq'enchu, tukuy tiempotaq rurushallanpuni.

⁹Runaq sonqonmi tukuy imamantapas aswan q'otukuqqa, mana hampiy atiy onqosqaraqtaq kanpas, ¿pitaq chay sonqotari reqsinman?

¹⁰Ñoqa Señor Diosmi sonqotaqa t'aqwini, tukuy yuyaykusqakunatapas probani. Sapanka hukmantaq kawsasqanman hina qoni, ruwasqankuman hinapunin kutichini, nispa.

¹¹Suwakuspalla qhapaqyaqkunaqa wak runtukunata oqllaq p'isaqa hinan, allin kallpanpi kashallasparaqmi qhapaq-kayninta chinkachikapunqa, qhepamantaq mana yuyayniyoqman tukupunqa.

¹²Ñoqanchispa yupaychananchis wasiqa qhapaq Diospa kamachikuy tiyananmi, qallariymantapacha orqo patapi churaykusqa.

¹³Señor Diosníy, qanqa Israelpa hap'ipakunanmi kanki, lliw qanta qonqarpariqkunaqa p'enqachisqan kanqaku. Lliw qanmanta karunchakuqqa hallp'api qelqasqa suti hinallan chinkarqapunqa, qan cheqaq ch'uya unu pukyuta wikch'usqanmanta.

¹⁴Señor Diosníy, qanpuni hampiway, qhaliyasaqmi, qan qespichiway, qespichisqataq kasaq, qanllatapunin yupaychayki.

¹⁵Qhawariy, runakunan niwan: ¿Maytaq Señor Diospa simin? ¿Hunt'akushanchu? ¡Kunanpachayá hunt'akuchun! nispa.

¹⁶Chaywanpas manan tanqarqaykichu llakikuy p'unchayta kachamunaykipaq, manan munarqanichu paykunaq hatun llakipi kanankuta, chaymantaqa qanmi yachanki, rimasqaytapas qanmi uyarirqanki.

¹⁷Ama ñoqapaq phiña mancharikuyraq kaychu, qanqa llakikuy p'unchaypi pakaykukunaymi kanki.

¹⁸Qatiykachawaqniykunaqa p'enqachisqa kachun, ama ñoqaqa, paykuna q'aqchasqaqa kachun, ama ñoqaqa, paykuna pataman llakikuykuna chayamuchun, hukpaqkama paykunata chinkachipuy kuti-kutirisparaq, nispa.

¹⁹Señor Diosmi niwarqan: Phaway, suyaykamuy Judá reykunaq lloqsinan haykunan Llaqta Punku nisqapi, kaqllatataq ruwanki Jerusalenpa wakin punkunkunapipas.

²⁰Ninkitaq: Punkunta haykuq Judá reykuna, Judá runakuna, Jerusalenpi tiyaqkuna, uyariychis Señor Diospa siminta.

²¹Paymi nin: Kawsaytachus munankichis chayqa, samana p'unchaypiqa ama q'epita q'epiychischu, amataq kay Jerusalén punkuntapas apaykuychischu.

²²Samana p'unchaypiqa amapuni ima q'epillatapas wasiykichismanta horqomuychischu, amataq ima llank'anatapas ruwankichischu. Samana p'unchaytaqa t'aqapuwaychis, imaynatachus machulaykichiskunata kamachisqayman hina.

²³Chaywanpas paykunaqa manapunin kasukurqankuchu, manataq uyarikurqankupaschu, aswanraqmi rumi sonqoman tukurqanku mana uyarinankupaq.

²⁴Cheqaqtapuni kasuwankichis chayqa, samana p'unchaypipas manapuni ima q'epitapas kay punkunta apaykunkichischu chayqa, kay p'unchaytapas ñoqapaqpuni t'aqapuwankichis chayqa, manataq ima llank'anaykichistapas ruwankichischu chayqa,

²⁵Davidpa kamachikuy tiyananpi tiyaq reykunapas uma runankunapas haykunqan kay llaqtaq punkunkunata. Judá runakunapas Jerusalenpi tiyaqkunapas haykunqakun carretakunapi caballokunapi ima. Jerusalenpi wasikunapas kallanqapunin.

²⁶Jerusalenmanqa hamunqakun muyuriqninpi tiyaqkuna, Judá llaqtakunaq runankunapas, Benjamín ayllumantapas, Shefela nisqa moqo-moqomantapas, orqo-orqomantapas, Neguev ch'inneqmantapas. Paykunan apamunqaku Dios yupaychana wasiman ruphachinapaq uywakunata, wak sacrificiokunata, ruru ofrendakunata, inciensota, gracias qoy ofrendakunatawan.

²⁷Chay hinaqa kasuwankichismi, samana p'unchaytapas ñoqapaqmi t'aqapuwanaykichis, samana p'unchaypipas manan q'epintinchu Jerusalenman haykunaykichis, mana chay hinata ruwaqtiykichisqa ñoqan ninawan kanaykusaq Jerusalén llaqta punkukunata, hinan ninaqa qhapaq wasikunatapas ruphaykunqa, manataq pipas nina sipiyta atinqachu, nispayki, nispa.