Read Quechua Cuzco Bible 1988 JEREMÍAS 18 Bible Online

JEREMÍAS 18 - Quechua Cuzco Bible 1988 bible

JEREMÍAS 18

¹Señor Diosmi niwarqan:

²Manka ruwaqpa wasinta riy, chaypitaq huk willakuyta nimusqayki, nispa.

³Ñoqataq manka ruwaqpa wasinman rispay, tarimurqani torno patapi manka ruwashaqta.

⁴Sapa kuti manka ruwasqan mana allin lloqsiqtinmi, manka ruwaqqa wakmanta t'uruta huñurqospa mosoqmanta mankata ruwarqan imaynachus munasqanman hina.

⁵Hinan Señor Diosqa niwarqan:

⁶Israel runakuna, ¿manachu ñoqapas kay manka ruwaq hina qankuna ruwayta atiyman? Qankunaqa manka ruwaqpa makinpi t'uru hinan makiypi kashankichis.

⁷Hayk'aqchá munasaq hinan huk llaqtata huk suyutapas nisaq: T'irasqaykin, thunisqaykin, chaqosqaykin, nispay,

⁸ichaqa chay suyu mana allin ruwayta saqepunqa chayqa, yuyaykusqaytaqa manan hunt'asaqñachu.

⁹Hayk'aqchá munasaq hinan huk suyuta huk llaqtatapas nisaq: Sayarichisqaykin perqasqaykin, nispay,

¹⁰ichaqa chay suyu mana allinta ruwapunqa chayqa, allin ruwanaypaq yuyaykusqaytaqa manañan hunt'asaqñachu.

¹¹Chay hinaqa, Judá runakunata Jerusalenpi tiyaqkunata niy: Señor Diosmi nin: Qankuna contra yuyaykuni mana allinniykichista ruwanaypaq. Chayrayku sapankaykichis mana allin kawsayniykichista qonqaychis, aswanpas sapankaykichis kawsayniykichista t'ikraychis allin kaqta ruwanaykichispaq, nispa, nispayki.

¹²Paykunataq ichaqa nisunkiku: ¡Ama p'unchayniykita usuchikuychu! Ñoqaykuqa munasqaykuman hinallapunin purikusaqku, imaynatachus sonqoykuq munasqanman hinallapunin, nispanku, nispa.

¹³Chayraykun Señor Diosqa nin: Tapurikuychis suyukunata: ¿Pillapas uyarirqanchu Israelpa ruwasqan hina ruwaqta? nispa. Munasqay Israel llaqtan hatun millayta ruwaykapurqan.

¹⁴¿Chakrapi rumikunaqa tukukunchu? ¿Libanoq k'awchinmanta rit'iqa chinkanchu? ¿Hayk'aqllapas khutuy-khutu ununqa ch'akinchu? ¿Pukyumanta unuqa ch'akinchu?

¹⁵Llaqtaymi ichaqa qonqapuwarqan mana valeq idolokunaman inciensota q'osñichispa. Purinanku ñawpa ñanta chinkachispan pantapurqanku, hinaspan mana reqsisqanku ñanninta purishanku.

¹⁶Ahinatan suyunkuta mancharikuyman tukuchinku, runakunaq qhawarparinanmanpuni tukuchinku. Qayllanta lliw puriqkunapas mancharisqan umankuta maywirikunqaku.

¹⁷Imaynan inti lloqsiy rupha wayra wayramuspa q'osñitaraq sayarichin, chay hinatan awqanpa ñawpaqenta Israelta phawachisaq. Qheparparipusaqmi mana qhawarispa hatun llaki p'unchay chayamuqtinpas, nispa.

¹⁸Chaymantataq runakunaqa nirqanku: ¡Hamuychis rimanakusun Jeremías contra! Payqa amapas kashachunchu, manan faltanqachu yachachiqninchis sacerdotekuna, yuyaychaqninchis yuyaysapakuna, Diospa simin sut'inchaqninchis profetakunapas. Piqpa ima nisqantapas ama uyarispa, Jeremiastaqa q'awiykusun, nispa.

¹⁹¡Señor Diosníy, uyariykuwaypuni! ¡Willakusqayta uyariykuwaypuni!

²⁰¿Chaninchu allinman mana allinwan kutichiy? Chaywanpas urmaykunaypaqmi hatun t'oqota ruwarqanku. Yuyariyyá qanman qayllaykamuspay paykunaq allinninpaq rimapayasqayta, phiñakuspayki ama paykunata muchuchinaykipaq.

²¹Kunantaq ichaqa, hina churinkupas wañuchun yarqaymantapas espadawan wañuchisqapas. Hina warminkupas mana wawayoq viuda kachun, hina qharinkupas hatun onqoypi wañuchun, hina waynankupas awqa-tinkuypi wañuchun.

²²Hatun t'oqotan ruwarqanku hap'iwanankupaq, toqllatan purinayman churarqanku, chayrayku qonqaylla paykunaman kachaykamuy huk t'aqa llat'anaq suwakunata. ¡Hina qaparishachunku manchakuymanta!

²³Señor Diosníy, qanmi yachanki llapan yuyaykusqankutaqa, wañuchiwanankupaq yuyaykusqankutapas. ¡Amapuni mana allin kayninkutapas pampachaychu! ¡Amapuni huchankutapas qonqaychu! ¡Qanpa ñawpaqeykipipas urmachiypuni, phiñakuyniykipipas ñak'arichiypuni! nispa.