Read Quechua Cuzco Bible 1988 JEREMÍAS 19 Bible Online

JEREMÍAS 19 - Quechua Cuzco Bible 1988 bible

JEREMÍAS 19

¹Señor Diosmi niwarqan: Phaway rantirqamuy t'uru p'uyñuta, hinaspataq wakin kurak runakunata kurak sacerdotekunatawan waqyarispa,

²K'arpa Punku nisqa qaylla Ben-hinom wayq'oman rinki, chaypin willakuyta nimusqayki.

³Ninkitaq: Judá suyu reykuna, Jerusalenpi tiyaqkuna, Israelpa Diosnin Tukuy-atiyniyoq Señorpa siminta uyariychis. Paymi nin: Ñoqan kayman sinchi hatun llakita kachamusaq, chaymanta uyariq sapanka runaqmi ninrinraq chiriririnqa.

⁴Chaytan ruwasaq llaqtay runakunaq qonqarqowasqan hawa, paykunan sacrificiokunata ruphachirqanku paykunaqpas machulankuqpas Judá suyu reykunaqpas mana reqsisqan wak dioskunaman, kay cheqaspin askha mana huchayoqkunaq yawarninta hich'arqanku.

⁵Hinallataq altarkunata ruwakurqanku wawankuta Baal nisqa diosman ruphachinankupaq. Chay hina ruwaytaqa manan kamachirqanichu, manapunin chay hina kanantaqa yuyallarqanipaschu.

⁶Chayrayku huk p'unchay chayamunqa kay cheqasta manaña Tofet, nispa sutichananku, manallataq Ben-hinom Wayq'o, nispapas, aswanmi ninqaku: Runa Sipina Wayq'o, nispa.

⁷Kay cheqaspin Judá runakunaqpas Jerusalén runakunaqpas yuyaykusqankuta tatichisaq. Ñoqapunin awqankuwan atipachisaq, wañuchiy yuyaykuqninkupas paykunataqa wañuchinqapunin, hinan ayankuta ankakunaman salqa animalkunamanwan qaraykusaq.

⁸Kay llaqtatan tukuchisaq mancharikuyman runakunaqpas qhawarparinanman, lliw qayllanta puriqkunapas pasaq thunisqa kasqanta qhawaykuspan manchakuymanta qhawarparinqaku.

⁹Wañuchiy munaq awqankun paykunata muyuykuspa llakichinqa, ñoqan wawankuq aychanta mikhuchisaq, hatun llakiq qatisqan kashaspan llaqtamasinkutapas mikhunqaku, nispa, nispayki.

¹⁰Chaykunata niykuspataq puriysiqniyki runakunaq rikushasqan p'uyñuta p'akinki.

¹¹Ninkitaq: Tukuy-atiyniyoq Señor Diosmi nin: Kay llaqtatan runankunatawan p'akirqosaq imaynan t'uru p'uyñuta p'akinku hinata, manan wakmanta ruwanqakuñachu. Runakunataq ayankuta p'ampakapunqaku kaq Tofetpi manaña mayllapas aya p'ampanapaq cheqas kanankama.

¹²Sut'itan nini kay llaqtataqa Tofet yupaychana cheqasta hinapuni ruwanayta.

¹³Jerusalén runakunan Judá suyu reykunapiwan wasi patankupi inciensota q'osñichirqanku ch'askakunaman, vinowanpas ch'uyarqanku wak dioskunaman, chaywanmi Tofet yupaychana cheqas hina qhellichasqa kanqaku, nispan, nispayki.

¹⁴Chaymantataq Jeremiasqa Señor Diospa profetizananpaq Tofetman kachasqanmanta kutimpurqan, Señor Dios yupaychana wasiq pationpi sayaykuspataq llaqtantinman nirqan:

¹⁵Israelpa Diosnin Tukuy-atiyniyoq Señormi nin: Kay llaqtamanmi llaqta-masinkunamanwan tukuy yuyaykusqay ñak'ariykunata kachamusaq, simiyta mana kasuspa rumi sonqo tukusqankumanta, nispan, nispa.