Read Quechua Cuzco Bible 1988 JEREMÍAS 20 Bible Online

JEREMÍAS 20 - Quechua Cuzco Bible 1988 bible

JEREMÍAS 20

¹Yupaychana wasi qhawaq sacerdotekunamanta aswan kurakmi karqan Imerpa churin Pashurqa. Paymi uyarirqan Jeremiaspa willakusqanta,

²hinaspan Jeremiasta p'anarqan, hinallataq yupaychana wasi qaylla wichay lado Benjamín Punku nisqapi chakintawan makintawan cepopi kanichirqan.

³Qhepantin p'unchaytaq Pashurqa Jeremiasta cepomanta kacharichimurqan, chaymi Jeremiasqa payta nirqan: Señor Diosmi Pashur sutiykita t'ikrarqapun “Hinantinpi Q'aqchakuy” nisqaman.

⁴Señor Diosmi nin: Qantan tukuchisqayki mancharikuyman qan kikiykipaq llapa reqsinakuq-masiykikunapaqwan. Qan kikiyki qhawakushaqtiykin, reqsinakuq-masiyki awqanpa sipisqan wañunqa. Llapan Judapi tiyaq runakunatapas Babilonia reymanmi hap'iykachisaq, chay reymi wakinta Babiloniaman kamachi kanankupaq apanqa, wakintataq sipinqa.

⁵Hinallataqmi awqanpa makinman hap'iykachisaq kay llaqtaq qhapaq-kaynintapas llapan kaqninkunatapas, chaniyoq illankunatapas, Judá reykunaq qhapaq-kayninkutapas, paykuna llat'anaspa chaykunata Babiloniaman apanankupaq.

⁶Qanpas Pashur Babiloniaman apasqan kanki, llapan wawakunantin warmintin ima. Chaypin wañupunki, chayllapitaqmi p'ampapusunkikupas, qantapas reqsinakuq-masiykikunatapas, mayqenkunamanchus llullakuspa profetizarqanki chaykunatapas, nispan, nispa.

⁷Señor Diosníy, qanqa q'otuwasqankimá, ñoqataq hinalla q'otuchikusqani. Aswan kallpayoqmi kasqanki, chaymi atipawarqanki. Tukuy runaq asikunanpaqmi kapushani, ch'isiyaqnintinmi ñoqawan chanzakushanku.

⁸Sapa kuti rimaspaymi qaparispa waqyakuni: ¡Ch'aqwaymi kanqa! ¡Thunikuymi kanqa! nispallapuni. Chay hinata simiyki willasqaymantan sapa kutilla k'amiwanku asipayawanku.

⁹Ñoqachus niyman: Señor Diosmanta amaña rimasaqchu, paypa sutinpipas amaña runaman willasaqchu, nispay, chayqa, sonqoypin simiykiqa nina hinaraq rawrashan, tulluytaraqmi parichishan. Upallakuyta munani chaypas manapunin ch'inyakuyta atinichu.

¹⁰Uyarishanin runakunaq chhiwchinakusqanta: ¡Hinantinpin q'aqchakuy kashan! ¡Hamuychis ch'atasunchis! nispa nishaqta. Reqsisqaykunaraqmi suyashanku purisqaypipas misk'akunayta: Ichapaschá q'otusqa kanqa, chaypi atipananchispaq hinaspataq vengakunanchispaq, nishanku.

¹¹Qanmi Señor Diosníy, ñoqawanqa kashanki, mana atipana maqanakuq soldado hinaraq. Qatiykachawaqniykunaqa misk'akunqakun, manataqmi atipawanqakuchu. Pisipaspankun p'enqasqa qhepakunqaku, p'enqaypi rikukusqankuqa mana hayk'aq qonqasqan kanqa.

¹²Tukuy-atiyniyoq Señor Diosníy, qanpunin kanki chanin t'aqwiqqa, qanpunin kanki runaq sonqon rikuqqa. Rikuchiway chay runakuna ñak'arichisqaykita, chaninchaqniy kanaykipaq akllakusqaymi kanki.

¹³Señor Diosman takiychis, Señor Diosta yupaychaychis. Paypunin sarunchasqata millaykunaq atiyninmanta qespichin.

¹⁴¡Paqarisqay p'unchayqa ñakasqa kachun! ¡Mamaypa wachawasqan p'unchayqa ama saminchasqa kachun!

¹⁵¡Taytayta kusichiq runaqa ñakasqa kachun: Qharin wawayki kasqa, nispa taytayman willaqqa!

¹⁶¡Chay runaqa Diospa mana khuyapayaspa thunisqan llaqtakuna hina kachun! Chay runaqa paqarinpacha nanaymanta qaparisqata uyarichun, kuskan p'unchaytataq awqa-tinkuypi ch'aqwata uyarichun,

¹⁷mamaypa wiksallanpiraq mana wañuchiwasqanmanta. Chay hinapi mamaypa wiksallanpiña p'ampakuyman karqan, ñoqaqa manaña hayk'aqpas paqariymanñachu karqan.

¹⁸¿Imapaqraqmi mamaypa wiksanmantaqa lloqsimurqani, nanayllata phutikuyllatawan rikunaypaq p'enqayllapi ch'isiyanaypaq? nispa.