Read Quechua Cuzco Bible 1988 JEREMÍAS 21 Bible Online

JEREMÍAS 21 - Quechua Cuzco Bible 1988 bible

JEREMÍAS 21

¹Rey Sedekiasmi Malkiaspa churin Pashurta, Maasiaspa churin sacerdote Sofoniastawan Jeremías valekuqta kacharqan:

²Ama hinachu kay, Señor Diosta tapuykapuwayku, Babilonia suyu rey Nabukodonosormi phawaykushawanku. Ichapaschá Señor Dios munanman ima musphanata ruwaspapas Nabukodonosorta qhepaman kutichiyta, nispa. Hinan Señor Diosqa Jeremiasman rimaykurqan,

³chaymi Jeremiasqa Sedekiaspa kachamusqankunaman kutichirqan:

⁴Sedekiasta niychis: Israelpa Diosnin Señormi nin: Qanmi hark'apakushanki Babilonia reyta, ñit'iykuqniykichis soldadonkunatawan. Cheqaqtapunin ñoqaqa hawapi kaq soldadoykikunata qhepaman kutichisaq llaqta ukhuman kaqta kutiykamunankukama.

⁵Ñoqapas contraykichismi maqanakuq sayarisaq mana atipay atiyniywan sinchi k'arak phiñasqapuni.

⁶Kay llaqta runakunataqa uywakunatapas llapantapunin k'iriykusaq, hatun onqoypitaq wañunqaku.

⁷Hatun onqoypi maqanakuypi yarqaypipas mana wañuqkunatataqmi, Judá suyu rey Sedekiastapas, oficialninkunatapas hap'iykachisaq Nabukodonosorman wañuchiy munaq awqankunamanwan. Hinan payqa llapantapuni espadawan wañuchinqa mana khuyapayaspa, mana llakipayaspa, nispa, nispaykichis.

⁸Señor Diosmi Jeremiasta nillarqantaq: Runakunata nillaytaq: Señor Diosmi nin: ¡Qhawariychis! Ñoqan ñawpaqeykichisman churani kawsaytawan wañuytawan qankunaq akllakunaykichispaq.

⁹Pillapas kay llaqtapi qhepaqqa wañunqapunin maqanakuypipas, yarqaypipas, hatun onqoypipas. Aswanpas paymantakama ñit'iykuqniykichis Babilonia soldadokunaman chimpakapuqqa kawsaynintan qespichikunqa.

¹⁰Ñoqaqa kay llaqtata qhawarini awqaypas kanman hinatan, manan ima allintapas qosaqchu, aswanmi mana allinllatapuni qosaq. Llaqtaqa Babilonia reyman hap'iykachisqan kanqa, paytaq kanaykapunqa, nispan, nispayki.

¹¹Señor Diosmi nirqan: Judá reypa ayllunta niy: Rey Davidpa mirayninkuna Señor Diospa siminta uyariychis: Sapa p'unchay allinta chaninchaychis, runaq kallpan k'utuqmanta sarunchasqakunata horqoy, paqtataq qankunapaq phiñakuyniy rawrarinman mana thaniy atiytaraq, mana allin ruwasqaykichismanta.

¹³Yaw, Jerusalén, qanpa contraykipin sayarini, qanmi wayq'ontin kamachiq kanki, qanmi pampapi hatun qaqa hinaraq kanki. Qankunataq ninkichis: ¿Pitaq atinman ñoqanchisman phawaykamuyta? ¿Pitaq atinman pakakuna llaqtanchisman haykumuyta? nispa.

¹⁴Ñoqaqa ñak'arichisqaykichis ruwasqaykichisman hinan mallki-mallkiykichistan ninawan hap'iykachisaq, chay ninataqmi tukuy hinantinta ruphaykunqa, nispan nin Señor Diosqa, nispayki.