Read Quechua Cuzco Bible 1988 JEREMÍAS 23 Bible Online

JEREMÍAS 23 - Quechua Cuzco Bible 1988 bible

JEREMÍAS 23

¹Israelpa Diosnin Señormi llaqta kamachiq michiqkunata nin: ¡Imaynaraqmi kankichis ovejaykunata chinkachispa ch'eqechiq michiqkunaqa! Qankunan ovejaykunataqa ch'eqechispa chinkachirqankichis, mana michispa. Chayrayku millay ruwasqaykichismanta ñak'arichisqaykichis.

³Chaymantataq ñoqa kikiy puchuq ovejaykunata suyukunaman ch'eqechisqamanta huñuykakampusaq, kaq t'aqanmanmi kutichikampusaq, chaypin askhata miranqaku.

⁴Huk michiqkunatan paykuna qhawaqta churasaq, ovejakunataq mana manchakuspa llakhilla tiyanqaku, manataq chinkanqakupaschu, nispa.

⁵Señor Diosmi nin: Chayamunqan huk p'unchay Davidpa yawarninmanta huk miray sayarichinay, chaymi rey kanqa, allin yachaywan kamachiq, paymi suyuntinpi allinta ruwanqa chaninchanqapas.

⁶Pay kamachikushaqtintaq Judaqa llallinqa, Israelpas allillanpuni kawsanqa. Kay sutiwantaqmi sutichasqa kanqa: Señor Diosmi ñoqanchismanta chaninchaspa sayaqqa, niq nispa.

⁷Señor Diosmi nin: Chayamunqan p'unchaykuna, manaña kay hinata jurananku: Egiptomanta Israel runakunata horqomuq Señor Diospa sutinpi jurani, nispa,

⁸aswanmi juranqaku: Wichay suyumanta Israel runakunata horqomuq Señor Diospa sutinpi jurani, nispa, kaqllataq: Hinantin suyukunapi ch'eqeykusqa Israel runakunata horqomuq Señor Diospa sutinpi jurani, nispa. Ahinapin kaq hallp'ankupi tiyakapunqaku, nispa.

⁹Jeremiasmi profetakunamanta nin: Hawapi-ukhupi sonqollayoqñan kashani, lliw cuerpoymi khatatatashawan. Machasqa kasqanraqmi kashani, t'ili machasqa hinaraqmi kashani, Señor Dios hawa, ch'uya siminkuna hawa.

¹⁰Suyuntinmi wasancha hucha ruwaqwan hunt'a kashan, kawsayninkuqa sinchi mana allinmi, munayniyoq kaspankun mana allinkunata ruwanku. Chaymantan Señor Diosqa kay hallp'ata ñakan, hallp'ataq ch'akiykapun, ch'inneq pastokunataq ruphasqa hina ch'akirqapun, nispa.

¹¹Señor Diosmi nin: Profetakunapas sacerdotekunapas purun sunch'u hinan kanku, wasiypipunin tarini millay ruwashaqta.

¹²Chayraykun ñanninkupas tutayaqtaq llusk'anataq kanqa, ñoqan tanqarparisaq kumpakunankupaq. Paykunata ruwasqankumanta muchuchispaymi hatun llakiwan ñit'iykachisaq.

¹³Samaria profetakunataqa ñoqa kikiymi rikurqani sonqoy nanachiq ruwashaqta: Baal nisqa diospa sutinpin profetizarqanku, Israel llaqtaytapas pantachirqanku.

¹⁴Jerusalén profetakunataqa ñoqa kikiymi rikurqani millay mana llamiykuykuna ruwashaqta: Wasancha huchakunatan ruwanku, q'otunkuraqtaq, millay ruwaqkunatan tanqanku, chaymi pipas millay ruwaynintaqa mana wikch'unchu. Ñoqapaqqa llapanmi Sodoma runakuna hina kanku, Jerusalenpi tiyaq runakunapas Gomorra runamanmi rikch'akunku, nispan nin Señor Diosqa.

¹⁵Chayraykun Tukuy-atiyniyoq Señor Diosqa profetakunamanta nin: Qhawariy, kunanmi mikhunankupaq qosaq ajenjota, qollasaqtaq ukyanankupaq venenoyoq unuta, Jerusalenpi profetakunamanta hinantin suyuman mana allin-kay mast'arikusqanmanta, nispa.

¹⁶Tukuy-atiyniyoq Señor Diosmi nillawarqantaq: Profetakunaq nisqasuykichista ama kasuychischu, nisqasuykichisqa lliwmi yanqa llullakusqakunalla. Paykunaqa rimanku kikinkuq yuyaykusqallankutan, ñoqaq imatapas mana nisqaykunata.

¹⁷Simiykunata pisichaqkunamanmi ninku: Lliw imapas allillanmi kasunkichis, nispa. Rumi sonqonkuman hina kawsaqkunamanmi ninku: Manan ima mana allinpas kasunkichischu, nispan, nispa.

¹⁸Jeremiasmi nirqan: Señor Dios yuyaykusqankuta willashaqtin, ¿pitaq chaypi kasharqan siminkunata rikunanpaq uyarinanpaqwan? ¿Pitaq llapan nisqanta makilla uyarisharqan?

¹⁹¡Qhawariychis Señor Diospa manchay kunununuyninta! Señor Diospa k'arak phiñakuyninmi tutuka wayra hina phawanqa, millay runakunaq patanpin t'oqyanqa.

²⁰Señor Diospa phiñakuyninqa manapunin thaninqachu paypa yuyaykusqanman hina hunt'akunankama. Qhepa p'unchaymanmi chaykunata entiendenkichis, nispa.

²¹Señor Diosmi nin: Chay profetakunataqa manan ñoqachu kachamurqani, paykunan ichaqa phawaylla pasamurqanku. Manapunin rimapayallanipaschu, ichaqa sutiypiraqtaq willakurqanku.

²²Ñoqaq yuyaykusqayta willashaqtiychus chaypi kashankuman karqan chayqa, llaqtaymanchá simiykunata uyarichinkuman karqan, millay ñanninkumanta t'aqakunkumanchá karqan, mana allin ruwasqankumanta karunchakunkumanchá karqan, nispa.

²³Señor Diosmi nin: Karupipas qayllapipas Diosqa ñoqallapunin kani.

²⁴¿Pitaq ñawiymantaqa pakakuyta atinman? ¿Manachu ñoqaqa hunt'aykushani hanaq pachatapas kay pachatapas?

²⁵Ñoqan uyarirqani chay profetakunaq nisqanta, paykunan llullakuspa sutiypiraqtaq willakunku: ¡Mosqokusqanin! ¡Mosqokusqanin! nispa.

²⁶¿Hayk'aqkamataq chay profetakunaqa hinalla kanqaku? ¿Hayk'aqkamataq llullakuspa willanqaku paykuna kikinkuq yapaspa musphasqankuta?

²⁷Mosqokusqankuta hukman-hukman willaspanku, llaqtaypa qonqapuwananta munanku, imaynan machulankupas Baal nisqa diosta yupaychaspanku qonqapuwarqanku hinata.

²⁸Huk profetachus mosqokun chayqa, mosqoy kasqanta sut'inta willachun. Simiytataqchus chaskin chaypas cheqaqtapuni willachun.

²⁹¿Imaynatan kuskachakunman ichhuqa trigowan? Simiyqa nina hinan, simiyqa combo hinan qaqatapas ch'eqtanraq.

³⁰Chayraykun chay profetakuna contra kashani, paykunan profeta-masinkuq siminta suwakuspa rimanku, hinaspa simiypas kanman hinataraq rimanku.

³¹Paykunaqa kikinkuq rimasqankutan rimasqayman tukuchinku, arí paykuna contrapunin kashani.

³²Llulla mosqokusqankuta willaq profetakuna contran kashani. Paykunan llullakuspa thawtisqankuwan llaqtayta pantachinku. Manan ñoqaqa paykunataqa: Riy, nirqanichu, manataq kacharqanipaschu. Paykunaqa llaqtayta mana imapi yanapaykuqkunan kanku, nispan nin Señor Diosqa.

³³Señor Diosmi niwarqan: Jeremías, qantachus tapusunki llaqta runapas profetapas sacerdotepas: ¿Iman Señor Diospa willakuynin? nispa chayqa, qanqa ninkin: Señor Diosmi nin: Qankunan ñoqaq q'epiyqa[2] kankichis, pampamanmi wikch'usqaykichis, nispa, nispayki.

³⁴Kaqllataq huk profetapas sacerdotepas mayqen runapas ninqa: Kayqa Señor Diospa willakuyninmi*fb* nispa, chaytaqa familiantintan muchuchisaq.

³⁵Qankuna purapi tapunakuspaqa ninaykichismi: ¿Ima nispan Señor Diosqa nishan? ¿Imatañan rimashan Señor Diosqa? nispa.

³⁶Ichaqa amañan wakmanta ninkichischu: Señor Diospa willakuynin,*fb* nispaqa. Pillapas nillanqapuni chayqa, rimasqan simin q'epi*fb* tukunqa. Qankunaqa Kawsaq Dios Tukuy-atiyniyoq Señor Diosninchispa simintan chanzakuspa huk hinaman tukuchinkichis.

³⁷Profetataqa kay hinatan ninkichis: ¿Ima nispan Señor Diosqa nishasunki? ¿Imatañan Señor Diosqa rimapayashasunki? nispa.

³⁸Qankunataqchus ninkichis: Señor Diospa willakuynin,*fb* nispa chayqa, qan Jeremiasmi ninki: Señor Diosmi nin: Amañan ninkichischu, nishaqtiypas, qankunaqa rimashallankichismi: Señor Diospa willakuynin*fb* nispa,

³⁹chay hawan qankunamanpas machulaykichismanpas qosqay llaqtata qankunatapas q'epirparispa ñoqamanta karumanraq wikch'umusaq.

⁴⁰Qankunatan pasaq p'enqayman pisichaymanwan wiñaypaq churasqaykichis, mana hayk'aq qonqanata, nispa, nispayki.